Mbwenu shi Ruhanga naija kureka abantu kuguma nibanyangaraza bagyenzi baabo kireetere abantu kuteekateeka ngu ebiro by’omumaisho nibiija kuba bibi? Ngaaha, nk’oku twaba twareebire, naija kutaaha omu nshonga kumaraho obusaasi n’okubonabona ebitwireho emyaka mingi. Omuhangi w’abantu n’ensi naayenda ngu omanye ku ari haihi kukora eki. Eki naakitworeka ata?

Teekateeka aha ky’okureeberaho eki: Waaba ori aha rugyendo orikukoresa emotoka, noobaasa kubanza waaza aha Intaneeti, kureeba maapu, n’obuhabuzi obundi obuhandiikirwe. Reero ku orikureeba obumanyiso n’ebyapa ebirikuhikaana n’endagiriro ei oine, noogira amatsiko omanya ngu ori haihi kuhika ei orikuza. Nikyo kimwe, Ruhanga atuhaire Ekigambo kye Baibuli, ekirikutushoboororera ebirikuba omu nsi. Ku turikureeba obumanyiso obu nibuhikiirira, nitukihamya ngu turi omu bwire bw’emperu.

Baibuli neeshoboorora ngu ebyafaayo by’ensi nibiija kuhika aha bwire bw’omutaano emperu yaaba eri haihi kuhika. Obunaku obwo bukaba nibwija kutwariramu embeera zitari zimwe na zimwe ezirikutaana ahari zoona eziraabaireho omu byafaayo. Yetegyereze bumwe aha bumanyiso oburikugambwaho omu Kigambo kya Ruhanga.

1. OBUTABANGUKO OMU NSI YOONA Obunabi oburi omu Matayo eshuura 24 nibworeka ebintu ebyabaire nibiija kuba biri omu nsi ebirikutwarirwa omu kamanyiso k’emperu. Akamanyiso ako kakaba nikiija kworeka ‘obu ensi egi erihwaho’ n’obunaku obu “emperu erihika.” (Omushororongo 3, 14) Ebiri omu kamanyiso nibitwariramu entaro, eibura ry’eby’okurya, emitsitsa omu myanya etari emwe n’emwe, okukanya kw’obugomi, okutabaho rukundo, n’abanyadiini kuhabisa abantu. (Omushororongo 6-26) Buzima, ebintu nk’ebyo bitwire nibibaho kumara emyaka mingi. Kwonka emperu yaaba neirira haihi, byona nibiija kweyongyera kubaho. Nihaija kukurataho ebindi bintu bishatu.

2. EMITEEKATEEKYERE Y’ABANTU Baibuli neegira ngu “omu biro by’aha mperu,” obunaku oburatuhitsye aha mperu, emiteekateekyere y’abantu neija kusiisikara. Nitushoma tuti: “Ahakuba abantu baryaba abarikwekunda, abakunzi b’empiiha, abanyamaryo, abarikwemanya, abarikujumiirana, abarikugomera abazaire baabo, entasiima, abatarikwera, abatarikukunda baabo, abatarikwenda kugarukana n’abandi, abarikubeihererana, abatarikweyangisa, enshaarizi, abarikwanga ebirungi, abarikureebyana, engangaazi, abarikwekuza, abarikukunda kweshemeza bonka okukira Ruhanga.” (2 Timoseo 3:1-4) N’amazima, abantu okutahaana kitiinisa ti kisya, kwonka “omu biro by’aha mperu” emiteekateekyere nk’egyo ekaba neija kweyongyera kusiisikara reero obunaku obwo bwetwe ‘ebiro by’akabi kaingi.’ Emiteekateekyere nk’egi noogireeba omu bantu?

3. OKUSIISIKARA KW’ENSI Baibuli neegira ngu Ruhanga naija ‘kuhwerekyereza abarikuhwerekyereza ensi.’ (Okushuuruurwa 11:18) Abantu shi bakaabaire nibacwekyereza bata ensi? Obunaku obu Noa yaabaire ari omu nsi nibugyeragyeranisibwa n’obwa hati: “Ensi ekaba esiisikaire omu maisho ga Ruhanga, eijwire eiraro. Ruhanga yaareeba ensi, kandi reeba, ekaba esiisikaire.” N’ahabw’ekyo Ruhanga akagira ati: “Ndyabahwerekyereza.” (Okutandika 6:11-13) Waayetegyereza obuhame oburikworeka oku ensi erikweyongyera kwijura obushaarizi? Okwongyera ahari ekyo, abantu bahikire omu bwire bw’omutaano omu byafaayo: Baine amaani g’okucwekyereza ensi barikumaraho kyona ekine amagara. Baine omu ngaro zaabo eby’okurwanisa ebirikubaasa kugicwekyereza. Kandi ensi neecwekyerezibwa omu muringo ogundi. Ebirikuhwera amagara kubaho omu nsi, nk’omwitsyo ogu  turikwitsya, okuhwerahwerana kw’enyamaishwa, enyanja empango, biriyo nibisiisikara ahabw’abantu kubikoresa kubi.

