Nvasoɛ wɔ smatfonu zo noko saa wɔannea ye boɛ a ɔbahola yeayɛ ngyegyelɛ. Kɛzi ɛbahola wɔaboa ɛ mra wɔamaa bɛava bɛali gyima wɔ adenle kpalɛ zo ɛ? Kɛ neazo la, mekɛ tendenle nyɛ a ɔwɔ kɛ ɔfa smatfonu ɔdi gyima kenle ko biala a? a

•  Mɔɔ ɔwɔ kɛ ɛnwu ye la

•  Mɔɔ ɛbahola wɔayɛ la

•  “Awovolɛ mɔɔ lɛ ɛlɔlɛ la di mɛla”

•   Awie mɔɔ lɛ smatfonu la bahola anwu ninyɛne mɔɔ ɛnle kpalɛ la. Kɛ mɔɔ ɔwɔ “Ngakula Nee Smatfonu​​​—Foa 1: Asoo Ɔwɔ Kɛ Me Ra Ne Nyia Smatfonu?” anu la, smatfonu maa awie kola nwu debie biala mɔɔ wɔ Yintanɛte ne azo, mɔɔ le kpalɛ nee ɛtane la.

   “Ɛ rɛle bahola avi kɛ smatfonu kola maa ɛ ra nwu menli nee nzuzulɛ dɔɔnwo mɔɔ bahola ayɛ esiane amaa ye la.”​—Brenda.

•   Ngakula hyia adehilelɛ nwo. Ngakula ze adwuleso ninyɛne nye zo tɛla mgbanyima. Noko, ɛhye ɛngile kɛ awovolɛ ɛnze adwuleso ninyɛne nwo ɛhwee ɔti ɔwɔ kɛ ngakula a kile kɛzi nee mekɛ mɔɔ ɔwɔ kɛ bɛfa bɛ smatfonu ne bɛdi gyima a.

   Nɔhalɛ nu, bie a ɛ mra banwu smatfonu ne anu adɛla wɔ noko yemɔ ɛngile kɛ bɛze kɛzi bɛfa bɛdi gyima nrɛlɛbɛ nu la. Ngakula mɔɔ ze kɛzi bɛfa adwuleso ninyɛne bɛdi gyima kpalɛ bɔbɔ la hyia bɛ awovolɛ adehilelɛ nwo amaa bɛava bɛali gyima wɔ adenle kpalɛ zo.

   “Saa ɛmaa ɛ ra smatfonu na wɔanva nwolɛ adehilelɛ wɔammaa ye a, ɔle kɛ asɛɛ wɔmaa ye kale sanvɛ na ɛse ɔha na anrɛɛ ɔnlea boɛ wɔ mekɛ mɔɔ ɛtɛmaanle ye kale ɛhanlɛ nwo ndetelɛ biala la.”​—Seth.

•   Nwu kɛzi ɛ ra ne fonu ne yɛ gyima la. Nwu ninyɛne mɔɔ wɔ ɛ ra ne fonu zo mɔɔ bamaa yeava yeali gyima wɔ adenle kpalɛ zo la. Kɛ neazo la:

   Ninyɛne boni mɔ a wɔ fonu ne azo mɔɔ kile mekɛ dodo mɔɔ kakula bava fonu ne ali gyima nee mɔɔ ɔbava yeayɛ la?

   Asoo ɛze kɛ tɛ mekɛ ne amuala a ɛbahola wɔazi ninyɛne mɔɔ ɛnle kpalɛ la adenle wɔ fonu ne azo ɔ?

   Saa ɛnwu kɛzi ɛ ra ne fonu ne yɛ gyima la kpalɛ a ɔbamaa wɔahola wɔaboa ye wɔamaa yeava yeali gyima nrɛlɛbɛ nu.

   Baebolo ngyinlazo: “Sonla dua nrɛlɛbɛ adwenle zo maa ye tumi yɛ kpole.”​—Mrɛlɛbulɛ 24:5.

•   Fa ɛweɛne to nwo. Si ninyɛne mɔɔ ɛbamaa yeava fonu ne yeayɛ nee mɔɔ ɔnrɛhola ɔnrɛva ɔnrɛyɛ la anwo kpɔkɛ. Kɛ neazo la:

   Ɛbamaa yeava fonu ne yeali gyima wɔ mekɛ mɔɔ bɛlɛdi aleɛ anzɛɛ bɛhɔkpɔla bɛ mbusuafoɔ nee agɔnwolɛma la ɔ?

   Asoo ɔwɔ kɛ ɛmaa ɛ mra ne mɔ fa bɛ fonu ne da ɔ?

   App boni mɔ a ɛbamaa bɛava bɛali gyima a?

   Mekɛ tendenle nyɛ a ɛbamaa ɛ ra ava ye fonu ne ali gyima a?

   Ɛbahile mekɛ dodo mɔɔ ɔbava yeali gyima alehyenlɛ biala la ɔ?

   Maa bɛnwu wɔ mɛla ne mɔ yɛɛ saa bɛanli zo a, twe bɛ nzo.

   Baebolo ngyinlazo: “Mmakpo kɛ ɛkɛdenrɛdenrɛ kakula.”​—Mrɛlɛbulɛ 23:13.

•   Ta nea ɛ ra ne fonu ne azo. Nwu ɛ ra ne password yɛɛ ta nea ninyɛne mɔɔ wɔ ye fonu ne azo, le kɛ text messages, apps, nvoninli nee wɛbsaete mɔɔ ɔkɔ zo la.

   “Yɛhanle yɛhilele yɛ ra raalɛ ne kɛ ɔyɛ a yɛbanlea ye fonu ne azo wɔ mekɛ mɔɔ ɔ nye ɛnla la. Yɛɛ saa yɛnwu kɛ ɔnva ye fonu ne ɔnli gyima kpalɛ a yɛbade mekɛ dodo mɔɔ ɔfa ɔdi gyima la azo.”​—Lorraine.

   Kɛ awovolɛ la, ɛlɛ nwolɛ adenle kɛ ɛbanwu debie biala mɔɔ ɛ ra ne fa ye fonu ne yɛ la.

   Baebolo ngyinlazo: “Kakula bɔbɔ, bɛdua ye nyɛleɛ zo a bɛnwu ye a, saa ye subane nwo te na ɔtenrɛ a.”​—Mrɛlɛbulɛ 20:11.

•   Kilehile ye subane mgbalɛ. Boa ɛ ra maa ɔnyia ɛhulolɛ kɛ ɔbayɛ mɔɔ le kpalɛ la. Duzu ati a ɛhye anwo hyia a? Ɔluakɛ saa kakula bie kulo kɛ ɔfa debie ɔsie ye awovolɛ a, ɔbakpondɛ adenle yealua zo yeayɛ ɔnva nwo mɔdenle biala mɔɔ ye awovolɛ babɔ la. b

   Ɔti, tete ɛ ra maa ɔnyia subane mgbalɛ le kɛ nɔhalɛlilɛ, bɛnwozohomonlɛ na ɔlie mɔɔ vi ye nyɛleɛ nu bara la ɔdo nu. Kakula mɔɔ lɛ subane kpalɛ la bava ye fonu ne ali gyima nrɛlɛbɛ nu.

   Baebolo ngyinlazo: ‘Menli mɔɔ bɛnyi la ɛtete bɛ adwenle ne ati bɛkola bɛnwu ngakyile mɔɔ wɔ kpalɛ nee ɛtane nu la.’​—Hibuluma 5:14.