Ebintu nk’ebyo ebirikwitsa enshoni ni bingi omu nsi. * Nibibaasa kushangwa omu birikurangwa, eby’emishono, zaavidiyo, ebyeshongoro, zaamagaziini, tiivi, esimu n’aha mikura ya Intaneeti. Obunaku obu, ebirikwitsa enshoni bijanjaire munonga. Abantu baingi omu myanya mingi nibareeba ebirikwitsa enshoni okukira oku kyabaire kiri ira.​—Reeba akabokisi, “ Eki Twine Kumanya aha Birikwitsa Enshoni.”

Emiringo y’ebirikwitsa enshoni neeguma neehinduka. Omuhangu Gail Dines akahandiika ati: “Ebishushani ebirikwitsa enshoni hati bijanjaire munonga, ebyabaire nibitwarwa nk’eby’akabi hati nibireebwa nk’ebitari by’akabi.”

Nooteekateeka ki aha kujanjaara kw’ebirikwitsa enshoni n’oku abantu barikubitwara? Mbwenu shi ebirikwitsa enshoni tiby’akabi? Yesu akagira ati: ‘Omuti gwona omurungi gwana ebyana birungi, kandi omuti  omubi gwana ebyana bibi.’ (Matayo 7:17) Niki ekirikuruga omu kureeba ebirikwitsa enshoni? Kutunga eky’okugarukamu, ka tushwijume ebibuuzo bimwe ebikuru ebirikukwata aha birikwitsa enshoni

EBI ABAHANGU BARIKUGAMBA: Okureeba ebirikwitsa enshoni n’omuze ogugumire icwa kandi abacondoozi n’ab’eby’emibazi nibagugyeragyeranisa n’okukoresa kokaini.

Brian, * owaabaire aine omuze gw’okureeba ebirikwitsa enshoni aha Intaneeti naagira ati: “Kikaba kingumiire kucwa omuze gw’okubireeba. Nkahinduka omuhuuku waabyo. Nkaba ntetema nteerwa n’omutwe ahabw’okubireeba. Nkateeraho kucwa omuze ogwo, kwonka bwanyima y’emyaka mingi nkaba nkigwine.”

Abantu abarikureeba ebirikwitsa enshoni nibakira kushereka omuze gwabo. Tibarikugamba mazima. Niyo nshonga ahabw’enki baingi nibeshoroora, bahemuka, bagira amaganya n’ekiniga. Obumwe nibateeraho kwenda kweita. Serge owaabaire naiha ebishushani ebirikwitsa enshoni aha Intaneeti arikubita aha simu ye buri izooba naagira ati: “Nkaba nyeteekateekaho nyenka kandi nyehwa amatsiko. Nkaba nyehurira nk’otaine mugasho, nk’ori wenka, nk’omuhuuku kandi nyeshinja. Nkaba nyine enshoni kandi ndikutiina kushaba obuhwezi.”

Nangwa n’okureeba kakye aha birikwitsa enshoni otakigyendereire, nikibaasa kuba eky’akabi. Omucondoozi mukuru aha bikwatiraine n’ebirikwitsa enshoni Dr. Judith Reisman, arikugamba omu maisho g’akakiiko kamwe ak’obwebembezi omuri Amerika akagira ati: “Ebishushani ebirikwitsa enshoni nibireeta ebiteekateeko bibi n’ebyetengo bibi ebirikuguma omu biteekateeko obwire buraingwa kandi bigumire kwihamu.” Susan, ow’emyaka 19, owaareebireho ebirikwitsa enshoni aha Intaneeti atakigyendereire naagira ati: “Ebishushani ebyo ebibi bikanguma omu biteekateeko. Nibiguma nibiija omu biteekateeko byangye. Nooshusha oti tihariho obu ndiba mbihiire kimwe omu biteekateeko.”

EKI OINE KUTEEKATEEKAHO: Ebirikwitsa enshoni nibihindura abarikubireeba abahuuku baabyo.​—2 Petero 2:19.

EBI ABAHANGU BARIKUGAMBA: “Ebirikwitsa enshoni nibireetera obushwere n’amaka kusheenyuka.”​—Ekitabo The Porn Trap, ekyahandiikirwe Wendy na Larry Maltz nikwo kyagizire.

Okureeba ebirikwitsa enshoni nikusheenya obushwere n’amaka kurikureetera

• Abari omu bushwere kuteesigana n’okushiisha rukundo yaabo.​—Enfumu 2:12-17.

• Omuntu kweteekateekaho wenka n’okutamarwa n’ou ari nawe omu bushwere n’okweshoroora omu bandi.​—Abaefeso 5:28, 29.

• Omuntu kuhimbisiriza eby’obushambani n’okugira ebyetengo bibi.​—2 Petero 2:14.

• Omuntu kugyemesereza ou ari nawe omu bushwere kwejumba omu bikorwa by’okuteerana ebitashemeire.​—Abaefeso 5:3, 4.

•   Bamwe kurigira abu batari nabo omu bushwere.​—Matayo 5:28.

