Konle ne ɛra awieleɛ, Yila Bɔnza ne anu ɛyɛ koonwu. Wɔ mekɛ mɔɔ anwoma kpalɛ bie ɛlɛfa sogyama ne azokoɛleɛ ɛkɛ ne la, Belemgbunli Sɔɔlo yɛle ayia bie. Ɛnee ɔ ra nrenyia kpanyinli Dwɔnatan wɔ ɛkɛ ne bie yɛɛ kpavolɛ bie mɔɔ le mboaneneavolɛ la ɛlɛka mɔɔ zile la. Kpavolɛ zɔhane a le Devidi, na ɛnee ɔ nye yɛ se yɛɛ ɔlɛ akɛnrasesebɛ. Sɔɔlo diele Devidi edwɛkɛ ne kpalɛ. Noko kɛzi Dwɔnatan dele nganeɛ ɛ? Yeva ɛvolɛ dɔɔnwo yezonle kɛ Gyihova sogyanli, na yeli konim fane dɔɔnwo. Noko ɛnɛ, tɛ Dwɔnatan a lile konim a, emomu Devidi ɔ. Devidi ɛhu Golayate! Asoo Dwɔnatan maanle ɔ nye bolole Devidi wɔ nganvolɛ mɔɔ bɛlɛfa bɛamaa ye la anwo ɔ?

Mɔɔ Dwɔnatan yɛle la bazi ɛ nwo. Yɛkenga kɛ: “Mɔɔ Devidi nee Sɔɔlo wiele bɛ adwelie ne di la, Dwɔnatan, Sɔɔlo ara nrenyia ne hulole Devidi, na ɔhulole ye kɛ ɔdaye ɔ nwo la.” Dwɔnatan vale ye konle tɛladeɛ ne yɛɛ ye dadeɛ ne maanle Devidi​—ɛhye sonle bolɛ, ɔluakɛ ɛnee Dwɔnatan le awie mɔɔ ze ɛda to kpalɛ. Yeanga ye zɔ, Dwɔnatan nee Devidi yɛle ngyekyeleɛ, bɛbɔle ɛwɔkɛ kɛ bɛbaboa bɛ nwo kɛ agɔnwolɛma.​—1 Samoɛle 18:​1-5.

Ɛhye rayɛle agɔnwolɛvalɛ mɔɔ tɛla biala mɔɔ Baebolo ne ka nwolɛ edwɛkɛ a. Menli mɔɔ lɛ diedi la bu agɔnwolɛvalɛ kɛ nwolɛ hyia kpalɛ. Saa yɛkpa agɔnwolɛma nrɛlɛbɛ nu, yɛboa yɛ nwo na yɛdi nɔhalɛ yɛmaa yɛ nwo a, ɔbamaa yɛ diedi nu amia wɔ mekɛ ɛhye mɔɔ ɛlɔlɛ ɛnle nu la anu. (Mrɛlɛbulɛ 27:17) Yemɔti, bɛmaa yɛnlea agɔnwolɛvalɛ nwo debie mɔɔ yɛbahola yɛazukoa yɛavi Dwɔnatan ɛkɛ la.

Kɛmɔti a bɛvale bɛ nwo agɔnwolɛ ndɛndɛ zɔhane ɛ? Debie mɔɔ bɛgyinlanle zo bɛvale bɛ nwo agɔnwolɛ la bamaa yɛanwu mualɛ ne. Suzu mɔɔ vale ɛhye rale la anwo. Ɛnee Dwɔnatan de mekɛ mɔɔ anu yɛ se la anu. Ɔnwunle kɛ Belemgbunli Sɔɔlo mɔɔ le ɔ ze la subane ɛlɛkakyi, akee ɔzɛkyele bɔkɔɔ. Ɛnee Sɔɔlo le diedinli mɔɔ bɛlɛ ɔ nwo aze na ɔyɛ tieyɛ, noko ɔrayɛle belemgbunli mɔɔ anzo yɛ se na ɔmemaa ɔ nwo zo.​—1 Samoɛle 15:17-​19, 26.

