Wataayaaya omu ihanga erindi omurundi gw’okubanza, nooshangayo abantu, emigyenzo, eby’okurya, n’esente ebi otamanyiriire. Buzima noobaasa kushoberwa.

Nikyo kimwe na waaba nootandika kushoma Baibuli. Ku orikuba nooshoma Baibuli nooshangamu ebintu ebya ira ebi otarikumanya. Nooshangamu abantu nk’Abafilistia, emigyenzo ‘nk’okutaagura ebijwaro,’ eby’okurya nk’emaanu, n’ekinushu ekirikwetwa rupiiha. (Okuruga 16:31; Yoshua 13:2; 2 Samueli 3:31; Luka 15:9) Ebi byona noobaasa kutabyetegyereza. Okushushana n’okutaayaaya omu ihanga erindi, torikushemererwa omuntu yaakuhwera akakushoboororera?

Kuruga obu ebyahandiikirwe ebirikwera byabanza kuhandiikwa omu kyasha 16, abantu batwire nibaheebwa obuhwezi kubyetegyereza. Nk’eky’okureeberaho, Musa, omwebembezi wa Israeli ow’okubanza, ‘akatandika kushoboorora’ ebyahandiikirwe.—Eky’Ebiragiro 1:5.

Bwanyima y’ebyasha nka ikumi abeegyesa b’Ebyahandiikirwe bakaba bakiriho. Omu gwa 455, Abayudaaya baingi otwariiremu n’abaana, bakeerundanira omu ndembo za Yerusaalemu. Abeegyesa ba Baibuli bakashoma “omu kitabo ky’Ebiragiro bya Ruhanga omu iraka eririkuhurirwa gye.” Kwonka bakongyera ‘baabishoboorora; abantu bayetegyereza ebyashomwa.’—Nehemia 8:1-8.

Bwanyima y’ebyasha bitano, Yesu Kristo nawe akeejumba omu murimo gw’okwegyesa abantu. Buzima, abantu bakaba nibamumanya nk’omwegyesa. (Yohaana 13:13) Akaba ayegyesa abantu baingi nari obundi omwe-mwe. Izooba rimwe, akegyesa abantu baingi, obu yaaha orubazo orurikumanywa nk’Orubazo rw’aha Rushozi, kandi “abantu baatangaarira okwegyesa kwe.” (Matayo 5:1, 2; 7:28) Aha kutandika kw’omwaka gwa 33, Yesu akagamba n’abeegi babiri obu baabaire nibaza omu kyaro ekiri haihi na Yerusaalemu, ‘yaabashuuruurira Ebyahandiikirwe.’—Luka 24:13-15, 27, 32.

Abeegi ba Yesu nabo bakaba abeegyesa b’Ekigambo kya Ruhanga. Izooba rimwe, omukungu kuruga Esiopia akaba naashoma ekicweka ky’Ebyahandiikirwe. Omwegi orikwetwa Filipo akamuhikaho yaamubuuza ati: “Nooshoborokyerwa ebi orikushoma?” Omuesiopia akamugarukamu ati: “Nimbaasa nta, ntaine w’okunshobororera?” Filipo akamushoboororera amakuru g’ebi yaabaire naashoma.—Ebyakozirwe 8:27-35.

Okushushana n’abeegyesa abarikugambwaho omu Baibuli aba ira, Abajurizi ba Yehova obunaku obu nibeejumba omu murimo gw’okwegyesa abantu Baibuli omu mahanga 239 omu nsi yoona. (Matayo 28:19, 20) Buri saabiiti nibahwera abantu abarikurenga obukaikuru mwenda kwetegyereza Baibuli. Baingi aha beegi abo nibaruga omu maka agatari Makristaayo. Okwegyesa oku n’okwa busha kandi abeegi nibabaasa kwegyera omu maka gaabo nainga hoona ahu barikwenda. Abamwe nibakunda kwegyera aha simu nari barikukoresa vidiyo ya kompyuta.

Nooshabwa kutaayaayira omwe aha Bajurizi ba Yehova kumanya ebirikukiraho oku orikubaasa kugasirwa omu ntebeekanisa egi. Noija kushanga ngu ebiri omu Baibuli, “biine omugasho gw’okwegyesa omuntu, n’okumuhana, n’okumuhabura, n’okumutendeka omu by’okuhikiirira, ngu omuntu wa Ruhanga abone kuba ohikire buzima, oine byona ebishemereire omurimo gwona omurungi.”—2  Timoseo 3:16, 17.