Kɛ mɔɔ Baebolo ne anu buluku mɔɔ li awieleɛ la kile la, 666 le nane ne mɔɔ lɛ mɛne bulu yɛɛ ɔ ti le nsuu mɔɔ ɔvi nyevile ne anu ɔvindele la nɔma anzɛɛ duma. (Yekile 13:1, 17, 18) Nane ɛhye le ewiade amuala maanyɛlɛ ngyehyɛleɛ ne mɔɔ di “maanle biala, aneɛ biala, abusua ekpunli biala nee menli ngakyile kɔsɔɔti” anwo zo tumi la anwo sɛkɛlɛneɛ. (Yekile 13:7) Duma 666 ne maa ɔda ali kɛ Nyamenle bu maanyɛlɛ ngyehyɛleɛ ne kɛ ɔnli munli fee. Wɔ adenle boni azo?

  Nɔma ne kile debie. Aluma mɔɔ Nyamenle fa maa menli la kile debie. Kɛ neazo la, mekɛ mɔɔ Nyamenle bɔle Ebileham ɛwɔkɛ kɛ ɔbamaa yeayɛ “maanle maanle dɔɔnwo bɛ ze” la, ɔhakyile ye duma Ebilam, mɔɔ kile “Selɛ Mɔɔ Bɛkpogya Ye” la ɔyɛle ye Ebileham, mɔɔ kile “Menli Dɔɔnwo Bɛ Ze” la. (Mɔlebɛbo 17:5) Zɔhane ala a kɛzi nane ne subane de la ati Nyamenle maanle ye duma 666 a.

  Nɔma nsia kile debie mɔɔ ɛnli munli. Ɔyɛ a bɛfa nɔma bɛgyinla ɛkɛ bɛmaa debie wɔ Baebolo ne anu. Nsuu gyi ɛkɛ maa debie mɔɔ di munli bɔkɔɔ. Nsia, mɔɔ ɔndwu nsuu la kola kile debie mɔɔ ɛnli munli fee wɔ Nyamenle anye zo la, na ɔyɛ a bɛfa bɛka Nyamenle agbɔvolɛ nwo edwɛkɛ.​—1 Edwɛkɛsisilɛ 20:6.

  Bɛka debie fane nsa bɛfa bɛsi edwɛkɛ zo. Ɔyɛ a Baebolo ne ka edwɛkɛ bie fane nsa ɔfa ɔsi zo. (Yekile 4:8; 8:13) Yemɔti duma 666 ne si zolɛ kɛ Nyamenle nwu alesama maanyɛlɛ ngyehyɛleɛ ne kɛ ɔnli munli fee. Bɛtɛkolale bɛtɛfale anzodwolɛ nee banebɔlɛ bɛtɛbale​—Nyamenle Belemgbunlililɛ ne angomekye a bava ninyɛne ɛhye mɔ ara a.

Nane ne nzonlɛyɛlɛ ne

 Baebolo ne se menli maanle bɛyɛle “nane ne sɛkɛlɛneɛ ne wɔ bɛ nwo” ɔluakɛ ‘ɔ nwo yɛle bɛ ɛzulolɛ’ yemɔti bɛdule bɛdoale ye na bɛzonlenle ye. (Yekile 13:3, 4; 16:2) Bɛdua bɛ maanle ne, ninyɛne mɔɔ gyi ɛkɛ maa maanle ne, anzɛɛ konle ninyɛne mɔɔ maanle ne lɛ mɔɔ bɛdi bɛ eni la azo a bɛyɛ ɛhye a. Kɛ mɔɔ The Encyclopedia of Religion hanle la: “Maanlehulolɛ ɛrayɛ ɛzonlenlɛ titili wɔ ɛnɛ ewiade ye anu.” *

 Kɛzi awie nyia nane ne nzonlɛyɛlɛ ne bie wɔ ɔ sa fema ne anwo anzɛɛ ɔ nwoma azo ɛ? (Yekile 13:16) Nyamenle hanle mɛla mɔɔ ɔvale ɔmaanle Yizilayɛ maanle ne la anwo edwɛkɛ kɛ: “Bɛhɛlɛ bɛ debie zo bɛkyekye bɛ sa, bɛva bie bɛhendɛhenda bɛ ndo avinli.” (Mɛla ne 11:18) Ɛnee ɛhye ɛngile kɛ ɔwɔ kɛ Yizilayɛma kɛlɛhɛlɛ bɛ sa anwo anzɛɛ bɛ nwoma azo, emomu, ɔkile kɛ Nyamenle edwɛkɛ ne bahile bɛ adenle wɔ bɛ nzuzulɛ nee bɛ nyɛleɛ kɔsɔɔti anu. Yemɔti 666 nzonlɛyɛlɛ ne ɛnle debie mɔɔ bɛbahɛlɛhɛlɛ ye wɔ awie anwo a, emomu, wɔ sɛkɛlɛneɛ adenle zo, ɔkile menli mɔɔ bɛmaa maanyɛlɛ ngyehyɛleɛ ne kile bɛ adenle la. Bɛdabɛ mɔɔ bɛnyia nane ne nɔma ne bie la dwazo tia Nyamenle.​—Yekile 14:9, 10; 19:19-21.