Menli mɔɔ yɛ neɛnleanu la ka kɛ, ahwea kola te bɛ gɔnwo twea nwo nvoanle na bɛnwu ɛvolɛ mɔɔ yeli, kɛ ɔle nyinli anzɛɛ belɛ yɛɛ kɛ ɔ nye ɛlie anzɛɛ yeva ɛya. Bɛkola bɛtete ahwea bɛmaa bɛte bɔmbo mgbole nee nyiletane nwo nvoanle. Yɛ nye titili a yɛfa yɛnwu mɔɔ ɛlɛkɔ zo wɔ ɛleka mɔɔ yɛwɔ la a, noko ahwea fa nvoanle mɔɔ bɛte la a nwu mɔ ɛlɛkɔ zo wɔ ɛleka mɔɔ bɛwɔ la a. Bɛfa bɛ bonyi “bɛkenga” debie.

Suzu nwo nea: Kɛzi twea te nvoanle la tɛla yɛ ɛdeɛ ne kolaa. U.S. National Institute of Standards and Technology ne kile a, “twea kola te debie mɔɔ wɔ moa moa kpalɛ la nvoanle. Ɔle kɛ asɛɛ wɔva asikyɛlɛ adɛlɛ ekyi ko wɔgua bula nu na twea ne kola te asikyɛlɛ ne fɛlɛko la.”

Duzu a maa twea kola te nvoanle zɔhane tɛla yɛ a?

• Twea bonyi ati le nzule, yemɔti ɔkola ɔkye debie nvoanle kpalɛ.

• Twea abonyi tokule le nwiɔ​—ɔfa ko ɔdie nwomenle yɛɛ ɔfa ko ɔte nvoanle. Saa twea nwuasi a, anwoma fa ɔ bonyi tokule ne mɔɔ ɔmaa ɔte nvoanle la anu.

• Twea abonyi le kpole, ye tɛtɛlɛ nee ye tendenle bayɛ sɛntimita 130 (20 sq in.) anzɛɛ mɔɔ bo, noko sonla ɛdeɛ le sɛntimita 5 (0.8 sq in.) pɛ.

• Ndinli mɔɔ wɔ twea bonyi nu mɔɔ maa ɔte nvoanle la bayɛ kɛyɛ sonla ɛdeɛ ne mɔnwo 50.

Ɛhye mɔ amuala boa twea ɔmaa ɔte ninyɛne ngakyile nvoanle. Kɛ neazo la, mbɔlɔba bie mɔ ka kɛ, yɛbahola yɛade subue nvoanle, noko twea bahola ade debie biala mɔɔ wɔ subue ne anu la nvoanle.

Mbɔlɔba bie mɔ mɔɔ yɛ kansa nwo neɛnleanu wɔ Pine Street Foundation anu la ka kɛ, twea adwenle nee ɔ bonyi bɔ nu yɛ gyima “ɔmaa ɔyɛ abɔdeɛ mɔɔ yɛ nwanwane mɔɔ te nvoanle kpalɛ wɔ aleɛabo a.” Abɔdeɛ nwo nrɛlɛbɛvolɛma ɛlɛyɛ ɛlɛtɔlɔneke “ɛbonyinlɛ” bie mɔɔ bahola ade bɔmbo, nyiletane yɛɛ ewule le kɛ kansa nwo nvoanle la.

Kɛzi ɛdwenle nwo ɛ? Asoo twea bonyi mɔɔ kola te nvoanle kpalɛ la luale ngakyihakyililɛ zo a rale a? Anzɛɛ awie a yɛle a?