Emyaka nka 3,000 enyima, omuhandiiki wa zaaburi akahandiika ati: ‘okampanga omu muringo gurikutangaaza.’ (Zaaburi 139:14) Waateekateeka aha ku omwana arikukura kuruga omu ihuri, tikirikukutangaaza? Abantu baingi nibaikiriza ngu ebiine amagara haine owaabihangire.—Shoma Zaaburi 139:13-17; Abaheburaayo 3:4.

Ogwo owaahangire iguru n’ensi niwe yaahangire n’ebiine amagara. (Zaaburi 36:9) Akeemanyisa abantu kandi yaabagambira ebirikumukwataho.—Shoma Isaaya 45:18.

Omu miringo mingi, emibiri yaitu neeshushana n’ey’enyamaishwa. Eki kiri kityo ahabw’okugira ngu Omuhangi akahanga abantu n’enyamaishwa kutuura omu nsi. Akahanga abantu b’okubanza kuruga omu itaka, beitu zitari nyamaishwa.—Shoma Okutandika 1:24; 2:7.

Abantu nibataana aha nyamaishwa omu miringo ebiri mikuru. Ogw’okubanza, abantu nibabaasa kumanya Omuhangi waabo, bamukunde, kandi bamuhe ekitiinisa. Ogwa kabiri, n’obu enyamaishwa ziraabe zitarahangirwe kutuuraho ebiro byona, abantu bo bakahangwa kutuuraho ebiro byona. Kwonka hati, abantu boona nibafa ahabw’okugira ngu omuntu w’okubanza akanga obuhabuzi bw’Omuhangi.—Shoma Okutandika 1:27; 2:15-17.