Yesu akaba naabuurira obutumwa bw’obusingye. Eizooba rimwe, akagambira entumwa ze ati: “Mutateekateeka ngu nkaija kureeta obusingye omu nsi, tindaizire kureeta busingye, kureka rurara. Ahabw’okuba nkaija kutaanisa omwojo na ishe, omwishiki na nyina, omukazi na nyinazaara.” (Mat. 10:34, 35) Yesu akaba naamanyisa ki?

Yesu akaba atarikwenda kubaganisamu amaka, kwonka akaba naamanya ngu enyegyesa ze niziija kubaganisamu amaka agamwe. N’ahabw’ekyo, abarikwenda kuba abeegi ba Kristo kandi bakabatizibwa, baine kuba nibamanya ebiraarugye omu kucwamu kwabo. Baahakanisibwa abakundwa baabo abatari mu mazima nari abanyabuzaare, nibabaasa kugumirwa kuhamira aha nyegyesa za Kristo.

Baibuli neehiga Abakristaayo kutuura ‘n’abantu boona omu busingye.’ (Rom. 12:18) Kwonka enyegyesa za Yesu nizibaasa kuba nka “rurara” omu maka agamwe. Eki nikibaho omwe aha b’eka egyo yaikiriza enyegyesa za Yesu, reero abandi bakazanga. Omu mbeera nk’egyo, abanyabuzaare nari ab’eka egyo nibatwara ogwo orikwega amazima nk’omuzigu.—Mat. 10:36.

Abeegi ba Yesu abarikutuura omu maka ageebaganiisemu omu nyikiriza, obumwe nibahikwaho embeera ezirikugyeza rukundo ei bainiire Yehova na Yesu. Nk’eky’okureeberaho, abanyabuzaare abatari mu mazima nibabaasa kubagyemesereza kwejumba omu kukuza ebiro bikuru eby’ediini. Ku barikuhikwaho okugyezibwa nk’okwo nibacwamu kushemeza oha? Yesu akagira ati: “Orikukunda ishe nari nyina okubankiza, tashemereire kuba owangye.” (Mat. 10:37) N’amazima, Yesu akaba atarikumanyisa ngu abeegi be kubaasa kusiimwa, baine kutuubya ahari rukundo ei bainiire abazaire baabo. Kureka, akaba naabeegyesa okwebembeza ebirikukira obukuru. Abanyabuzaare baitu abatari mu mazima baatuhakanisa ahabw’okuramya Yehova, nituguma nitubakunda, kwonka rukundo ei twiniire Ruhanga niyo erikuza omu mwanya gw’okubanza.

Hatariho kubangaanisa, okuhakanisibwa abanyabuzaare nikibaasa kureeta obusaasi bwingi. Kwonka nabwo, abeegi ba Yesu nibaijuka ebigambo bye ebi: ‘Omuhuuku tarikukira mukama we, ku baraabe baampiigire, naimwe nibaija kubahiiga.’ (Yoh. 15:20) Ekirikumanyisa ngu, Abakristaayo nibaba baine kuba beeteekateekire kwemera okuhakanisibwa ahabw’okuba abeegi ba Kristo. Kwonka nibaba baine amatsiko ngu emitwarize yaabo mirungi neija kuhiga abanyabuzaare baabo abatari mu mazima, kwikiriza obutumwa bwa Baibuli.—1 Pet. 3:1, 2.