Baebolo ne ka ninyɛne mɔɔ basisi mɔɔ bahile kɛ, “ewiade ɛhye ɛlɛba awieleɛ” la anwo edwɛkɛ. (Mateyu 24:3) Baebolo ne fɛlɛ mekɛ ɛhye kɛ “awieleɛ mekɛ” anzɛɛ “ewiade awieleɛ.” (2 Temɔte 3:1; Daneɛle 8:19 3:1) Ninyɛne mɔɔ doɔdoa zo la le ngapezo mɔɔ maa yɛnwu kɛ yɛwɔ awieleɛ mekɛ anzɛɛ ewiade awieleɛ la:

•   Konle konle.​—Mateyu 24:7; Yekile 6:4.

•   Ɛhɔne.​—Mateyu 24:7; Yekile 6:5.

•   Azɛlɛkpusulɛ mgbole.​—Luku 21:11.

•   Ewulenzane anzɛɛ ewule ngakyile.​—Luku 21:11.

•   Ɛtaneyɛlɛ bahɔ ɔ nyunlu.​—Mateyu 24:12.

•   Alesama bazɛkye azɛlɛ ne.​—Yekile 11:18.

•   Menli subane bazɛkye, ɔluakɛ bɛbayɛ “boniayɛma, bɛnrɛli nɔhalɛ, . . . menli mɔɔ bɛ nee bɛ ɛnyɛ ngyehyɛleɛ, dumasɛkyevoma, menli mɔɔ ɛngomo bɛ nwo zo, menli mɔɔ anwo yɛ ɛzulolɛ, menli mɔɔ ɛngulo kpalɛyɛlɛ, menli mɔɔ ye awie mɔ maa, menli mɔɔ le tufoande, menli mɔɔ tu bɛ nloa nu.”​—2 Temɔte 3:1-4.

•   Ngyegyelɛ bara mbusua nu, ɔluakɛ menli ɛnrɛnyia “sonla nwo ɛlɔlɛ” yɛɛ ngakula bayɛ bɛ “awovolɛ nwo anzosesebɛ.”​—2 Temɔte 3:2, 3.

•   Menli dɔɔnwo baminli bɛ ɛhulolɛ mɔɔ bɛlɛ ye wɔ Nyamenle anwo la.​—Mateyu 24:12.

•   Menli bayɛ nabalaba wɔ Nyamenle ɛzonlenlɛ nu.​—2 Temɔte 3:5.

•   Baebolo ngapezo mɔɔ bie fale awieleɛ mekɛ ne anwo la anwo ndelebɛbo bayɛ kpole.​—Daneɛle 12:4.

•   Bɛbaha edwɛkpa ne mɔɔ fale Belemgbunlililɛ ne anwo la wɔ ewiade amuala.​—Mateyu 24:14.

•   Menli bayɛ agolobɛnwoma anzɛɛ bayɛ anyetele wɔ daselɛ mɔɔ kile kɛ awieleɛ ne ɛbikye la anwo.​—Mateyu 24:37-​39; 2 Pita 3:​3, 4.

•   Ngapezo ɛhye mɔ amuala basisi mekɛ ko ne ala anu.​—Mateyu 24:33.

Asoo yɛwɔ “awieleɛ mekɛ” ne anu ɔ?

 Ɛhɛe. Ninyɛne mɔɔ ɛlɛsisi ewiade ne Baebolo mgbondabulɛ kile kɛ awieleɛ mekɛ ne bɔle ɔ bo wɔ 1914. Zɔhane mekɛ ne a Nyamenle Belemgbunlililɛ ne bɔle ɔ bo kɛ ɔdi tumi wɔ anwuma a. Debie mɔɔ ɔlimoale ɔyɛle la a le kɛ ɔvuandinle Seetan Abɔnsam nee sunsum ɛtane ne mɔ ɔguale azɛlɛ ye azo mɔɔ bɛngola bɛngɔ anwuma lɔ bieko a. (Yekile 12:7-12) Ninyɛne mɔɔ ɛlɛsisi nee menli subane mɔɔ ɛlɛsɛkye la maa ɔda ali kɛ yɛwɔ awieleɛ mekɛ nu na Seetan a nea bɛ nwo zo a yɛɛ “anwongyelelɛ dɔɔnwo ɛra.”​—2 Temɔte 3:1.