Enguzi omu gavumenti neeshoboororwaho nk’okukoresa kubi obushoboorozi kwetungira eki orikwenda. Okukoresa kubi obushoboorozi kukatandika ira. Nk’eky’okureeberaho, omu Baibuli harimu ekiragiro ekyabaire nikizibira okurya enguzi omu kucwa emanja, ekirikworeka ngu enguzi ekaba eriho emyaka nka 3,500 enyima. (Okuruga 23:8) Hatariho kubanganisa, okurya enguzi nikukira aha kwikiriza ebituga. Abakozi ba gavumenti abashomankuzi obumwe nibaiba ebintu, nibeeha obuheereza obu batashemereire kutunga, nari obumwe baiba esente. Kandi nibabaasa n’okukoresa obushoboorozi bwabo kwendeza ebirungi banywani baabo n’abanyabuzaare omu muringo gutahikire.

N’obu ebitongore by’abantu byona biraabe birimu enguzi, gavumenti nizo zirikukirayo enguzi. Omu 2013 ekitongore ekirikworeka amahanga agarikukirayo oburi bw’enguzi kikahandiika omu Global Corruption Barometer, kirikugira ngu abantu omu nsi yoona nibamanya ngu ebitongore bitaano ebirikukirayo oburi bw’enguzi n’ebibiina by’obutegyeki, poriisi, ebitongore bya gavumenti ebirikuheereza abantu, ebitongore ebirikutaho ebiragiro, n’ebirikucwa emanja. Yetegyereze bumwe aha buremeezi bw’okurya enguzi.

• AFRICA: Omu 2013, abaheereza ba gavumenti 22,000 omuri South Africa bakajunaanwa ahabw’enguzi.

• SOUTH AMERICA: Omu 2012, omuri Brazil, abantu 25 bakateebwaho orubanja ahabw’okukoresa kubi sente z’okuhwera abantu barikuzikoresa kusherura obushagiki omu by’obutegyeki. Omuri abo abaatairweho orubanja hakaba harimu omushaija owaabaireho omuhwezi w’omwebembezi w’eihanga, omuntu wa kabiri mukuru omu ihanga.

• ASIA: Omuri Seoul, eya South Korea, 1995 abantu 502 bakafeera omu duuka emwe mpango eyaabaire neeguza ebintu bingi. Abarikucondooza bakashanga ngu abarikwebembera orurembo orwo, bakaba bahairwe enguzi kwikiriza abombeki kukoresa enkogoto etari y’amaani n’okuhenda ebiragiro by’okwombeka.

• EUROPE: “Oburemeezi oburikureetwaho [enguzi] omuri Europe nibutangaaza,” nikwo Cecilia Malmström omwebembezi omu kibiina kya European Commission Home Affairs yaagizire. Akongyeraho ngu “ab’eby’obutegyeki tibakoorekire ngu bamaririire kwihiraho kimwe enguzi.”

Kigumire munonga abantu kwihaho enguzi eri omu gavumenti. Susan Rose-Ackerman, omuhangu omu kurwanisa enguzi, akahandiika ngu kubaasa kuhezaho enguzi nikyetengyesa “empindahinduka z’amaani omu muringo ogu gavumenti zirikukoramu ebintu.” N’obu kiraabe nikireebeka ngu enguzi eri nk’etarikubaasa kuhwaho, Baibuli neeyoreka ngu neija kuhweraho kimwe.