Ebiconco ebimwe nitubitwara nk’eby’omuhendo ahabw’okugira ngu ababituhaire baine obushoboorozi nari nitubaha ekitiinisa. Ebiconco ebindi, n’obu biraabe nibigura akasente kakye, nitubisiima ahabw’okugira ngu tukabitunga kuruga aha munyabuzaare nari munywani waitu ow’aha mara. Ekyo nikishushana n’ekiconco eki Russell yaahaire Jordan, ekirikugambwaho omu kicweka ekyabanza. Eki nikihikaana kita n’ekiconco ky’ekitambo?

Eky’okubanza, Baibuli neegira ngu ‘Ruhanga akatuma omwana we omwe nyamunegyere, ngu tube abahuriire ahabwe.’ (1 Yohaana 4:9) Eki nikireetera ekiconco eki kuba eky’omuhendo. Tihariho muntu oine obushoboorozi okukira Ruhanga. Omuhandiiki wa zaaburi arikugamba ahari Ruhanga, akahandiika ati: “Niiwe wenka orikwetwa Yehova, okira boona, kandi otegyeka ensi yoona.” (Zaaburi 83:18) Tihaine omuntu orikubaasa kutuha ekiconco orikukira Ruhanga.

Ekya kabiri, Ruhanga ni “Tataitwe.” (Isaaya 63:16) Mu muringo ki? Akatuha amagara. Okwongyera ahari ekyo, naatufaho munonga nk’omuzaire orikufayo aha baana be. Arikugamba n’abantu be nka Efuraimu, Ruhanga akagira ati: ‘Efuraimu t’omwana wangye ou nkunda? Omutima gwangye gumwiniire orushusho. Buzimazima ndyamugirira embabazi.’ (Yeremia 31:20) Ruhanga nikwo arikureeba atyo abaheereza be ab’obunaku obu. N’omuhangi waitu, Tataitwe kandi Munywani waitu. Mbwenu shi ekyo tikirikureetera ekiconco kyona eki arikutuha kuba eky’omuhendo?

Ebiconco ebimwe n’eby’omuhendo ahabw’okugira ngu nibiheebwayo ahabwa rukundo, beitu kutari kugyemeserezibwa. Omuntu orikuha atarikweyendeza tarikuteekateeka kushashurwa ahabw’embabazi ze.

Ruhanga akahayo Omwana we kutufeera ahabw’okugira ngu naatukunda. Baibuli neegira ngu ‘omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere.’ Ahabw’enki yaakozire eki? “Ngu tube abahuriire ahabwe.” (1 Yohaana 4:9) Mbwenu shi eki Ruhanga akaba ashemereire kukikora? Ngaaha buzima! “Okucungurwa okuri omuri Yesu Kristo” nikworeka ‘embabazi’ za Ruhanga.—Abarooma 3:24.

Ahabw’enki ekiconco kya Ruhanga kiri ekikorwa ‘ky’embabazi’ ezitatushemereire? Baibuli neeshoboorora eti: “Kwonka Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.” (Abarooma 5:8) Rukundo etarimu kweyendeza ekahiga Ruhanga kugira eki yaakorera abeeremwa, abataine buhwezi, n’abasiisi. Tihaine eki twakozire kubaasa kutugirira rukundo ey’omuringo nk’ogwo, kandi titurikubaasa kumushashura. Ekiconco kye nikyo kirikukirayo kworeka rukundo.

Ebiconco ebimwe nitubitwara nk’eby’omuhendo ahabw’okugira ngu abarikubihayo nibeefeerereza kihango. Omuntu yaaba ayeteekateekire kweyihaho ekintu ky’omuhendo kandi akakituha, buzima ekiconco ekyo nitukitwara nk’eky’omuhendo ahabw’okwefeerereza kwe.

Ruhanga ‘akahayo Omwana we omwe nyamunegyere.’ (Yohaana 3:16) Tihaine ou yaabaire naabaasa kuhayo orikukira ogu. Obwire obu Yehova yaamazire naahanga iguru n’ensi, Yesu akaba ari hamwe nawe, kandi niwe yaabaire ari “okushemererwa kwe.” (Enfumu 8:30) Yesu ‘n’Omwana’ wa Ruhanga ou arikukunda kandi ‘ekishushani kya Ruhanga otarikureebwa.’ (Abakolosai 1:13-15) Omukago ogu baabaire baine tigukabahoga omu bihangirwe ebindi ebiine obwengye.

Kwonka, Ruhanga ‘taratwimire Mwana we.’ (Abarooma 8:32) Yehova akatuha ekiconco ekirikukirayo oburungi. Akeefeerereza munonga kutuha ekiconco eki.

Ebiconco ebimwe n’eby’omuhendo ahabw’okugira ngu nibihikiiriza ekyetengo kyenyine, nari eky’ahonaaho. Nk’eky’okureeberaho, ka noobaasa kusiima munonga omuntu yaayehayo ayekundiire kukushashurira obujanjabi obu otarikubaasa! Ekiconco ekyo ka nikiba eky’omuhendo buzima, tikwo?

‘Nk’oku boona bafa omuri Adamu, nikwo n’omuri Kristo boona barihindurwa abahuriire.’ (1 Abakorinso 15:22) Itwe baijukuru ba Adamu, twena ‘nitufa,’ titurikubaasa kwejuna endwara n’okufa, kandi titurikubaasa kwegarukanisa na Ruhanga, reero tukeyihaho orubanja. Kandi itwe abantu buntu, titurikubaasa kwebaisaho ahabwaitu nari kubaisaho omuntu ondiijo. Baibuli neegira eti: “Tihariho n’omwe aharibo orikubaasa kucungura mwene ishe, n’obu kwakuba okuha Ruhanga eky’okumucungura . . . tikushemereire kwehangwa.” (Zaaburi 49:7, 8) Buzima nitwenda obuhwezi ahabw’okugira ngu titurikubaasa kushashurira ekitambo. Ahatari Ruhanga, tukaabaire tutaine buhwezi.

Yehova ahabw’okutukunda munonga, akatushashurira ayekundiire obujanjabi oburikukiza amagara, kugira ngu kurabira omuri Yesu “boona barihindurwa abahuriire.” Ekitambo nikihikiiriza kita eki? “Eshagama ya Yesu Kristo omwana we eguma neetwozyaho ebibi byona.” Eego, okwikiririza omu shagama ya Yesu nikitubaasisa kusaasirwa ebibi n’okwija kutunga amagara agatahwaho. (1 Yohaana 1:7; 5:13) Kandi ekitambo nikiija kuhwera  kita abakundwa baitu abaafiire? “Ahakuba nk’oku okufa kwareetsirwe omuntu, nikwo n’okuzooka kw’abafu kwareetsirwe omuntu [Yesu].”—1 Abakorinso 15:21. *

Tihariho kiconco ekirahairweyo omuntu mukuru nari oine rukundo ekirikukira ekitambo kya Yesu. Tihariho oraayefeerereize bingi ahabwaitu nka Yehova Ruhanga. Kandi tihariho kiconco ekirahikiririize kihango okukira ekitambo ekirikutucungura omu kibi n’okufa. Buzima, tihariho kiconco ekirikubaasa kwingana n’ekitambo ekitarikubaasa kushoboororwa.