Agyalɛma bie mɔ mɔɔ bɛ nloa ɛnzɛ bɛ nwo la ka kɛ bɛbɔ ewole a ɔbaboa bɛ mra ne mɔ​—ɔle kpalɛ ɔtɛla kɛ bɛ nee awovolɛ mɔɔ bɛnga la badɛnla. Nɔhalɛ boni a wɔ edwɛkɛ ɛhye anu a?

•  Kɛzi ewolebɔlɛ ka ngakula ɛ?

•  Saa mebɔ ewole a asoo me ra ne anye balie ɔ?

•  Duzu a ɔwɔ kɛ menwu ye wɔ menli nwiɔ mɔɔ tete kakula la anwo a?

•  Bɛbahola bɛalua adenle kpalɛ zo bɛali nwolɛ gyima ɔ?

Neɛnleanu maa ɔda ali kɛ ewolebɔlɛ gyegye ngakula kpalɛ. Ngakula mɔɔ bɛ awovolɛ ɛbɔ ewole la bie a:

•   fa ɛya, dwenledwenle, na bɛ rɛle bɔ

•   da subane ɛtane ali

•   ɛmbɔ mɔdenle wɔ sukulu anzɛɛ bɛgyakyi

•   ɛngyɛ na bɛ nwo ado bɛ

 Bieko, ngakula bie mɔ bua bɛ nwo fɔlɛ, bɛnyia adwenle kɛ bɛdabɛ a bɛmaanle bɛ awovolɛ bɔle ewole a yɛɛ anrɛɛ bɛbahola bɛazi ye adenle.

 Ngyegyelɛ mɔɔ ngakula mɔɔ bɛ awovolɛ ɛbɔ ewole nyia la kola ka bɛ wɔ mekɛ mɔɔ bɛyɛ mgbanyinli la, bie a bɛnlie bɛ nwo nee awie mɔ bɛnli. Yɛɛ saa bɛdabɛ noko bɛyia ngyegyelɛ wɔ agyalɛ nu a, bɛta bɛbɔ ewole.

 Nɔhalɛ edwɛkɛ: Agyalɛma bie mɔ mɔɔ kulo kɛ bɛbɔ ewole la ka kile bɛ nwo kɛ yemɔ baboa bɛ mra ne mɔ. Noko neɛnleanu mɔɔ bɛyɛ la ɛngile zɔ. Penelope Leach mɔɔ ze ngakula nwo edwɛkɛ kpalɛ la hɛlɛle kɛ, “Ewolebɔlɛ maa ngakula nwo yɛ alɔbɔlɛ kpalɛ.” a

 Baebolo ngyinlazo: “Bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”​—Felepaema 2:4.

 Bie mɔ baha kɛ ɛhɛe. Noko, kakye kɛ ngakula ngyianlɛ nee awovolɛ ɛdeɛ ɛnle ko. Ahenle mɔɔ kulo kɛ bɔ ewole la kpondɛ kɛ ɔbɔ ɛbɛla fofolɛ bo. Kakula ne kulo kɛ ye awovolɛ bɔ nu tɛnla na ɔngulo kɛ bɛbɔ ewole.

 Mekɛ mɔɔ menli mɔɔ hɛlɛle The Unexpected Legacy of Divorce buluku ne nleɛnleanle ewolebɔlɛ apenle dɔɔnwo anu wiele la, bɛhɛlɛle kɛ: “Mɔɔ yɛyɛ ye nzonlɛ la ɛne: ngakula ne mɔ ɛnga kɛ bɛ nye die. Emomu, bɛka ye peenyi kɛ, ‘Kenle mɔɔ bɛ awovolɛ bɔle ewule la, bɛ nye anlie bieko wɔ bɛ ngakula nu.’” Buluku ne doale zo kɛ, “Bɛte nganeɛ kɛ bɛnlɛ banebɔlɛ ɔluakɛ menli mɔɔ bikye bɛ kpalɛ la avinli ɛtete.”

 Nɔhalɛ edwɛkɛ: Ngakula awovolɛ bɔ ewole a, bɛ nye ɛnlie.

 Baebolo ngyinlazo: “Sunsum mɔɔ ɛbubu la maa sonla anwosesebɛ wie.”​—Mrɛlɛbulɛ 17:22.

