Eki Waaba Nookimanya?
Oyihireho Baibuli ni buhame ki obundi oburikworeka ngu Abaisraeli bakabaho abahuuku omuri Misri?
Baibuli neetugira ngu bwanyima y’Abamidiani kutwara Yosefu Misri, Yakobo n’eka ye bakaruga Kanaani baaza Misri. Bakatuura omu kyanga ekirikwetwa Gosheni omuri Misri, haihi n’omugyera Nailo. (Kut. 47:1, 6) Abaisraeli bakaguma ‘nibeeyongyera munonga, baakanya, baaba ab’amaani.’ N’ahabw’ekyo Abanyamisri bakatiina munonga Abaisraeli babahindura abahuuku.—Kur. 1:7-14.
Abahakanisa abamwe ab’obunaku obu tibarikwikiriza eki Baibuli erikugamba, nibagira ngu n’ebitebyo butebyo. Kwonka hariho obuhame oburikworeka ngu, Abaasheemu * bakaba bari abahuuku omuri Misri ira.
Nk’eky’okureeberaho, abarikwetegyereza ebizoirwe omu itaka bakazoora emyanya eyaabaire neetuurwamu ira omu matemba ga Misri. Dr. John Bimson naagira ngu hariho obuhame oburikuhika 20 n’okurengamu oburikworeka ngu Abaasheemu bakatuura omu matemba ga Misri. Kandi, omunyabyafaayo wa Misri James K. Hoffmeier naagira ati: “Kuruga 1800 kuhika 1540 Y.A., Misri gukaba guri omwanya murungi gw’okufurukiramu ogwa Abaasheemu ab’omu burengyerwa izooba obwa Asia.” Naayongyeraho ati: “Obwire obwo n’embeera ezo nibihikaana n’eby’abashaija ba ira ebiri omu kitabo ky’Okutandika.”
Hariho obuhame obundi kuruga omu mashuuma ga Misri. Ekihandiiko eky’Obugabe bwa ira aha gati ya (2000– 1600 Y.A.) kirimu amaziina g’abahuuku abaabaire nibakora omu ka emwe omu mashuuma ga Misri. Amaziina agarikurenga 40 n’ag’ab’oruganda rwa Sheemu. Abahuuku aba bakaba nibakora nk’abateeki, abaruki, n’endiijo mirimo. Hoffmeier naagira ati: “Obu amaziina g’Abaasheemu agarikurenga 40 gaabaire gari ag’abantu abarikukorera eka emwe omu kicweka kya Thebaid [amashuuma ga Misri], nikyoreka ngu omuri Misri nihabaasa kuba haabaire harimu abantu baingi.”
David Rohl orikwetegyereza ebizoirwe omu itaka akahandiika ngu gamwe aha maziina g’abahuuku aba “nigashushana n’ag’omu Baibuli.” Nk’eky’okureeberaho, obucweka by’ebihandiiko buriho amaziina nka Isakaari, Asheri, na Shifira. (Kur. 1:3, 4, 15) Rohl naahendera arikugira ngu “eki nikihamya obwire obu Abaisraeli baamazire omuri Misri bari abahuuku.”
Dr. Bimson naagira ati: “Ebirikukwata aha Baisraeli kuba abahuuku omuri Misri n’okurugayo kwabo biine obuhame omu byafaayo.”
^ kacw. 4 Eiziina Abaashemu niriruga omuri Sheemu, omwe ahari batabani ba Noa bashatu. Baijukuru ba Sheemu nibabaasa kuba nibatwariramu, Abaelamu, Abaasiria, Abakaludaaya, Abaheburaayo, Abasiria, n’enganda zitari zimwe na zimwe ez’Abaharabu.
