1, 2. (a) Ahabw’enki Abaisraeli 24,000 baafeereirwe omugisha gw’omutaano? (b) Ahabw’enki ekyabahikireho kiri kikuru ahariitwe?

HARIKUBURAYO obwire bukye Abaisraeli bakataaha omu Nsi Eyaaraganisiibwe, abashaija baingi munonga bakashambana “n’abaishiki b’Abamoabu.” Ekyarugiremu, abantu 24,000 Yehova akabacwekyereza. Yetegyereze ngu Abaisraeli bakaba bari haihi kutunga obuhunguzi obu baabaire batwire bategyereize, kwonka bakafeerwa omugisha ogwo ahabw’okwikiriza bakagwa omu kwohibwa.—Kub. 25:1-5, 9.

² Eky’okureeberaho ekyo ekibi kikahandiikwa “kutuhuguura, itwe abariho omu biro by’aha muheru gw’ensi.” (1 Kor. 10:6-11) Hati ‘ebiro by’emperu’ biri haihi kuhendera, kandi abaheereza ba Ruhanga bari haihi kutaaha omu nsi ensya ey’okuhikiirira. (2 Tim. 3:1; 2 Pet. 3:13) Kwonka eky’obusaasi, bamwe aha baheereza ba Yehova barekyeire aho okwerinda. Bagwire omu mutego gw’obushambani kandi ekyo kyabarugiramu ebintu bibi. Abari nk’abo baaba bateteisize nibaija kufeerwa omugisha gw’okutuura omu Paradiso.

3. Ahabw’enki abashweraine barikwetenga obuhabuzi n’oburinzi bwa Yehova? (Reeba ekishushani aha kutandika.)

 ³ Ahabw’obushambani kujanjaara munonga ebiro ebi, abashaija n’abakazi nibeetenga obuhabuzi n’oburinzi bwa Yehova kuhamya ngu okuteeraho kurinda obushwere bwabo ti kwa busha. (Shoma Zaaburi 127:1.) Nituza kureeba oku omushaija n’omukazi we barikubaasa kuhamya obushwere bwabo barikurinda omutima gwabo, barikwirira haihi Ruhanga, barikutaho omuntu musya, barikugaaniira omu muringo murungi, kandi barikuhaana ekishemeire omu bushwere.

4. Niki ekireetaire Abakristaayo abamwe kugwa omu bushamani?

⁴ Omukristaayo naabaasa kugwa ata omu bushambani? Okugwa omu bushambani nikutandika n’okureeba. Yesu akashoboorora ati: “Orikureeba omukazi akamwetenga, biri aherize kumushambanaho omu mutima gwe.” (Mat. 5:27, 28; 2 Pet. 2:14) Abakristaayo baingi bagwire omu bushambani ahabw’okureeba ebirikwitsa enshoni, ahabw’okushoma ebitabo ebirikukwata aha bushambani, nari ahabw’okureeba ebirikuhemurana aha Intaneeti. Abandi nibaikiriza kweshemeza barikureeba vidiyo ezirimu obushambani, emizaano mibi, nari puroguraamu mbi ez’aha tiivi. Abamwe nibaza omu myanya y’okuziniramu nyekiro, omu myanya ey’okunaanuriramu omubiri, n’endiijo myanya nk’egyo.

5. Ahabw’enki twine kurinda omutima gwaitu?

⁵ Abamwe nibagwa omu kwohibwa ahabw’okwemanyiiza abantu abatari barungi. Omu nsi etarimu kwerinda kandi eijwiremu ebikorwa by’obushambani, kyorobi munonga omutima engobya kugirira omuntu ou otari nawe omu bushwere ekiteekateeko ky’okwenda kuteerana nawe. (Shoma Yeremia 17:9, 10.) Yesu akagira ati: ‘Omu mutima nimwo haruga ebiteekateeko bibi, okwita, n’okushambana.’—Mat. 15:19.

6, 7. (a) Omutima engobya nigubaasa kureetera omuntu kuza mu muhanda ki ogw’okushiisha? (b) Obushambani nibubaasa kwetantarwa buta?

