Alesama kɔsɔɔti lɛ bɛ aluma. Asoo ndelebɛbo ɛnle nu kɛ Nyamenle noko lɛ duma ɔ? Menli aluma mɔɔ yɛfa yɛfɛlɛ bɛ la hyia wɔ yɛ nee bɛ agɔnwolɛvalɛ nu. Asoo ɔwɔ kɛ ɔyɛ ngakyile wɔ yɛ nee Nyamenle agɔnwolɛvalɛ nu ɔ?

 Wɔ Baebolo ne anu, Nyamenle se: ‘Medame a mele Gyihova a, me duma ɛne.’ (Ayezaya 42:8) Ɔlɛ amodinli dɔɔnwo mɔɔ le kɛ ‘Nyamenle Tumivolɛ Bedevinli,’ “Tumivolɛ Awulae,” nee “Bɔvolɛ” ɛdeɛ, noko ɔdi ye azonvolɛ eni na ɔmaa bɛfa ye duma bɛfɛlɛ ye.​—Mɔlebɛbo 17:1; Gyima ne 4:24; 1 Pita 4:19.

 Nyamenle duma finde Baebolo dɔɔnwo anu wɔ Adendulɛ 6:3. Ɛkɛ ne kenga kɛ: ‘Menyele me nwo mengilele Ebileham, Ayezeke, nee Gyekɔbo kɛ Nyamenle Tumivolɛ Bedevinli, noko me duma Gyihova ne, meammaa bɛannwu ye.’

 Gyihova le Nyamenle duma wɔ Nrelenza nu mɔɔ bɛva bɛli gyima wɔ ɛvoya dɔɔnwo anu a. Mbɔlɔba dɔɔnwo kulo “Yahweh” ne ɛhɛlɛlɛ ɛdeɛ, noko Gyihova a le duma mɔɔ menli dɔɔnwo ze a. Bɛangɛlɛ Baebolo ne foa ne mɔɔ limoa la Nrelenza nu emomu bɛhɛlɛle ye Hibulu, aneɛ mɔɔ bɛkenga bɛfi fema zo bɛkɔ bɛne zo la anu. Wɔ zɔhane aneɛ ne anu, bɛva kɔnsɔnante nna יהוה a, bɛhɛlɛ Nyamenle duma a. Bɛfɛlɛ Hibulu ngɛlɛlerakpɔkɛ nna ɛhye​—mɔɔ bɛhɛlɛ ye YHWH la Tetragrammaton.