 Menli mɔɔ ɛbɔ ewole la bie mɔ bɔ mɔdenle kɛ bɛbabɔ nu bɛatete bɛ ra ne kɛ asɛɛ agyalɛma la. Noko, ɛhye ɛyɛlɛ ɛnla aze. Neɛnleanu maa ɔda ali kɛ menli mɔɔ bɔ ewole la:

•   ɛnnyia mekɛ ɛmmaa bɛ mra

•   adwenle ɛnyɛ ko wɔ kɛzi bɛtete bɛ mra ne la anwo

•   maa bɛ mra yɛ debie biala mɔɔ bɛkulo la ɔluakɛ bɛ adwenle bua bɛ fɔlɛ anzɛɛ bɛfɛ la ati

 Kakula mɔɔ ye awovolɛ ɛbɔ ewole la te nganeɛ kɛ ɔngyia kɛ ɔtie ye awovolɛ. Ɔnwu ye kɛ ye awovolɛ anyɛ ninyɛne mɔɔ le kpalɛ la, bɛambɔ mɔdenle bɛammaa bɛ agyalɛ ne angyinla. Ɔti bie a kakula ne banyia adwenle kɛ, ‘Nzɔne ati a ɔwɔ kɛ metie bɛ a?’

 Nɔhalɛ edwɛkɛ: Ɔnla aze kɛ agyalɛma mɔɔ ɛbɔ ewole la babɔ nu anlea bɛ ra. Noko, tɛnlabelɛ ne ɛnla aze fee ɛmmaa ngakula.

 Baebolo ngyinlazo: “Bɛmmaka bɛ mra ɛya, na bɛ sa nu ando.”​—Kɔlɔsaema 3:21, ɔbodwɛkɛ.

 Fane dɔɔnwo ne ala, ɔyɛ se kɛ agyalɛma babɔ ɛbɛla fofolɛ bo wɔ bɛ ewolebɔlɛ ne anzi. Ɔle kpalɛ kɛ bɛbabɔ mɔdenle bɛamaa bɛ agyalɛ ne agyinla. The Case for Marriage buluku ne ka kɛ, “Ngyegyelɛ ba agyalɛ nu a, ɔngile kɛ bɛnrɛhola bɛnrɛli nwolɛ gyima. Mekɛ ɛlɛkɔ la, anyelielɛ kola ba agyalɛ mɔɔ anyelielɛ ɛnle nu la anu.” Fane dɔɔnwo ne ala, saa awovolɛ bɔ nu tɛnla a, ɔmaa ngakula ne mɔ yɛ kpalɛ.

 Ɛhye ɛngile kɛ agyalɛma ɛnrɛhola ɛnrɛbɔ ewole ɛlɛ. Nɔhalɛ nu, Baebolo ne ka kɛ adwɔmane ɛbɛla kola maa agyalɛma bɔ ewole. (Mateyu 19:9) Noko, eza Baebolo ne ka kɛ “mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.” (Mrɛlɛbulɛ 14:15) Ɔwɔ kɛ kunlima nee yelɛma mɔɔ ɛlɛyia ngyegyelɛ wɔ bɛ agyalɛ nu la suzu ninyɛne dɔɔnwo anwo​—mɔɔ bie a le kɛzi ewolebɔlɛ ne baha ngakula ne mɔ la.

 Nɔhalɛ nu, ɔngyia kɛ ɛdi ye ɛ kunlu ala. Folɛdulɛ kpalɛ mɔɔ baboa kunlima nee yelɛma yeamaa bɛanyia subane mɔɔ bamaa bɛ agyalɛ ne ahyɛ na yeayɛ anyelielɛ la wɔ Baebolo ne anu. Ɛhye ɛnyɛ nwanwane ɔluakɛ Gyihova mɔɔ le Baebolo ne Kɛlɛvolɛ la a hyehyɛle agyalɛ a.​—Mateyu 19:4-6.

 Baebolo ngyinlazo: “Medame Gyihova a mele wɔ Nyamenle a, Ahenle mɔɔ kilehile wɔ ɔmaa ɔwie wɔ boɛ” la.​—Ayezaya 48:17.