⁶ Ebiteekateeko bibi byaza omu mutima engobya, abantu babiri abarikukira kuba bari hamwe nibabaasa kushanga barikugaaniira ebintu ebi baine kuba nibagaaniira n’abu bari nabo omu bushwere bonka. Haahinguraho obwire, nibaguma nibeeyongyera kwirirana haihi, kandi oshanga barikwekwatsa ngu nibaba batakigyendereire kuba hamwe. Ku barikutandika kugirirana enyehurira, nikibagumira kwerinda. Oku barikugumizamu barikuza omu muhanda gw’okushiisha, nikwo kirikweyongyera kubagumira kurekyera aho, n’obu baakuba nibamanya ngu eki barikukora kigwire.—Enf. 7:21, 22.

⁷ Nibeeberwa kimwe emitindo ya Yehova ebyetengo n’okugaaniira byarugamu okukwatana omu ngaro, okunywegyerana, n’okwekwatakwata kwimutsya ekyetengo ky’okwenda kuteerana. N’ekirikurugamu, ‘nibabeihwabeihwa okwetenga kwabo, kuboosyosya’ bagwa omu mutego. Okwetenga okwo ku kurikukura “kuzaara ekibi” ky’obushambani. (Yak. 1:14, 15) Ekyo ka n’eky’akabi! Ekikorwa kibi ekyo bakaabaire nibabaasa kukyetantara, ku ogire ngu bombi nibaikiriza Yehova kubahwera kureeba obushwere nk’oburikwera. Kwonka shi muringo ki?

8. Okugira omukago murungi na Yehova nikuturinda kuta kutagwa omu bushambani?

⁸ Shoma Zaaburi 97:10. Okugira omukago murungi na Yehova n’omuringo mukuru  gw’okwerinda. Twagumizamu nitwega aha mitwarize mirungi ya Ruhanga, nitwija kuteeraho ‘kumukuratira nk’abaana abarikukundwa kandi tugyendere omu kukunda,’ ekiraatuhwere kwetantara “obushambani n’ekihagaro kyona.” (Efe. 5:1-4) Abashweraine baamanya ngu “abashambani Ruhanga aryabacwera orubanja,” nibaija kukora n’amaani kurinda obushwere bwabo kuguma buri obw’ekitiinisa kandi obushemeire.—Heb. 13:4.

9. (a) Yosefu akeetantara ata okugwa omu bushambani? (b) Nitubaasa kwegyera ki ahari Yosefu?

⁹ Abaheereza ba Ruhanga abamwe abeesigwa baremirwe kurinda emitindo erikukwata aha micwe mirungi, barikumara obwire bwingi n’abu barikukora nabo abatari Bajurizi ba Yehova. Nangwa n’omu bunaku bw’okukora, nihabaasa kubaho okwohibwa. Aha murimo omwojo murungi orikwetwa Yosefu niho yaamanyiire ngu omukazi wa mukama we akaba naamurigira. Butoosha akaba ateeraho kumubeihabeiha. Ekyarugiremu, “yaamukwata ekijwaro, yaamugira ati: Ija tubyame hamwe.” Kwonka Yosefu akabaasa kuhunga omukazi ogwo. Niki ekyahwereire Yosefu kurinda omukago gwe na Yehova omu mbeera egyo egumire? Akaba amaririire kutashiisha omukago gwe na Ruhanga ekyamuhweraire kurinda emicwe ye mirungi n’obwesigwa. Ahabw’okumariirira kwe, akafeerwa omurimo gwe kandi yaateebwa omu kihome omu muringo gutahikire, kwonka Yehova akamuha omugisha. (Kut. 39:1-12; 41:38-43) Yaaba turi aha murimo nari twehereire, twine kwetantara kweta omu kwohibwa twaba turi n’omuntu ou tutari nawe omu bushwere.

10. Omuntu omusya naaturinda mu muringo ki?

¹⁰ Abashweraine baine kutaho omuntu omusya kubaasa kuhamya omukago gwabo na Ruhanga, ahabw’okugira ngu ‘ahangirwe omu nshusha ya Ruhanga omu kuhikiirira n’okwera okw’amazima.’ (Efe. 4:24) Abo abarikutaho omuntu omusya ‘nibaita’ engingo zaabo z’omubiri aha bikwatiraine ‘n’obushambani, ebihagaro, okurigira okubi, n’okwetenga okubi.’ (Shoma Abakolosai 3:5, 6.) Ekigambo ‘okwita’ nikyoreka ngu twine kuteeraho kurwanisa ebyetengo bibi by’omubiri. Nitwija kwetantara ekintu kyona ekirikubaasa kutureetera kugira ekyetengo ky’okwenda kuteerana n’omuntu ondiijo otari ou turi nawe omu bushwere. (Yob. 31:1) Twahikaanisa amagara gaitu n’ekigyendererwa kya Ruhanga, nitwija ‘kwangira kimwe ekibi’ kandi ‘tuhamire aha kirungi.’—Rom. 12:2, 9.