Ɔda ali kɛ kɛzi Sɔɔlo hakyile la gyegyele Dwɔnatan kpalɛ, ɔluakɛ ɛnee ɔbikye ye papa. (1 Samoɛle 20:2) Bie a Dwɔnatan dwenlenle ngyegyelɛ mɔɔ Sɔɔlo bava ara maanle mɔɔ Gyihova ɛkpa bɛ anwo zo la anwo. Asoo belemgbunli ne anzosesebɛ nyɛleɛ ne bamaa ye ezuavolɛ ne ahwe bɛ nwo avi Gyihova anwo na yeakpo bɛ ɔ? Nɔhalɛ nu, ɛnee ɔle mekɛ mɔɔ anu yɛ se maa diedinli le kɛ Dwɔnatan.

Edwɛkɛ zɔhane bamaa yɛade mɔɔ maanle Dwɔnatan bikyele kpavolɛ Devidi la abo. Dwɔnatan nwunle kɛ Devidi lɛ diedi kpole. Kakye kɛ, Devidi ammaa kɛzi Golayate le anyinlima la anga ye ɛzulolɛ kɛ Sɔɔlo sogyama ne la. Ɔnyianle adwenle kɛ, konle ne mɔɔ ɔlɛkɔ wɔ Gyihova duma nu la bamaa yeahola yeali Golayate mɔɔ lɛ konle ninyɛne ngakyile la anwo zo konim.​—1 Samoɛle 17:45-​47.

Mekɛ bie, ɛnee Dwɔnatan noko lɛ adwenle zɛhae bie. Ɛnee ɔdie ɔdi kɛ mrenyia nwiɔ​—ɔ nee ye sonvolɛ​—bahola ateta sogyama ekpunli na bɛali bɛ nwo zo konim. Duzu ati ɔ? Dwɔnatan hanle kɛ: “Debie biala ɛnle ɛkɛ mɔɔ kola tua [Gyihova] adenle” a. (1 Samoɛle 14:6) Yemɔti ɛnee Dwɔnatan nee Devidi lɛ debie ko: bɛlɛ Gyihova anu diedi kpole yɛɛ bɛkulo ye kpalɛ. Ɛhye a bɛgyinlanle zo bɛvale bɛ nwo agɔnwolɛ a. Ɔnva nwo kɛ ɛnee Dwɔnatan le belemgbunli ara nrenyia mɔɔ anwo yɛ se na ɔlɛkɔ ye ɛvolɛ 50 anu la, yeammaa ɛhye angyegye ye kɛ ɔbava Devidi, mɔɔ le mboaneneavolɛ mɔɔ bɛlɛ ɔ nwo aze mɔɔ bie a ɔtɛnyianle ɛvolɛ 20 la agɔnwolɛ. *

Ngyekyeleɛ mɔɔ bɛyɛle la bɔle bɛ agɔnwolɛvalɛ ne anwo bane kpalɛ. Adenle boni azo? Ɛze ɔ, ɛnee Devidi ze ɛwɔkɛ mɔɔ Gyihova ɛbɔ ye a: Ɔdaye a ɔbayɛ Yizilayɛ belemgbunli bieko a! Ɔvale ɛhye ɔveale Dwɔnatan ɔ? Kyɛkyɛ! Bɛ ɛhulolɛ nu mɔɔ bɛvile bɛlile adwelie la maanle bɛ agɔnwolɛvalɛ ne anu mianle, bɛambɔ adalɛ bɛangile bɛ nwo yɛɛ bɛanva edwɛkɛ bɛanvea bɛ nwo. Mɔɔ Dwɔnatan dele kɛ Devidi bayɛ belemgbunli la, kɛzi ɔdele nganeɛ ɛ? Asoo ɛnee Dwɔnatan anye la kɛ kenle ko dedee ɔbayɛ belemgbunli na yeayɛ ninyɛne mɔɔ ɔ ze ɛzɛkye bɛ la boɛ ɔ? Baebolo ne ɛnga kɛ ɛnee Dwɔnatan lɛ adwenle zɛhae; mɔɔ anwo hyia kpalɛ la a ɔmaa yɛnwu ye a, Dwɔnatan nɔhalɛlilɛ nee ye diedi ne. Ɔnwunle kɛ Gyihova sunsum ne wɔ Devidi anwo zo. (1 Samoɛle 16:​1, 11-​13) Yemɔti, Dwɔnatan hɔle zo lile ye ndane ne azo, ɔbule Devidi kɛ ɔ gɔnwo tɛ ye kpɔvolɛ. Ɛnee Dwɔnatan kulo kɛ Gyihova ɛhulolɛdeɛ yɛ ɛkɛ.