Baibuli neegira ngu abari omu bushwere tibaine “kuba endeebya.” (Malaki 2:16) Okutaba mwesigwa nikubaasa kushiisha obushwere kurugyemu okutaana n’okugaitururwa. Okushenyuka kw’obushwere nikubaasa kureetera abaana oburemeezi.

Ebirikwitsa enshoni nibibaasa n’okureetera abaana oburemeezi baabireeba. Brian, owaaba yaagambirweho, naashoboorora ati: “Obu naabaire nyine emyaka ikumi, tukaba nituzaana, naagwa aha katabo ka tata akaabaire karimu ebishushani ebirikwitsa enshoni. Nkatandika kubireeba bwesherekye, ntarikwetegyereza ahabw’enki naabaire nindeeba ebishushani ebyo. Eki kikarugamu omuze mubi, ogwagumiizemu kuhitsya omu bukuru.” Okucondooza nikworeka ngu okureeba ebirikwitsa enshoni nikureetera eminyeeto kurahuka kugira ekyetengo ky’okwenda kuteerana, kwenda kuteerana n’abantu baingi, kwenda kuhamba, kandi omuntu naaba nk’otatebeekaine omu biteekateeko.

 EKI OINE KUTEEKATEEKAHO: Ebirikwitsa enshoni nibishiisha emikago, kandi nibireeta oburemeezi.​—Enfumu 6:27.

EKIGAMBO KYA RUHANGA NIKIGIRA KITI: “Mwite eby’ensi ebiri omu ngingo zaanyu, obushambani, ebihagaro, okurigira okubi, okwetenga okubi, kandi n’okwetenga, nikwo kuramya ebishushani.”​—Abakolosai 3:5.

Yehova * Ruhanga naayanga ebirikwitsa enshoni. Ti habw’okugira ngu naareeba okuteerana kwona nka kubi. Akahanga abantu barikubaasa kushemerererwa okuteerana kugira ngu abashweraine babaase kushemezana, kwirirana haihi, n’okuzaara abaana.​—Yakobo 1:17.

Ahabw’enki nitubaasa kuhamya ngu Yehova naayangira kimwe ebirikwitsa enshoni? Ka tureebe zimwe aha nshonga.

• Naakimanya ngu okureeba ebirikwitsa enshoni nikurugiramu omuntu kufeerwa amagara.​—Abaefeso 4:17-19.

• Naatukunda kandi naayenda kuturinda akabi.​—Isaaya 48:17, 18.

• Yehova naayenda kurinda obushwere n’amaka.​—Matayo 19:4-6.

• Naayenda ngu tugume turi abeecumi omu micwe kandi tutetaasya omu by’abandi.​—1 Abatesalonika 4:3-6.

• Naayenda ngu abashweraine bashemerererwe okuteerana, kandi obugabe obwo babukorese gye.​—Abaheburaayo 13:4.

• Yehova naakimanya ngu ebirikwitsa enshoni nibyoreka emiteekateekyere ya Sitaane egwire, n’okweyendeza aha by’okuteerana.​—Okutandika 6:2; Yuda 6, 7.

EKI OINE KUTEEKATEEKAHO: Okureeba ebirikwitsa enshoni nikushiisha omukago gw’omuntu na Ruhanga.​—Abarooma 1:24.

Abo abarikwenda kucwa omuze gw’okureeba ebirikwitsa enshoni Yehova abainiire embabazi nyingi. Baibuli neegira eti: “MUKAMA n’omunyambabazi kandi omusaasizi; tarahuka kuguubwa kubi, kureka agira okusaasira kwingi. Ahakuba naamanya obuhangwa bwaitu, naijuka ku turi omucuucu.” (Zaaburi 103:8, 14) Naayeta abacureezi boona kwija ahu ari “kuheebwa okusaasirwa, n’okugirirwa embabazi z’okutuhwera ahu turaazeetengyere hoona.”​—Abaheburaayo 4:16; Reeba akabokisi “ Okucwa Omuze gw’Okureeba Ebirikwitsa Enshoni.”

Abantu baingi baikiriize obuhwezi bwa Ruhanga. Obuhwezi obwo nibukora? Reeba eki Baibuli erikugamba ahari bamwe abaabaasize kucwa emize mibi: ‘Mukoogibwa, mwayezibwa, mwaihwaho orubanja omu iziina rya Mukama waitu Yesu Kristo n’omu mwoyo gwa Ruhanga.’ (1 Abakorinso 6:11) Nka Isaaya, abantu nk’abo nibabaasa kugira bati: “Ruhanga niwe kujunwa kwangye, ndyaguma nimmwesiga, tinditiina; ahabw’okuba MUKAMA Yehova niwe maani gangye.”​—Isaaya 12:2.

Susan, owaacwire omuze gw’okureeba ebirikwitsa enshoni naagira ati: “Yehova niwe wenka orikubaasa kukuhwera kucwa omuze ogu. Waamushaba obuhwezi n’obuhabuzi, noogira omukago murungi nawe. Tarikubaasa kukureebya.”