Yebuuze oti: ‘Emyaka erikurenga igana ehingwire abantu bakaba baine obushoboorozi bw’okushiisha ensi?’ Kwonka hati abantu nibakoresa obushoboorozi obwo barikukanyisa eby’okurwanisa by’amaani kandi bakashiisha n’obuhangwa. Okutunguuka omu tekinologiya nikureebeka nk’okurikukira okubaasa kw’abantu kuzibira ensi kucwekyerezibwa. Kwonka, abantu tibo barikucwamu oku ensi eshemereire kuba omu biro by’omumaisho. Ekintu kyona ekiine amagara omu nsi kitakahwaireho, Ruhanga naija kutaaha omu nshonga kucwekyereza abarikucwekyereza ensi. Eki nikyo arikuraganisa!

4. OMURIMO GW’OKUBUURIRA OMU NSI YOONA Ekintu kindi eky’akamanyiso k’emperu kikagamba aha murimo gw’omutaano ogwakubaire nigukorwa: “Kandi engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.” (Matayo 24:14) Omurimo gw’okubuurira ogu gukaba niguza kuba nigutaana aha nyegyesa z’ebishuba ezitwireho kumara emyaka mingi. Omu biro by’emperu, hakaabaireho obutumwa bukuru oburikuhamisirizibwa, nigo makuru g’obukama. Haine ediini ei orikumanya erikubuurira amakuru ago ag’Obukama? N’obu bamwe baraabe nibeetwara nk’abarikubuurira obutumwa nk’obwo, nibakikora owaabo honka, nari bajanjaize amakuru aga “omu nsi zoona okuba eky’okuhamya aha mahanga goona”?

Omukura www.mt1130.com nagwo niguta omutima aha makuru marungi g’Obukama. Ebitabo ebiriho nibishoboorora amakuru ago omu ndimi ezirikurenga 700. Hariho ogundi mukura ogu orikumanya ogurikuta omutima aha makuru marungi g’Obukama omu nsi yoona? Ira Intaneeti etakabaireho, Abajurizi ba Yehova bakaba nibamanywa ahabw’okuteeraho kwabo kujanjaaza amakuru marungi agarikukwata aha Bukama bwa Ruhanga. Kuruga 1939, aha Munaara gw’Omurinzi nihaba hariho ebigambo ebi “Ogurikuranga Obukama bwa Yehova.” Ekitabo kimwe ekirikuhandiika aha diini kikagira ngu omurimo gw’okubuurira gw’Abajurizi ba Yehova gutwire “gutarikubaasa kwehangwa omu buhango n’okujanjaara.” Okubuurira oku nikuta omutima aha makuru marungi ngu juba ‘emperu neija kuhika’ erikureetwaho Obukama bwa Ruhanga.

Waayetegyereza ngu ebintu bina ebirikugambwaho omu Baibuli ebirikushoboororwaho omu  kicweka eki bitwire nibibaho omu bunaku bwaitu? Okumara emyaka erikurenga igana, omunaara ogu gutwire niguhwera abarikugushoma kumanya ebirikubaho omu nsi kubahwera kwetegyereza ngu emperu eri haihi. Kwonka abamwe abarikubangaanisa tibarikwikiriza, nibagira ngu obuhame n’emibaro nibirugiirira aha biteekateeko by’abantu kandi ngu nibenda ngu abantu babiikirize. N’obu kiraabe kiri kityo, hariho obuhame oburikuguma nibweyongyera ngu turi haihi n’emperu y’omutaano omu byafaayo by’abantu.

Abahangu abamwe nibateekateeka ngu hari haihi kubaho empindahinduka z’amaani omu nsi egi. Nk’eky’okureeberaho, omu 2014, orupapura rw’amakuru orurikwetwa Bulletin of the Atomic Scientists rukarabura Akakiiko k’eby’Okwerinda ak’Amahanga Ageteeraine aha kabi k’amaani akaraahikye aha abantu. Abanyasayansi bakagira bati: “Twashwijuma gye akabi aka nitubaasa kuhamya ngu oburemeezi oburikureetwaho tekinologiya n’obw’amaani.” Abantu baingi nibahamya ngu turi omu bunaku bukuru omu byafaayo by’ensi. Abaateire magaziini egi n’abantu nyamwingi abarikugishoma, hatariho kubanganisa nibahamya ngu ebi n’ebiro by’emperu kandi ngu emperu eri haihi. Omu mwanya gw’okutiina ebiro by’omumaisho, noobaasa kugira okushemererwa oine ekihika aha biraarugyemu. Ahabw’enki? Ahabw’okuba noija kuhonokaho!