OMUTWE OGURI AHA MUNAARA | OKUZOOKA
Hariho Amatsiko Ahabw’Abaafiire?
Abafu nibabaasa kugaruka kubaho?
EKI BAIBULI ERIKUGARUKAMU: “Mutatangaarira eki; ahakuba obunaku nibwija, abari omu bituuro boona obu barihurira eiraka [rya Yesu], bakarugamu.”—Yohaana 5:28, 29.
Yesu akagamba aha bunaku obu ebituuro biraigurwe. “Omurundi gw’okubanza obu naashoma Yohaana 5:28, 29,” nkatangaara, Fernando owaaba yaagambirweho niko yaagizire. “Nkagira amatsiko agaabuzima, reero naatandika kuteekateeka aha biro by’omumaisho nyine emiteekateekyere mirungi.”
Yobu omushaija omwesigwa owa ira, akaba naamanya ngu Ruhanga naija kumuzoora naagaruka naagira amagara. Akabuuza ati: “Omuntu ku afa, agaruka abaho?” Reero yaagarukamu n’obumanzi ati: “Ebiro byangye byona ebyanteereirweho nkaabigumisiririza, ntegyereza obunaku bwangye [obwire omu Kituuro] bw’okurekurwa. Ku waakuunyeta, nkaakwetaba.”—Yobu 14:14, 15.
Okuzooka kwa Laazaaro nikutuha amatsiko aha biro by’omumaisho
Okuzooka kikaba kitari kiteekateeko kisya ahari Laazaaro munyaanya wa Mariza. Bwanyima ya Laazaaro kufa, Yesu akagambira Mariza ati: “Munyaanyoko naija kuzooka.” Mariza akagarukamu ati: “Nimmanya ku arizooka aha kuzooka okw’aha mperu.” Yesu reero akamugarukamu ati: “Niinye kuzooka n’amagara; orikunyikiriza n’obu yaakufa, aryaba ohuriire.” (Yohaana 11:23-25) Yesu akazoora Laazaaro! Eki nikituha amatsiko aha biro by’omumaisho. Teera akashushani okuzooka kurikubaho omu nsi yoona!
Hariho abaraazookye kuza omu iguru?
EKI BAIBULI ERI KUGARUKAMU: Ekigambo kya Ruhanga nikigira ngu okuzooka kwa Yesu kukaba nikutaana n’okw’abandi munaana abarikugambwaho omu Baibuli. Abantu munaana abo bakazookyera aha omu nsi. Kwonka ebikwatiraine n’okuzooka kwa Yesu, nitushoma tuti: “Yesu Kristo . . . owaagiire omu iguru, ari aha rubaju rwa Ruhanga.” (1 Petero 3:21, 22) Mbwenu shi Yesu niwe yaabaire naija kuzooka kuza omu iguru wenka? Enyimaho Yesu akaba yaagambiire entumwa ze ati: “Ku ndaabe ninza kubashemereza omwanya, ndyagaruka aha, mbatware ei ndi; okwo ei ndi, naimwe mube niyo mwatuura.”—Yohaana 14:3.
Kristo akaza omu iguru yaatebeekanisiza bamwe aha beegi be. Abo abarikuzooka kuza omu iguru nibaija kuhika 144,000. (Okushuuruurwa 14:1, 3) Kwonka shi abaraaze omu iguru nibaija kukorayo ki?
Nibaija kuba baine eby’okukora baingi! Ebyahandiikirwe nibigira biti: “Omuntu owaatungire omugabo omu kuzooka okwo okw’okubanza aine omugisha kandi n’orikwera. Abari nk’ogwo okufa kwa kabiri tikubaineho bushoboorozi; kureka baryaba abanyamurwa ba Ruhanga na Kristo, bategyekye nawe okumara emyaka rukumi.” (Okushuuruurwa 20:6) Abaraazookye kuza omu iguru nibaza kutegyeka na Kristo nk’abagabe n’abanyamurwa barikutegyeka ensi.
Ni baahi abarikwija kuzooka bwanyima?
EKI BAIBULI ERI KUGARUKAMU: Ebyahandiikirwe birimu ebigambo ebyagambirwe entumwa Paulo ebi: “Nyine amatsiko ahari Ruhanga, nk’oku nabo barikwikiriza, ngu haryabaho okuzooka kw’abahikiriire n’abatahikiriire.”—Ebyakozirwe 24:15.
Ekigambo kya Ruhanga nikituhamiza ngu obuhumbi bw’abantu abaafiire nibaija kuzooka
Ni baahi abarikwija kutwarirwa omuri abo abu Paulo yaayetsire “abahikiriire”? Teekateeka aha ky’okureeberaho eki. Danieli omushaija omwesigwa ari haihi kufa akagambirwa ati: “Bwanyima oryahuumura, oyemerere omu mwanya ogwakuteereirweho, aha muheru gw’ebyo biro.” (Danieli 12:13) Danieli naija kuzookyera nkahi? Baibuli neegira eti: “Abahikiriire baryahungura ensi, bagituuremu ebiro byona.” (Zaaburi 37:29) Kandi Yesu akagira ati: “Baine omugisha abacureezi; ahabw’okuba abo baryahungura ensi.” (Matayo 5:5) Danieli n’abashaija abandi abeesigwa nibaija kuzooka kugaruka kutuura omu nsi ebiro byona.
Ni baahi abarikwija kutwarirwa omuri abo abu Paulo yaayetsire “abatahikiriire”? N’obuhumbi bw’abantu abaabaire bariho kandi bakafa, baingi aharibo abataratungire omugisha gw’okwetegyereza amazima kandi bakagagyenderaho. Bwanyima y’okuzooka, nibaija kutunga omugisha gw’okumanya Yehova * na Yesu. (Yohaana 17:3) Abo boona abarikucwamu kuheereza Ruhanga nibaija kutunga amatsiko g’okutuuraho ebiro byona nka Yehova.
Abo boona abarikucwamu kuheereza Ruhanga nibaija kugira amatsiko g’okutuuraho ebiro byona baine amagara marungi n’okushemererwa
Embeera omu nsi niziija kushusha zita?
EKI BAIBULI ERI KUGARUKAMU: Ruhanga “aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi.” (Okushuuruurwa 21:4) “Baryayombeka amaju, bagatuuremu; baryabyara emizaabibu, barye ebijuma byayo.”—Isaaya 65:21.
Teera akashushani orikutuura omu mbeera nk’ezo ori n’abakundwa baawe abaraazoorwe! Kwonka ekibuuzo kiri ngu, noobaasa kuhamya ota ngu okuzooka nikwija kubaho?
^ rup. 15 Yehova n’eiziina rya Ruhanga nk’oku ririkworekwa omu Baibuli.
