Abantu baingi omu nsi nibaba baine ekyetengo ky’eby’okurya n’oburaaro. Abamwe baine ekyetengo ky’amatsiko g’ebiro by’omumaisho. Twateeraho kuhwera abantu nk’abo Ruhanga naatusiima kandi naatuha emigisha.

‘Orikugirira abooro embabazi, naaba naaguza [Yehova], naija kumuzimuurira ebi yaakozire.’​—ENFUMU 19:17.

Yesu akagamba aha nfumu y’omushaija owaagwire omu baambuzi ou baateire bakatsiga ari hakye kufa. (Luka 10:29-37) Omushaija ou baateire akagira obuhuta akahwerwa omuntu ou atarikumanya. Omuntu ogwo akakikora n’obu araabe yaabaire atari Muyudaaya.

Omushaija ogu ow’embabazi akashemba obuhuta bwe, yaamuha n’esente z’okumureeberera, okwongyera ahari ekyo akamuhuumuriza yaatuubya amaganya ge.

Enfumu egi neetwegyesa ki? Yesu akaba naayoreka ngu twine kuhwera abaine ebi bakyenire omu muringo gwona ogu turikubaasa. (Enfumu 14:31) Ebyahandiikirwe Ebirikwera nibitwegyesa ngu Ruhanga ari haihi kumaraho obworo n’okubonabona. Nitubaasa kwebuuza oku Ruhanga araakore ekyo n’obu ekyo kiraabeho? Ekicweka ekirikukurataho nikiza kworeka emigisha ei Omuhangi waitu owa rukundo arikwija kukuha.