Baibuli ebaasize kurindwa. N’ekirugiremu, noobaasa kugitunga ogishome hati. Kandi ku orikutoorana envunuura nungi ya Baibuli, noobaasa kuhamya ngu nooshoma Baibuli erikwesigwa kuruga aha bihandiiko ebyabandize. * Kwonka ahabw’enki Baibuli ebaasize kurindwa kutasiisikara, kutacwekyerezibwa omu kuhiiganisibwa, n’obutumwa bwayo kutahindurwa? Ni kintu ki eky’omutaano aha kitabo eki?

Abeegi baingi ba Baibuli babaasize kugamba ebigambo nk’eby’entumwa Paulo, owaahandiikire ati: ‘Ebyahandiikirwe byona, bihandiikisiibwe’ Ruhanga. (2 Timoseo 3:16) Nibaikiriza ngu Baibuli ebaasize kurindwa ahabw’okugira ngu n’Ekigambo kya Ruhanga eky’omutaano, n’ahabw’ekyo Ruhanga abaasize kukirinda kuhitsya na hati. Faizal orikugambwaho omu kicweka eky’okubanza omu Munaara ogu, akacwamu kwega Baibuli kucondooza kureeba yaaba ebi barikugigambaho n’amazima. Eki yaajumbwire kikamutangaaza munonga. Bwanyima akeega ngu enyegyesa nyingi eziri omu madiini agarikweyeta Amakristaayo tiziri mu Baibuli. Okwongyera ahari ekyo, akashemezibwa ekigyendererwa eki Ruhanga ainiire ensi nk’oku kirikworekwa omu Baibuli.

Naagira ati: “Hati nimpamiza kimwe ngu Baibuli ei nyine n’ekiconco kuruga ahari Ruhanga. Mbwenu shi Ruhanga ku araabe naabaasa kuhanga ensi n’eiguru, taine amaani g’okutuha ekitabo kandi akakiturindira? Waagamba ekirikutaana n’ekyo, nooba noogaya amaani ga Ruhanga. Niinye oha orikubaasa kugaya amaani g’ow’Obushoboorozi Bwona?”​—Isaaya 40:8.