Agɔnwolɛvalɛ zɔhane vale nyilalɛ kpole rale. Duzu a yɛbahola yɛazukoa yɛavi Dwɔnatan diedi ne anu a? Ɔwɔ kɛ Nyamenle sonvolɛ biala nwu nvasoɛ mɔɔ wɔ agɔnwolɛvalɛ zo la. Ɔngyia kɛ yɛ gɔnwo mɔ nee yɛ sɛ atipɛne, noko saa bɛlɛ nɔhalɛ diedi a, bɛbahola bɛaboa yɛ kpole kpalɛ. Dwɔnatan nee Devidi holale maanle bɛ nwo anwosesebɛ yɛɛ bɛboale bɛ nwo fane dɔɔnwo. Na ɛnee bɛbahyia moalɛ zɛhae, ɔluakɛ ɛnee bɛbayia bɛ agɔnwolɛvalɛ ne anwo sɔnea mɔɔ anu yɛ se.

Alimoa ne, ɛnee Sɔɔlo anye die Devidi anwo kpalɛ na ɔmaanle ɔlile ye ɛlɔnema ne ati. Noko, yeangyɛ, Sɔɔlo maanle kpɔvolɛ ne mɔɔ yeangola yeanli Dwɔnatan anwo zo konim la asa hanle ye​—nungulehwenlɛ. Devidi lile Filisitiama mɔɔ le Yizilayɛma agbɔvolɛ la anwo zo konim fane dɔɔnwo. Ɛhye maanle bɛyeyɛle Devidi na bɛhanvole ye. Yizilayɛ mraalɛ bie mɔ dole edwɛne kɛ: “Sɔɔlo ɛhu apenle apenle, na Devidi ɛhu apenle apenle bulu.” Edwɛne zɔhane anyɛ Sɔɔlo fɛ. Yɛkenga kɛ: “Na ɔvi kenle ko ne Sɔɔlo nyianle Devidi anwo adwenle ɛtane na ɔvuale ɔ ti.” (1 Samoɛle 18:7, 9) Ɛnee ɔsulo kɛ Devidi balie belemgbunlililɛ ne avi ɔ sa nu. Ɛhye le ngoaseasɛm wɔ Sɔɔlo afoa nu. Ɛnee Devidi ze kɛ ɔdaye a ɔbali Sɔɔlo agya a, noko yeandwenle nwolɛ ɛlɛ kɛ ɔbalie tumililɛ ne yeavi belemgbunli mɔɔ Nyamenle ɛkpokpa ye na ɔtɛdi tumi la asa anu!

Sɔɔlo bɔle kpɔkɛ kɛ ɔmaa bɛahu Devidi wɔ konle nu, noko yeanyɛ boɛ. Devidi lile konim dɔɔnwo wɔ konle nu, ɛhye maanle bɛhulole ye na bɛlile ye eni kpalɛ. Eza Sɔɔlo bɔle mɔdenle kɛ ɔmaa ye sua nu amra mɔɔ ye azonvolɛ nee ɔ ra nrenyia kpanyinli ne boka nwo la anyia adwenle ko na bɛahu Devidi! Nea kɛzi ɔyɛle Dwɔnatan nyane mekɛ mɔɔ ɔnwunle kɛ ye papa ɛlɛyɛ zɔhane la! (1 Samoɛle 18:25-​30; 19:1) Ɛnee Dwɔnatan le ralɛ nrenyia mɔɔ di nɔhalɛ, eza noko ɔle agɔnwolɛ mɔɔ di nɔhalɛ. Kɛkala, nwane a ɔbali nɔhalɛ yeamaa ye a, ye papa anzɛɛ ɔ gɔnwo ne?

