Ngakula dɔɔnwo lɛ smatfonu, a na bɛ nuhua dɔɔnwo fa bɛ ɛdeɛ ne kɔ Yintanɛte ne azo wɔ mekɛ mɔɔ bɛvea bɛ sua ne anu la. Esiane boni a wɔ nu kɛ ɛbamaa ɛ ra ne anyia smatfonu a? Nvasoɛ boni mɔ a wɔ zo a? Mekɛ tendenle nyɛ a ɔwɔ kɛ ɛmaa bɛfa bɛdi gyima wɔ alehyenlɛ ne anu a?

•  Mɔɔ ɔwɔ kɛ ɛnwu ye la

•  Mɔɔ ɔwɔ kɛ ɛbiza la

•  Biza ɛ nwo saa wɔziezie ɛ nwo a

 Nvasoɛ Mɔɔ Wɔ Zo

•   Ngakula nyia anwobanebɔlɛ, awovolɛ anzo nu dwo bɛ. Ɛrɛladane bie mɔɔ bɛfɛlɛ ye Bethany mɔɔ lɛ ngakula nwiɔ la hanle kɛ: “Yɛde ewiade mɔɔ nuhua yɛ ɛzulolɛ la anu. Ɔhyia kɛ ngakula kola fɛlɛ bɛ awovolɛ.”

  Ɛrɛladane bie mɔɔ bɛfɛlɛ ye Catherine la noko vale bie zɔle zo. Ɔse, “Ɛkola ɛdua apps bie mɔ azo ɛkɔnɛte ɛ ra ne fonu na ɛnwu ɛleka mɔɔ ɔwɔ la. Saa ɔlɛka kale a, ɛkola ɛnwu speed mɔɔ ɔlɛkɔ la bɔbɔ.”

•   Ɔboa wɔ sukulu gyimayɛlɛ nu. Ɛrɛladane bie mɔɔ bɛfɛlɛ ye Marie la hanle kɛ, “Kilehilevolɛma dua e-mail nee tɛkese message zo maa ngakula ne mɔ gyimalilɛ yɛɛ ngakula ne mɔ noko kola nee bɛ di adwelie wɔ adenle ko ne ala azo.”

 Esiane Mɔɔ Wɔ Nu

•   Ɔdie bɛ mekɛ dɔɔnwo. Ngakula titili sɛkye dɔnehwele dɔɔnwo wɔ alehyenlɛ ne anu wɔ bɛ fonu ne mɔ anwo. Yɛɛ awovolɛ noko maa bɛ fonu ne mɔ die bɛ mekɛ kpalɛ tɛla mekɛ mɔɔ bɛfa bɛ nee bɛ mra di adwelie la. Abɔlɔba bie hanle kɛ, saa ɛkɔ awuke bie mɔ anu a, bɛle kɛ “nyɛvolɛ mɔɔ ɛboɔboa bɛ nloa wɔ ɛleka ko na bɛ nye gyigyi bɛ milahyinli zo la.” b

•   Nlanwonvoninli. Neɛnleanu bie lale ye ali kɛ ngakula mgbavolɛ nee mbɛlɛra mɔɔ wɔ ewiade la anu mɔɔ bo foa ko kpondɛ nlanwonvoninli wɔ yintanɛte ne azo siane biala. Ɛhye ɛnzi yɛ nwo, ɔluakɛ kɛkala ɔnyɛ se kɛ bɛbalua debie le kɛ smatfonu zo bɛanlea bie. Selɛ bie mɔɔ bɛfɛlɛ ye William mɔɔ lɛ ngakula nwiɔ la hanle kɛ, “Saa awovolɛ maa bɛ mra nyia smatfonu a, ɔle kɛ bɛ nye ɛnla nwo na bɛbuke nlanwonvoninli sotɔɔ bɛmaa bɛ mɔɔ bɛkola bɛnea bie wɔ ɛleka biala mɔɔ bɛwɔ la.”

•   Ɔgya bɛ. Menli dɔɔnwo ahonle la bɛ fonu ne azo kpalɛ. Saa ɔminli a, bɛ kunlu tete bɛ, bɛ nye zo ta bɛ yɛɛ bɛ nwo to bɛ bɔbɔ. Awovolɛ bie mɔ ɛnwu kɛ saa bɛ mra ne mɔ anye gyi bɛ fonu ne mɔ azo a, ɔmmaa bɛnla ɛbulɛ ali. Carmen hanle kɛ, “Ɔdwu mekɛ ne bie a mekulo kɛ me nee me ra nrenyia ne tendɛ, noko kɛmɔ ɔngulo kɛ megyegye ye la ati, ɔmunla ɔ nyunlu na ɔka edwɛkɛ bie mɔɔ ɛngile ɛbulɛ la.”