11. Okutaho omuntu omusya nikibaasa kuhamya kita obushwere?

¹¹ Omuntu otaireho omuntu omusya naayoreka emitwarize erikushushana n’ey’ogwo ‘Owamuhangire,’ Yehova. (Kol. 3:10) Omushaija n’omukazi we nibatunga emigisha mingi baayerinda barikujwara “omutima gw’esaasi, embabazi, okutwaza gye, obucureezi n’okugumisiriza”! (Kol. 3:12) Kandi nibeeyongyera kugira obumwe omu bushwere baikiriza ‘obusingye bwa Kristo kutegyeka omu mitima yaabo.’ (Kol. 3:15) Ka nikigaruramu amaani abashweraine ‘baakundana buzima’! Nikibareetera kushemererwa baaba nibo baabanza kuha abandi “ekitiinisa.”—Rom. 12:10.

12. Ni mitwarize ki emikuru erikubaasa kureetera obushwere kubamu okushemererwa?

¹² Sid ku baamubuurize emitwarize erikureetera obushwere kubamu okushemererwa, akagira ati: “Rukundo, nigwo mutwarize mukuru ogu tutwire nituteeraho kugira. Kandi tushangire ngu okutwaza gye nakwo ni kukuru munonga.” Omukazi we, Sonja, naikirizana nawe, ayongyeraho ati:  “Embabazi hatariho kubanganisa n’omutwarize mukuru. Kandi tuteireho kworeka obucureezi, n’obu kiraabe obumwe kitoorobi.”

13. Niki ekirikureetera obushwere kuhama, kandi n’ahabw’enki?

¹³ Emigambire mirungi hatariho kubanganisa ni kikuru omu kuhamya obushwere. Ka nikiba kiri eky’obusaasi munonga abashweraine baaba nibagambirana nk’abarikugambira ou batarikumanya nari enyamaishwa! Abashweraine baagambirana baine “obushaarizi bwona, n’okuguubwa kubi n’oruyombo n’okujumiirana,” mporampora omukago gwabo omu bushwere nigufa. (Efe. 4:31) Omu mwanya gw’okushiisha obushwere bwabo barikuguma nibagambirana kubi, baine kuhamya omukago gwabo barikukoresa ebigambo by’embabazi na rukundo.—Efe. 4:32.

14. Ni bikorwa ki ebi twine kwetantara?

¹⁴ Baibuli neegira ngu hariho “obunaku bw’okuhunama.” (Mub. 3:7) Eki tikirikumanyisa ngu turekyere aho kugamba n’abu turi nabo omu bushwere, ahakuba okugaaniira ni kukuru omu bushwere. Omukazi omwe omuri Germany oshweirwe, naagira ngu omu mbeera nk’ezo, okuhunama nikubaasa kusaasa ou ori nawe omu bushwere. Kwonka, naayongyeraho ati: “N’obu kiraabe kitoorobi butoosha kuguma ocureire waaba oine obujune, nikiba kitari kirungi kufa kugambira eryo. Waagambira eryo, noobaasa kugambira ou ori nawe omu bushwere ekirikumusaasa kandi embeera eyeyongyere kuba mbi.” Omushaija n’omukazi we tibarikushoboorora oburemeezi bwabo barikugambirana kubi nari barikwanga kugaaniira hamwe. Omu mwanya gw’ekyo, nibahamya obushwere bwabo, baacwamu kumaraho okutaikirizana ahonaaho kutakarugiremu okutongana.

