Baebolo ngilebɛbo bie mɔ kile Hibulu edwɛkɛkpɔkɛ “Sheol” nee Giliki edwɛkɛkpɔkɛ “Hades” mɔɔ ɔ mu nwiɔ kile alesama nla la abo “hell.” (Edwɛndolɛ 16:10; Gyima ne 2:27) Menli dɔɔnwo noko die di kɛ abɔnsam senle anzɛɛ hellsenle wɔ ɛkɛ, kɛ mɔɔ bɛhile wɔ nvoninli ne mɔɔ wɔ ɛke la anu la. Noko Baebolo ne ɛngilehile zɔ.

1.   Menli mɔɔ wɔ hell la ɛnze ɛhwee, yemɔti bɛngola bɛnde nyane. “Mɔwuamra ɛnze ɛhwee, . . . ɔluakɛ gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ mɔɔ ɛlɛkɔ la.”​—Nolobɔvo ne 9:5, 10.

2.   Kpalɛma noko kɔ hell. Ɛnee nɔhavoma le kɛ Gyekɔbo nee Dwobu anye la kɛ bɛbahɔ hell.​—Mɔlebɛbo 37:35; Dwobu 14:13.

3.   Ɛtane ahatualɛ a le ewule, na tɛ abɔnsam senle anzɛɛ hellsenle nu. “Ɔluakɛ sonla wu a, ɛnee ɔnle ɛtane tumi bo bieko.”​—Wulomuma 6:7.

4.   Menli mɔɔ bɛkile bɛ nyane dahuu la bahile kɛ Nyamenle ɛnli pɛlepɛle. (Mɛla ne 32:4) Mekɛ mɔɔ Adam yɛle ɛtane la, Nyamenle hanle hilele ye kɛ ɔnrɛdɛnla ngoane nu bieko: “Ɛle ndɛtɛlɛ na ɛbazia wɔahɔ ndɛtɛlɛ nu.” (Mɔlebɛbo 3:19) Saa ɛnee Nyamenle bamaa Adam ahɔ abɔnsam senle anzɛɛ hellsenle nu yɛɛ ɔhanle kɛ ɔbahɔ ndɛtɛlɛ nu a, anrɛɛ ɔbahile kɛ ɔlɛbɔ adalɛ.

5.   Ɔtɛbale Nyamenle adwenle nu bɔbɔ kɛ ɔkile menli nyane dahuu. Adwenle mɔɔ menli lɛ kɛ Nyamenle bava hellsenle ahwe menli nzo la nee Baebolo ngilehilelɛ mɔɔ se “Nyamenle le ɛhulolɛ” la ɛnyia.​—1 Dwɔn 4:8; Gyɛlɛmaya 7:31.