•   Esiane bieko mɔɔ wɔ nu. Esiane mɔɔ wɔ smatfonu mɔɔ bɛfa bɛdi gyima anu la a le yintanɛte zo apo ɛbɔlɛ nee nla nwo edwɛkɛ mɔɔ bɛfa bɛnwa bɛ la, na kɛmɔ bɛlɛfa bɛali gyima a bɛkpo bɛ nwo na bɛngola da la ati, ɔmaa bɛnyia kpɔkɛdelɛ nwo ngyegyelɛ dɔɔnwo. Ngakula bie mɔ noko fa “ghost app”​—app bie mɔɔ ɔzɔho kɛ edwɛkɛ ɛnle nwolɛ mɔɔ le kɛ calculator la​—di gyima fa ninyɛne mɔɔ bɛngulo kɛ bɛ awovolɛ nwu ye la sie.

   Daniel, selɛ bie mɔɔ lɛ ɔ ra kakula bɛlɛra la hanle ye wɔ adenle ɛhye azo kɛ: “Smatfonu buke nwolɛ adenle maa bɛnwu ninyɛne mɔɔ wɔ yintanɛte ne azo la​—mɔɔ le kpalɛ nee ɛtane la.”

•   ‘Asoo me ra ne hyia smatfonu?’

   Baebolo ne ka kɛ: “Sonla mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.” (Mrɛlɛbulɛ 14:15) Ɛhye ati, biza ɛ nwo kɛ:

   ‘Asoo banebɔlɛ nee ninyɛne bie mɔ ati ɔwɔ kɛ me ra ne nyia smatfonu ɔ? Mezuzu nvasoɛ nee esiane mɔɔ wɔ nu la anwo ɔ? Saa meammaa ye smatfonu a, fonu gyɛne boni a mebahola meava meamaa ye a?’

   Selɛ bie mɔɔ bɛfɛlɛ ye Todd la hanle kɛ, “Fonu gyɛne mɔɔ ɛnle smatfonu la dɔɔnwo wɔ ɛkɛ na ɛbahola wɔalua zo wɔava edwɛkɛ wɔanwa ra ne anzɛɛ ɛ nee ye adendɛ. Eza ɔnrɛmaa ɛnrɛbɔ kakɛ dɔɔnwo.”

•   ‘Asoo me ra ne ɛziezie ɔ nwo ɛmaa ɛzonlelilɛ mɔɔ wɔ nwolɛ la?’

   Baebolo ne ka kɛ: “Nrɛlɛbɛvolɛ ahonle maa ɔfa adenle kpalɛ zo.” (Nolobɔvo 10:2) Ɛhye ati, biza ɛ nwo kɛ:

   ‘Duzu a maa menwu kɛ mebahola mealie me ra ne meali a? Mekola me nee ye bɔ adawu kpalɛ ɔ? Asoo dahuu me ra ne ka nɔhalɛ kile me, kɛ neazo la, ɔmaa menwu ɔ gɔnwo mɔ ɔ? Saa ɔlɛnea TV, ɔlɛfa tabelɛte anzɛɛ laptop nee ninyɛne gyɛne yeali gyima a, ɔkola ɔkomo ɔ nwo zo ɔ?’ Ninli bie mɔɔ bɛfɛlɛ ye Serena la hanle kɛ, “Smatfonu boa kpalɛ, noko esiane dɔɔnwo wɔ nu. Suzu ɛzonlelilɛ mɔɔ ɛlɛfa wɔado ɛ ra ne anwo zo wɔ ye ngakula nu la anwo nea.”

•   ‘Meziezie me nwo memaa ɛzonlelilɛ ne ɔ?’

   Baebolo ne ka kɛ: “Tete kakula wɔ adenle mɔɔ ɔwɔ kɛ ɔfa zo la anu.” (Mrɛlɛbulɛ 22:6) Ɛhye ati, biza ɛ nwo kɛ:

   ‘Asoo meze fonu ne anwo edwɛkɛ dɔɔnwo mɔɔ mebahola meava meaboa me ra ne amaa yeandɔ esiane nu ɔ? Asoo meze ninyɛne mɔɔ ɔwɔ kɛ awovolɛ yɛ wɔ bɛ mra fonu zo amaa bɛandɔ esiane nu la yɛ ɔ? Kɛ ɔkɛyɛ na meaboa me ra ne meamaa yeazi kpɔkɛ kpalɛ wɔ mekɛ mɔɔ ɔlɛfa fonu ne yeali gyima la ɛ?’ Selɛ bie mɔɔ bɛfɛlɛ ye Daniel mɔɔ yɛlimoa yɛha ɔ nwo edwɛkɛ la hanle kɛ, “Menwu awovolɛ dɔɔnwo mɔɔ bɛfa smatfonu bɛwula bɛ mra ne mɔ asa anu a, yemɔ ala ɛne.”

 Nɔhalɛ edwɛkɛ: Ɔhyia kɛ bɛtete ngakula amaa bɛahola bɛava smatfonu bɛali gyima kpalɛ. Indistractable buluku ne hanle kɛ, “Ngakula dɔɔnwo sɛkye mekɛ dɔɔnwo wɔ bɛ smatfonu ne mɔ anwo na bɛngola bɛnyɛ nwolɛ ɛhwee, titili saa awovolɛ ne mɔ ɛnze mɔɔ bɛ mra ne mɔ ɛlɛyɛ la anzɛɛ bɛnva nwolɛ adehilelɛ bɛmmaa bɛ a.”