15. Okugaaniira kurungi nikuhamya kuta obushwere?

¹⁵ Obushwere nibuhama abashweraine baagira obwire bw’okugaaniira aha  nyehurira zaabo n’ebiteekateeko byabo. Oku turikugamba ekintu ni kikuru kwingana n’ebi turikugamba. N’ahabw’ekyo, n’omu mbeera ezigumire, teeraho kugamba omu muringo gw’embabazi, orikukyoreka omu bigambo ebi orikukoresa hamwe n’eiraka. Waakora otyo, nikiija kworobera ou ori nawe omu bushwere kukuhurikiza. (Shoma Abakolosai 4:6.) Omushaija n’omukazi we nibabaasa kuhamya obushwere bwabo baagaaniira barikukoresa ebigambo birungi ebirikwombeka kandi ebirikubagasira bombi.—Efe. 4:29.

16, 17. Ahabw’enki kiri kikuru kuhaana ekishemeire omu bushwere?

¹⁶ Kandi abashweraine nibabaasa kuhamya obushwere bwabo barikwebembeza ebyetengo by’abakundwa baabo omu mwanya gw’ebyabo. (Fil. 2:3, 4) Omushaija nari omukazi aine kufayo aha nyehurira n’ekyetengo ky’okwenda kuteerana ekya mugyenzi we.—Shoma 1 Abakorinso 7:3, 4.

¹⁷ Eky’obusaasi, abamwe tibarikwenda kworeka abu bari nabo omu bushwere ngu nibabakunda nari kuhikiiriza ekyetengo kyabo eky’okuteerana. Baibuli neegira eti: “Naimwe abashaija, mugume mutyo n’abakazi baanyu, nk’abarikwetegyereza ebishemeire.” (1 Pet. 3:7) Omushaija aine kwetegyereza ngu ekishemeire omu bushwere nikitwariramu ekirikukira aha kuteerana. Ashemereire kuba naakunda omukazi we kandi arikumufaho obwire bwona. Bwanyima omukazi naabaasa kushemererwa baaba nibateerana. Bombi baayoreka ngu nibakundana kandi nibafaanaho, nikiija kuboorobera kwigutsa ebyetengo byabo eby’omubiri hamwe n’enyehurira zaabo.

18. Abashaija n’abakazi baabo nibabaasa kuhamya bata obushwere bwabo?

¹⁸ N’obu haraabe hatashemereire kubaho rwekwatso y’okutaba mwesigwa omu bushwere, okutafaanaho nikubaasa kureetera omushaija nari omukazi kusherura ondiijo oraamukunde. (Enf. 5:18; Mub. 9:9) N’ahabw’ekyo, Baibuli neehiga abashweraine eti: “Murekye kwimana, kureka mwaba muragaine omwanya, ngu mubone kwehayo omu kushaba, bwanyima mugarukye kuba hamwe, Sitaane arekye kubategyesa okuteezibira kwanyu.” (1 Kor. 7:5) Ka nikiba kiri eky’akabi munonga abashweraine kwikiriza “okuteezibira kwanyu” kubareetera kugwa omu kwohibwa kandi mukashambana! Buzima, buri omwe aha bashweraine yaareka, “kwesherurira ebye ahabwe,” beitu akasherura “eby’okuhwera mutaahi we” kandi akaha mutaahi we ekishemeire omu bushwere, obushwere bwabo nibubaasa kuhama.—1 Kor. 10:24.

19. Tushemereire kumariirira kukora ki, kandi ahabw’enki?

¹⁹ Turi haihi kutaaha omu nsi ensya ey’okuhikiirira. Niyo nshonga ahabw’enki okwenda kwigutsa ebyetengo kirikubaasa kuba eky’akabi ahariitwe nk’oku kyabaire aha Baisraeli 24,000 omu Mpita za Moabu. Ekigambo kya Ruhanga bwanyima y’okugamba ekyabaireho, nikirabura kiti: “Orikuteekateeka ngu ayemereire ayerinde atagwa.” (1 Kor. 10:12) N’ahabw’ekyo ka nikiba kiri kikuru, kuhamya obushwere bwaitu turikuguma turi abeesigwa ahari Tataitwe ow’omu iguru n’abu turi nabo omu bushwere. (Mat. 19:5, 6) Okukira oku kyabaire kiri ira, twine ‘kwezirika akatushanga twine obusingye, tutaine ibara ribi n’obu kaakuba akamogo omu maisho ge.’—2 Pet. 3:13, 14.