Nyamenle ɛli yɛ eni ɛva nwolɛ adenle mɔɔ yɛlɛ yɛkpa mɔɔ yɛkulo mɔɔ kile kɛ yɛlɛ adenle yɛsi yɛ ti anwo kpɔkɛ la ɛmaa yɛ na tɛ Nyamenle anzɛɛ tumi bie a piepia yɛ a. Nea mɔɔ Baebolo ne kilehile la.

•   Nyamenle bɔle alesama kɛ ye ɛsaso. (Mɔlebɛbo 1:26) Yeambɔ yɛ kɛ nane mɔɔ gyinla nganeɛdelɛ zo yɛ ninyɛne la, yɛle kɛ yɛ Bɔvolɛ ne mɔɔ lɛ subane ngɛnlɛma le kɛ ɛlɔlɛ nee pɛlepɛlelilɛ la. Yɛlɛ adenle yɛsi mɔɔ yɛyɛ la anwo kpɔkɛ kɛ yɛ Bɔvolɛ ne ala la.

•   Wɔ adenle bie azo, yɛbahola yɛakpa mɔɔ yɛkulo kɛ yɛfa yɛ ɛbɛlabɔlɛ yɛyɛ ye kenle bie la. Baebolo ne maa yɛ anwosesebɛ kɛ ‘yɛva ngoane . . . ɔlua Nyamenle mɔɔ yɛbadie ɔ ne’ la azo, ɛhye kile kɛ, yɛbakpa kɛ yɛbali ye mɛla ne mɔ azo. (Mɛla ne 30:19, 20) Saa yɛnlɛ adenle yɛsi yɛ ti anwo kpɔkɛ a anrɛɛ nvasoɛ biala ɛnle zɔhane edwɛkɛ ne azo yɛɛ eza ɔbahile kɛ Nyamenle ati yɛ se. Nyamenle ɛntinlitinli yɛ nwo zo kɛ yɛyɛ mɔɔ ɔka la emomu ɔbodo yɛ kɛ: “O anrɛɛ bɛdiele me mɛla ne mɔ! Anrɛɛ bɛ anzonudwolɛ kɛyɛ kɛ azule.”​—Ayezaya 48:18.

•   Bɛtɛhyehyɛle bɛtɛtole ɛkɛ ne kɛ yɛ ɛbɛlabɔlɛ bawie yɛ boɛ anzɛɛ ɔnrɛwie yɛ boɛ. Saa yɛkpondɛ kɛ yɛ ɛbɛlabɔlɛ wie yɛ boɛ a, ɔwɔ kɛ yɛyɛ gyima ɛsesebɛ. Baebolo ne se, “Debie biala mɔɔ ɛkɛzɔ nu kɛ ɛyɛ la, fa wɔ anwosesebɛ yɛ.” (Nolobɔvo 9:10) Eza ɔka kɛ: “Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo.”​—Mrɛlɛbulɛ 21:5.

   Adenle mɔɔ yɛlɛ yɛsi yɛ ti anwo kpɔkɛ la le ahyɛlɛdeɛ mɔɔ vi Nyamenle ɛkɛ a na ɔmaa yɛda ye ali kɛ yɛfa yɛ “ahonle muala” yɛkulo ye​—ɔluakɛ yɛkpondɛ kɛ yɛyɛ zɔ.​—Mateyu 22:37.

 Baebolo ne kilehile kɛ Nyamenle le Tumivolɛ Bedevinli mɔɔ kile kɛ awie biala ɛnlɛ tumi ɛndɛla ye. (Dwobu 37:23; Ayezaya 40:26) Noko akee, ɔnva ye tumi ne ɔnli debie biala la azo. Kɛ neazo la, Baebolo ne ka kɛ Nyamenle ‘homole ɔ nwo zo’ wɔ Babelɔnma mɔɔ ɛnee le ye menli ne agbɔvolɛ la anwo. (Ayezaya 42:14) Zɔhane ala a, ɛnɛ noko yekpa kɛ ɔbahomo ɔ nwo zo wɔ menli mɔɔ ɛlɛfa nwolɛ adenle mɔɔ bɛlɛ bɛkpa mɔɔ bɛkulo la bɛaboda awie mɔ la anwo. Noko Nyamenle bayɛ nwolɛ debie.​—Edwɛndolɛ 37:10, 11.