Baibuli neehiga abantu kuha beekundiire baine ekigyendererwa kirungi. Eki nikyoreka ngu okuha tikurikugasira ogwo owaaheebwa wenka beitu, nikugasira n’owaaha. (Enfumu 11:25; Luka 6:38) Yesu akagira ngu okuha nikureeta okushemererwa “okukira okuheebwa.”—Ebyakozirwe 20:35.

•  Ni ryari obu okuha kurikuba okw’omugasho?

•  Ni ryari obu okuha kurikuba kutahikire?

•  Ebyahandiikirwe ebirikugamba aha kuha

 Okuha nikuba okw’omugasho omuntu yaaha eyekundiire. “Omuntu weena akore, nk’oku amaririire omu mutima gwe,” Baibuli nikwo erikugira, “atarikunyoomwa nari akugyemwa, ahakuba Ruhanga akunda efura.”—2 Abakorinso 9:7.

 Okuha kuruga aha mutima n’omuringo ‘gw’ediini eshemeire’ ei Ruhanga arikusiima. (Yakobo 1:27) Omuntu orikuba efura akahwera abaine eki bakyenire, naaba naakora hamwe na Ruhanga, kandi obufura obwo Ruhanga naabureeba nk’eibanja eri aine kushashura. (Enfumu 19:17) Baibuli neeyegyesa ngu Ruhanga naija kushashura ogwo orikuha abandi.—Luka 14:12-14.

 N’obu omuntu arikuhayo aine ebigyendererwa by’okweyendeza. Eby’okureeberaho nibitwariramu:

•   Okwenda kushemeza abantu.—Matayo 6:2.

•   Okuha ngu naiwe baije bakugarurire.—Luka 14:12-14.

•   Okuteeraho kugura okujunwa.—Zaaburi 49:6, 7.

 Kwaba nikushagika emiteekateekyere nari ebikorwa ebi Ruhanga atarikusiima. Nk’eky’okureeberaho, nikiba kigwire kuha omuntu sente z’okuteera zaara, nari kukoresa kubi amaarwa nari emibazi. (1 Abakorinso 6:9, 10; 2 Abakorinso 7:1) Nikyo kimwe, nikiba kitahikire kuha omuntu esente orikubaasa kwebaisaho kwonka orikwanga kukora emirimo nkana.—2 Abatesalonika 3:10.

 Okuha kwaba nikutaahataaha omu bujunaanizibwa bw’omuntu obu yaahairwe Ruhanga. Baibuli neeyegyesa ngu emitwe y’amaka baine kukora aha byetengo by’ab’amaka gaabo. (1 Timoseo 5:8) Nikiba kitahikire omutwe gw’eka kuha abandi ebintu bingi akeehuzya ab’eka ye. Kandi, Yesu akahana abo abaabaire nibanga kureeberera abazaire baabo abakaikwire barikwekwatsa ngu ebintu byabo “n’ekihongyeirwe Ruhanga.”—Mako 7:9-13.