Enkumi z’emyaka enyima, tihaine buzima owaabaire naamanya eky’okugarukamu ky’ekibuuzo ekyo. Ekyo kitakabaireho, obukaikuru bw’abantu bakaitwa endwara. Bwanyima, abanyasaayansi bakamanya amazima. Bakashanga ngu endwara zikaba nizikira kureetwa obukooko bukye oburikurwaza obu omuntu atarikubaasa kureeba n’amaisho butunu. Okumanya amazima aga kihwereire abantu kwerinda endwara nyingi n’okuzitamba, ekireetaire abantu baingi kuhangaara n’okugira amagara marungi.

Kandi shi ebindi bibuuzo bikuru? Nooteekateeka ngu okusherura amazima agarikukwata aha bibuuzo ebi nikubaasa kukukwataho kuta?

• Ruhanga n’oha?

• Yesu Kristo n’oha?

• Obukama bwa Ruhanga niki?

• Niki ekiraabeho omu biro by’omumaisho?

Obukaikuru bw’abantu batungire eby’okugarukamu by’ebibuuzo ebyo, kandi n’embeera zaabo zaashemera. Naiwe noobaasa kugasirwa omu by’okugarukamu ebyo.

Noobaasa kwebuuza oti: ‘Nikibaasika kita kumanya amazima agarikukwata ahari buri kimwe?’ Ahakuba okumanya amazima agarikukwata aha nshonga zitari zimwe na zimwe kigumire munonga. Ahabw’enki?

Abantu baingi tibarikwesiga gavumenti, eby’obushuubuzi, nari eby’amakuru kubagambira amazima. Nikibagumira kutaanisa amazima n’ebiteekateeko by’abantu, amazima g’ekitega, n’ebishuba ebirikugambwa nk’ebihikire. Hati obu hariho okuteesigana, n’amakuru gatahikire, abantu tibarikwikirizana aha kihikire n’ekitahikire.

N’obu embeera ziraabe zigumire, nikibaasika kutunga eby’okugarukamu ebihikire ebirikukwata aha bibuuzo byona ebikuru. Mu muringo ki? Orikukoresa obukoryo obu orikukoresa butoosha.

Nitubaasa kugira ngu noosherura amazima buri izooba. Teekateeka aha mbeera ya Jessica. “Efumbi ya muhara wangye neereetwa ebinyobwa,” Jessica nikwo arikugira, “nangwa n’akacweka kakye k’ebishaju by’ebinyobwa nikabaasa kumwita.” Jessica naaba aine kuhamya ngu eby’okurya ebi araagure tibiraabe eby’akabi aha muhara. “Ekintu ky’okubanza eki ndikukora n’okushoma ebihandiikire aha by’okurya n’obwegyendesereza kumanya ebirungo ebirimu. Bwanyima ninyongyera kucondooza kandi nteerera abaabikozire kuhamya ngu tibirimu kirungo ky’ebinyobwa kyona ekihabiiremu. Kandi nincondooza n’ahandi kuhamya ngu ekitongore ekirikukora eby’okurya eki nikyesigwa.”

Noobaasa kuba otarikutegana munonga omu kusherura amazima nk’oku Jessica arikutegana, kwonka nka Jessica, noobaasa kukoresa omuringo oguri ahaifo kutunga eby’okugarukamu by’ebibuuzo byawe:

• Tunga amazima agahikire.

• Yongyera kucondooza.

• Hamya ngu ebi orikucondoozamu bihikire.

Enkora niyo emwe neebaasa kukuhwera kutunga eby’okugarukamu ebihikire ebirikukwata aha bibuuzo bikuru. Mu muringo ki?

Jessica omu kusherura amazima, naakuratira omuringo nigwo gumwe ogu arikukoresa yaaba naasherura eby’okurya bya muhara we. Naagira ati: “Okwegyendesereza omu kushoma n’okusherura n’obweziriki kikampwera kutunga amazima g’omu Baibuli.” Nka Jessica, obukaikuru bw’abantu beegire eki Baibuli erikugamba aha bibuuzo ebi:

• Ahabw’enki twahangirwe?

• Niki ekirikubaho omuntu yaafa?

• Ahabw’enki hariho okubonabona?

• Ruhanga naakora ki kubaasa kwihaho okubonabona?

• Nitubaasa kugira tuta amaka agarimu okushemererwa?

Noobaasa kutunga eby’okugarukamu ebihikire eby’ebibuuzo ebi n’ebindi orikushoma Baibuli, kandi okongyera kucondooza aha www.mt1130.com.