Ebibuuzo Kuruga omu Bashomi
Omukazi orikugambwaho omuri Isaaya 60:1 n’oha, kandi ‘naimuka ayaka’ ata?
Isaaya 60:1 a nihagira hati: “Imuka [mukazi] oyakye, ahakuba omushana gwawe gwizire, n’ekitiinisa kya [Yehova] kikujwereire.” Emishororongo eyetooroire ekyahandiikirwe eki neeyoreka ngu omukazi akaba ari Saayuuni nari Yerusaalemu orurembo rukuru rwa Yuda orw’obwire obwo. (Isa. 60:14; 62:1, 2) Orurembo nirujwekyera eihanga rya Israeli ryona. Kwonka ebigambo bya Isaaya nibireetaho ebibuuzo bibiri ebi: Eky’okubanza, Yerusaalemu ekaimuka’ ryari kwaka n’okujwisa ekyererezi ky’eby’eby’omwoyo? Ekya kabiri, ebigambo bya Isaaya shi biriyo nibihikiirira omu bwijwire obunaku obu?
Yerusaalemu ‘ekaimuka’ ryari kwaka n’okujwisa ekyererezi ky’eby’eby’omwoyo? Yerusaalemu na hekalu bikaguma biri amatongo obu Abayudaaya baabaire bari omu bukwatwa omuri Babulooni kumara emyaka 70. Kwonka Babulooni ku yaasingwirwe Abameedi, Abaisraeli abaabaire bari omu butware bwa Babulooni bakaikirizibwa kugaruka owaabo kugaruraho okuramya okushemereire. (Ezr. 1:1-4) Okutandika na 537 Y.A., Abayudaaya abeesigwa entsigarira kuruga omu nganda 12 bakagaruka owaabo. (Isa. 60:4) Baatandika kuhayo ebitambo ahari Yehova, kukuza amagyenyi, n’okugaruka kwombeka hekalu. (Ezr. 3:1-4, 7-11; 6:16-22) Ekitiinisa kya Yehova kikagaruka kureebwa omuri Yerusaalemu, nibo bantu ba Ruhanga. Bakaruga kwakira amahanga, agaabaire gari omu mwirima omu by’omwoyo.
Kwonka obunabi bwa Isaaya tiburaahikiirire omu bwijwire ahari Yerusaalemu eya ira. Abaisraeli boona tibaragumire niboorobera Ruhanga. (Neh. 13:27; Mal. 1:6-8; 2:13, 14; Mat. 15:7-9) Kandi bwanyima, bakanga Mesia, niwe Yesu Kristo. (Mat. 27:1, 2) Omu gwa 70 Y.A.K., Yerusaalemu otwariiremu na hekalu bikacwekyerezibwa omurundi gwa kabiri.
Yehova akaba yaagambire akabi akaabaire nikaija kubaho. (Dan. 9:24-27) Buzima, kikaba kitari kigyendererwa kya Yehova Yerusaalemu ey’omu nsi kuhikiiriza buri kashonshorekye akari omu bunabi bw’okugarura busya oburi omuri Isaaya eshuura 60.
Ebigambo bya Isaaya shi biriyo nibihikiirira omu bwijwire obunaku obu? Eego, kwonka aha bikwatiraine n’omukazi ondiijo ow’akamanyiso niyo—“Yerusaalemu ey’omu iguru.” Entumwa Paulo akagihandiikaho ati: “Niwe maaweitwe.” (Gal. 4:26) Yerusaalemu ey’omu iguru, n’ekicweka ky’ekibiina kya Ruhanga eky’omu iguru eky’ebihangirwe eby’omwoyo. Abaana be nibatwariramu Yesu n’Abakristaayo-entoore 144,000, abaine amatsiko nk’agu Paulo yaabaire aine, ag’okuza omu iguru. Nibakora “eihanga eririkwera,” niyo ‘Israeli ya Ruhanga.’—1 Pet. 2:9; Gal. 6:16.
