Yesu Akaba Naashusha Ki?
Eki Baibuli erikugarukamu
Tihaine orikumanya gye oku Yesu yaabaire naashusha, obu enshusha ye etarikugambwaho omu Baibuli. Eki nikyoreka ngu enshusha ye y’obuntu ekaba etari nkuru. Kwonka, Baibuli neetuhwera kuteeraho kumanya oku yaabaire naashusha.
Oruteero rwe: Yesu akaba ari Omuyudaaya n’ahabw’ekyo aine kuba yaabaire aine akarande ako kuruga ahari nyina. (Abaheburaayo 7:14) Nikireebeka endeebeka ye ekaba etari y’omutaano. Eizooba rimwe akabaasa kugyenda omu kihama yaaruga Galilaaya yaaza Yerusaalemu atamanyirwe. (Yohaana 7:10, 11) Kandi nangwa akaba atari n’ow’omutaano aha beegi be ab’aha mara. Ijuka ngu Iskaryota niwe yaamworekire abantu abaabaire baizire kumukwata.—Matayo 26:47-49.
Oburaingwa bw’eishokye rye: Eishokye rya Yesu, rishemereire kuba ryabaire ritari riraingwa, ahakuba Baibuli neegira ngu “omushaija okureka eishokye rye rikakura nikimuhemura.”—1 Abakorinso 11:14.
Ebireju: Yesu akaba aine ebireju. Akaba naakuratira ebiragiro by’Ekiyudaaya, ebyabaire nibizibira abashaija bakuru ‘kushiisha omu mbaju z’ebireju.’ (Abaleevi 19:27; Abagalatia 4:4) Kandi, Baibuli neegamba aha bireju bya Yesu omu bunabi oburikukwata aha kubonabona kwe.—Isaaya 50:6.
Omubiri: Obumanyiso bwona nibworeka ngu Yesu akaba aine omubiri gw’amaani. Omu buheereza bwe, akaba naagyenda mahiro nyingi. (Matayo 9:35) Akashemeza hekalu y’Abayudaaya emirundi ebiri, arikujuumika emeeza z’abarikuhaanisa esente, kandi obundi akabinga n’amatungo. (Luka 19:45, 46; Yohaana 2:14, 15) Ekitabo McClintock and Strong’s Cyclopedia nikigira kiti: “Enshoboorora y’abahandiiki b’engiri neeyoreka ngu [Yesu] akaba aine omubiri gutaine kamogo n’amagara marungi.”—Ekya IV, orupapura 884.
Endeebeka y’aha maisho: Yesu akaba naashemererwa kandi aine embabazi, kandi eki kiine kuba kyabaire nikireebwa aha amaisho ge. (Matayo 11:28, 29) Abantu b’emiringo yoona bakaba nibamusherura ngu abahuumurize kandi abahwere. (Luka 5:12, 13; 7:37, 38) N’abaana bakaba nibooroberwa kuba nawe.—Matayo 19:13-15; Mako 9:35-37.
Ebitahikire aha ku Yesu yaabaire naashusha
Ekitahikire: Abamwe nibagira ngu Yesu aine kuba yaabaire naakomooko omuri African ahabw’okugira ngu ekitabo ky’Okushuuruurwa nikigyeragyeranisa eishokye rye n’ebyoya by’entaama, n’ebigyere bye “nk’omuringa ogwokiibwe.”—Okushuuruurwa 1:14, 15, The New Jerusalem Bible.
Amazima: Ekitabo ky’Okushuuruurwa nikikoresa obumanyiso. (Okushuuruurwa 1:1) Enshoboorora y’eishokye rya Yesu n’ebigyere bye, eri omu muringo gw’akamanyiso kworeka emitwarize ya Yesu, bwanyima y’okuzooka kwe, beitu kutari oku yaabaire naashusha obu yaabaire ari omu nsi. Okushuuruurwa 1:14 okugira ngu “omutwe gwe n’eishokye rye bikaba nibyera nk’ebyoya by’entaama, nibyerera kimwe nk’orubaare,” nihagamba aha rangi y’eishokye rye beitu gutari omuringo gwaryo. Eki nikyoreka obwengye bwe ahabw’emyaka ye. (Okushuuruurwa 3:14) Omushororongo ogwo tigurikugyeragyeranisa omuringo gw’eishokye rya Yesu n’ogw’ebyoya by’entaama, nari nk’oku orubaare ruri.
Ebigyere bya Yesu bikaba “nibyengyengyeta nk’omuringa ogushemereziibwe omu iziiko.” (Okushuuruurwa 1:15) Kandi, n’aha maisho ge “hakaba nihamurinkana nk’eizooba eririkujwisa amaani.” (Okushuuruurwa 1:16) Obu hatariho erangi y’abantu erikuhikaana n’enshoboorora egi, eshemereire kuba eri ey’akamanyiso, erikworeka Yesu aherize kuzooka arikutuura ‘omu mushana ogutarikubaasa kuhikwaho.’—1 Timoseo 6:16.
Ekitahikire: Yesu akaba ari omunafu kandi omweremwa.
Amazima: Yesu akaba ari emanzi. Nk’eky’okureeberaho, akagira obumanzi bw’okweyoreka abaizire kumukwata. (Yohaana 18:4-8) Kandi Yesu aine kuba yaabaire aine amaani kubaasa kukoresa eby’emikono omu murimo gw’okubaija.—Mako 6:3.
Mbwenu shi ahabw’enki Yesu yaabaire naayenda obuhwezi kukiriza omuti gwe gw’okubonaboneraho? Kandi ahabw’enki yaatangire enkozi z’ebibi ezi yaahanikirwe nazo kufa? (Luka 23:26; Yohaana 19:31-33) Atakahanikirwe, omubiri gwe bakabanza baagumaramu amaani. Bakamuraaza naareeba ekiro kyona, barikwenda kumureetera obusaasi omu nyehurira. (Luka 22:42-44) Omu kiro ekyo, Abayudaaya bakamubonabonesa, kandi omu kasheeshe Abarooma nabo baayongyeraho. (Matayo 26:67, 68; John 19:1-3) Ebi bishemereire kuba byarahukize okufa kwe.
Ekitahikire: Yesu akaba atarikushemererwa, kandi atarikusheka.
Amazima: Yesu omu muringo oguhikiriire akooreka emitwarize nk’eya Yehova Ishe, ou Baibuli erikworeka ngu ni ‘Ruhanga orikwesiima.’ (1 Timoseo 1:11; Yohaana 14:9) Nangwa, Yesu akeegyesa abandi oku barikubaasa kushemererwa. (Matayo 5:3-9; Luka 11:28) Ebi nibyoreka ngu Yesu akaba naakira kuba ashemereirwe.
Noobaasa Kukunda n'Ebi
ENYEGYESA ZA BAIBULI ENKURU
Nitubaasa Kuhamya Tuta ngu Baibuli Ehikire?
Baibuli ku araabe yaahandiikirwe Ruhanga, eshemereire kuba etarikushushana n’ekitabo ekindi kyona ekirahandiikirwe.
EBIRIKUTUKWATAHO
Shaba Kutaayaayirwa Abajurizi ba Yehova
Gaaniira n’Abajurizi ba Yehova aha nshonga kuruga omu Baibuli, nari gyezaho kwejumba omu ntebeekanisa yaitu y’Okwega Baibuli otashashwire.