Okwakataano 24, 2022, akagwe kakagwera etauni nkye eya Uvalde, omuri Texas, U.S.A. Kurugiirira aha rupapura rw’amakuru The New York Times, “omushaija omunyambundu akaita abaana 19 n’abashomesa babiri . . . aha Ishomero ry’abaana erya Robb Elementary School.”

 Eky’obusaasi, ebikorwa by’obwinazi nk’ebi bikanyire munonga. Orupapura rw’amakuru USA Today rukagira ngu omuri United States honka, “okurasha omu mashomero kukabamu emirundi 249 omwaka oguhwaire gwonka, ekitakabahoga obundi kuruga 1970.”

 Ahabw’enki obugwe obu nibubaho? Nitubaasa kugumisiriza tuta haabaho obwinazi nk’obu? Hariho amatsiko goona ngu obushaarizi nk’obu nibwija kuhwaho? Baibuli neeha eby’okugarukamu.

•    Obwire obu turimu Baibuli neebweta ‘ebiro by’emperu’ obu abantu baingi baabaire nibaija kuba ‘batarikufayo aha bandi’ kandi bari “enshaarizi,” barikwejumba omu bikorwa by’obwitsi n’obwinazi. Abaine emitwarize nk’egi bakaba nibaija ‘kweyongyera kuba babi.’ (2 Timoseo 3:1-5, 13) Okwega ebirikukiraho, shoma ekicweka “Baibuli shi Ekagamba Kare Omuringo Ogu Abantu Barikutwazamu n’Oku Barikuteekateeka Hati?”

 Abantu baingi nibeebuuza, ‘Ahabw’enki Ruhanga atarikuzibira obugwe nk’okurasha omu mashomero kutabaho?’ Okureeba oku Baibuli erikugarukamu ekibuuzo eki, shoma ekicweka “Ahabw’enki Abantu Barungi Nibahikwaho Ebibi?”

•    ‘Ebyahandiikirwe ira byona bikahandiikwa kutwegyesa, ngu tubone kugira amatsiko ahabw’okuhuumuzibwa Ebyahandiikirwe ebyo.’—Abarooma 15:4.

 Emisingye ya Baibuli neebaasa kukuhwera kugumisiriza omu nsi egi ey’obushaarizi. Reeba Awake! eine omutwe “Obushaarizi Nibwija Kuhwaho?” kubaasa kumanya ebirikukiraho.

 Abazaire kumanya oku barikubaasa kuhwera abaana baabo kugumisiriza amakuru garikutiinisa, mushome ekicweka “Amakuru Garikuteganisa Hamwe n’Abaana Baawe.”

•    ‘Naija kucungura amagara gaabo, agaihe omu kubonabonesibwa n’omu mwaga.’—Zaaburi 72:14.

•    ‘Zaarurara zaabo nibaija kuziheeshamu amafuka, n’amacumu gaabo bagaheeshemu empabyo, eihanga tiririkwija kubangira rindi rurara, kandi tibarikwija kugaruka kwega eby’engamba.’—Miika 4:3.

 Ruhanga naija kukora eki abantu batarikubaasa kukora. Obukama bwe obw’omu iguru nibwija kucwekyereza eby’okurwanisa byona, kandi bumareho n’obushaarizi bwona. Kubaasa kumanya eki Obukama bwa Ruhanga buraahikiirize, shoma ekicweka “Obukama bwa Ruhanga Nibwija Kureeta Obusingye Bwingi.”