Obushaarizi bw’emishuuguugu omuri Haiti ni bwingi munonga. Emishango y’obushaarizi neeyeyongyera munonga omuri South Africa, Mexico, n’omu hanga agandi aga Latin America. Nangwa n’omu mahanga ei obushaarizi butuubire, hariyo amakuru maingi ag’obushuma bw’ebintu agarikutiinisa, kandi agarikwerarikiriza.

 Baibuli neegamba ki aha kuhenda ebiragiro okuri omu nsi yoona?

 Baibuli ekagamba kare ngu okuhenda ebiragiro kukaba nikwija kutwarirwa omu kamanyiso k’emperu y’entebeekanisa y’ensi egi. (Matayo 24:3) Obu Yesu Kristo yaabaire naashoboorora ebiri omu kamanyiso ako, akagira ati:

•   ‘[Ahabw’okuhenda ebiragiro] kukanya, okukunda kw’abaingi nikwija kuhora.’—Matayo 24:12.

 Kandi Baibuli ekagamba kare ngu ‘omu biro by’emperu’ abantu bakaba nibaija kuba abatarikwezibira, “enshaarizi, abarikwanga ebirungi.” (2 Timoseo 3:1-5) Okweyendeza oku nikwongyera aha bikorwa by’okuhenda ebiragiro ebi turikureeba bikanyire hati.

 Kwonka hariho ekishemereire kutureetera amatsiko. Baibuli neeraganisa ngu juba okuhenda ebiragiro nikwija kuhwaho.

•   ‘Bwanyima [y’akaire] kakye omubi naija kuba atakiriho, buzima noija kumusherura aha mwanya gwe, oshangye atariho. Kwonka abacureezi nibaija kuhungura ensi, beesiime ahabw’okugira obusingye bwingi.’—Zaaburi 37:10, 11.

 Yega ebirikukiraho aha matsiko ga Baibuli, n’ahabw’enki orikubaasa kuhamya ngu ebi turikureeba nibibaho hati nibihikiiriza obunabi bwa Baibuli. Shwijuma ebicweka ebi:

 “Amatsiko Genyini Aga Nyentsya Nungi”

 “Akamanyiso ‘k’Ebiro by’Emperu’ Nari ‘Obwire bw’Emperu’ ni Kaahi?”

 “Did the Bible Predict the Way People Think and Act Today?”