OMUSINGYE GWA BAIBULI: “Ku haraabe hariho oine eki arikufa na mugyenzi we, musaasirane; nk’oku Mukama yaabasaasiire, mube nikwo mwatwaza.”—Abakolosai 3:13.

Eki nikimanyisa ki? Omu Baibuli, ekibi nikigyeragyeranisibwa n’eibanja kandi okusaasira ni nk’okushazamu eibanja. (Luka 11:4) Okucondooza kumwe nikugira ngu omu Byahandiikirwe eby’Orugriika ekigambo ekirikuvunuurwa ‘nk’okusaasira’ nikimanyisa “okwehuzya eibanja, okareka kuriihuza.” N’ahabw’ekyo, twacwamu kusaasira omuntu otukozire kubi, nituba tutarikuteekateeka ngu naija kugira eki yaatuha. Okuba tweteekateekire kusaasira tikirikumanyisa ngu nitushwekyerera ebikorwa bibi nari ngu eki batushobeize ti ky’amaani. Beitu, nitucwamu kutagira enziika, n’obu twakuba twine enshonga ehikire kutureetera kwetomboita.

obwengye obu nibukora obunaku obu? Nk’abantu abatahikiriire, twena nitushiisha. (Abarooma 3:23) N’ahabw’ekyo nikiba kihikire kusaasira abandi, ahakuba naitwe nitubaasa kwija kwenda ngu abandi batusaasire. Kandi, twacwamu kusaasira naitwe nitugasirwa. Mu muringo ki?

Twaguma twine ekiniga kandi tubikire enziika tukanga kusaasira, nituba nitwesaasa. Enyehurira nk’ezo nizitumaraho okushemererwa, n’ez’akabi aha magara gaitu, kandi nizitureetera enaku. Nizibaasa kuba ez’akabi aha magara gaitu. Omushaho orikwetwa Yoichi Chida hamwe n’Omuhangu aha biteekateeko n’emitwarize y’abantu Andrew Steptoe, barikuhandiika omu katabo Journal of the American College of Cardiology, bakagira bati: ‘Okucondooza okuherize kukorwa nikworeka ngu ekiniga n’okugira enziika nibirugamu endwara z’omutima.’

Kwonka, yetegyereze ebirungi ebiri omu kusaasira. Ku turikusaasira abandi, nitugira obumwe n’obusingye, turinda n’emikago. Ekirikukira obukuru, nitworeka ngu nitutooreza Ruhanga orikusaasirira kimwe abasiisi abarikweteisa kandi orikwenda ngu naitwe tusaasire abandi.—Mako 11:25; Abaefeso 4:32; 5:1.