Yerusaalemu ‘ekaimuka’ eta kwaka n’okujwisa ekyererezi ky’eby’eby’omwoyo? Ekyo kikabaho kurabira omu abaana be entoore ab’omu nsi. Teekateeka aha bi baarabiremu n’ebiri omu bunabi bwa Isaaya eshuura 60.
Abakristaayo entoore bakaba baine kwimuka ahakuba bakaba bari omu mwirima gw’eby’omwoyo, obu omwata nibo abeehagwire aha amazima baakanya omu kyasha kya kabiri Y.A.K. (Mat. 13:37-43) Bakaba enkwatwa omu Babulooni Orukuru, nizo diini z’ebishuba. Entoore bakaguma omu bukwatwa kuhitsya “aha mperu y’obusingye obu,” eyaatandikire 1914. (Mat. 13:39, 40) Bwanyima, omuri 1919, bakarekurwa kuruga omu bukwatwa, kandi ahonaaho bakatandika kujwisa ekyererezi eky’eby’omwoyo barikwejumbira kimwe omu murimo gw’okubuurira. b Kumara emyaka, abantu b’amahanga goona bareebire ekyererezi, otwariiremu n’entsigarira aba Israeli ya Ruhanga, nibo ‘bagabe’ abarikugambwaho omu Isaaya 60:3.—Kush. 5:9, 10.
Omu biro by’omumaisho, Abakristaayo entoore nibaija kwongyera kujwisa omushana ogurikuruga ahari Ruhanga. Mu muringo ki? Ku baraahendere obuheereza bwabo omu nsi, nibaija kwegaita ahari “Yerusaalemu Orusya,” nari omugore wa Kristo 144,000, abagabe n’abanyamurwa bagyenzi baabo.— Kush. 14:1; 21:1, 2, 24; 22:3-5.
Yerusaalemu ensya neija kukora kihango kuhikiiriza ebiri omuri Isaaya 60:1. (Gyeragyeranisa Isaaya 60:1, 3, 5, 11, 19, 20 na Okushuuruurwa 21:2, 9-11, 22-26.) Nk’oku Yerusaalemu ey’omu nsi kyabaire kiri ekitebe kikuru kya gavumenti ya Israeli eya ira, Yerusaalemu Orusya na Kristo neija kuba ekitebe kikuru ky’entebeekanisa nsya. Yerusaalemu Orusya “nirushuuma [ruta] kuruga omu iguru ahari Ruhanga”? Erikukora ebirikugasira ensi. Abantu abarikutiina Ruhanga kuruga omu mahanga goona ‘nibaija kugyendera omu mushana gwarwo.’ Kandi, nibaija kucungurwa kuruga omu kibi n’okufa. (Kush. 21:3, 4, 24) Nihaija kubaho ‘okugarura ebintu byona busya’ omu bwijwire, nk’oku Isaaya na baanabi abandi baagambire. (Byak. 3:21) Okugarurwa busya okwo kukatandika kubaho obu Kristo yaaba Omugabe, kandi nikwija kuhendera aha muheru gw’Emyaka Rukumi ey’Obutegyeki bwe.
a Omu Ruheburaayo engambi n’entisgwa ebirikukoresibwa omu mushororongo ogu nibijwekyera omukazi. N’ahabw’ekyo, nitubaasa kugira ngu omukazi niwe arikugambwaho.
b Okugarurwa busya omu by’omwoyo okwabaireho 1919 nikugambwaho n’omuri Ezekieli 37:1-14 na Okushuuruurwa 11:7-12. Ezekieli akagira ngu bwanyima y’okumara obwire bwingi omu bukwatwa Abakristaayo boona entoore bakaba nibaija kugarurwa busya omu by’omwoyo. Obunabi oburi omu Okushuuruurwa nibugamba aha kugaruka kubaho kwa guruupu nkye y’ab’eishe-emwe entoore abarikureeberera ekibiina, bwanyima y’okumara obwire bukye batairwe omu kihome. Omuri 1919, bakatooranwa kuba ‘omwambari omwesigwa kandi ow’obwengye.’—Mat. 24:45; reeba ekitabo Pure Worship of Jehovah—Restored At Last!, rup. 118.