Dwɔnatan dendɛle zele kɛ: “Nana, mmafa ɛ sa ɛka wɔ sonvolɛ Devidi, ɔboalekɛ ɔtɛyɛle ɛtane biala ɔtɛtiale wɔ. Debie biala mɔɔ ɔyɛle la, ɔvale ɔzonlenle wɔ. Ɔvale ye ngoane ɔdole nzeleba ɔhunle Golayate, na [Gyihova] lile konim maanle Yizilayɛma kɔsɔɔti. Ɛnwunle ye la, ɛlile fɛlɛko, na duzu ati bɔbɔ yɛɛ akee ɛkpondɛ kɛ ɛku Devidi mgbane gyɛne ne ala, ɛka mogya mɔɔ ɛnli fɔlɛ la ɛgua ɛ?” Ɛkɛ ne ala Sɔɔlo adwenle hakyile na ɔbɔle Dwɔnatan ɛwɔkɛ kɛ, ɔnrɛhu Devidi. Noko Sɔɔlo anli ye ɛwɔkɛ zo. Mɔɔ Sɔɔlo nwunle kɛ ninyɛne ɛlɛtotɔ adenle zo amaa Devidi la, nungule maanle ɔvale ɛya na ɔdole atwɛ kɛ ɔfa yeawɔ Devidi. (1 Samoɛle 19:4-6, 9, 10) Noko, yeanga Devidi na ɔnriandile ɔvile Sɔɔlo sua nu ɛkɛ.

Wɔhɔ tɛnlabelɛ mɔɔ ɔwɔ kɛ ɛkpa awie mɔɔ ɛbali nɔhalɛ wɔamaa ye la bie anu ɛlɛ ɔ? Ɔbahola yeayɛ nyane kpalɛ. Wɔ tɛnlabelɛ zɛhae mɔ anu, bie mɔ badu wɔ folɛ kɛ ɛhɔ wɔ abusua ne afoa. Noko, ɛnee Dwɔnatan ze mɔɔ ɔfɛta kɛ ɔyɛ a. Kɛzi ɔwɔ kɛ ɔkɔ ye papa afoa wɔ mekɛ mɔɔ Devidi le Gyihova nɔhalɛ sonvolɛ mɔɔ yɛ tieyɛ la ɛ? Yemɔti, nɔhalɛ mɔɔ Dwɔnatan di yeamaa Gyihova la maanle ɔzile kpɔkɛ kpalɛ. Ɛhye ati a ɔgyinlanle Devidi anzi la. Ɔvale nɔhalɛ mɔɔ ɔdi yeamaa Nyamenle la ɔlimoale ɛdeɛ, noko ɔlile nɔhalɛ ɔmaanle ye papa ɔlua nɔhalɛ ne mɔɔ ɔmaanle ɔnwunle ye la azo. Saa yɛ nuhua ko biala sukoa kɛzi Dwɔnatan lale nɔhalɛlilɛ ali la a, ɔbaboa yɛ.

Dwɔnatan bɔle mɔdenle bieko kɛ ɔsiezie Sɔɔlo nee Devidi avinli, noko yeanyɛ boɛ. Devidi veale ɔ nwo rahanle hilele Dwɔnatan kɛ, ɔsulo kɛ ye ngoane bavi ɔ sa. Ɔzele ɔ gɔnwo kpanyinli ne kɛ: “Me ngoane mɔɔ ɛha la le ezinra zɛhae.” Dwɔnatan liele dole nu kɛ ɔbazɔ ye papa yeanlea amaa yeanwu kɛzi ɔte nganeɛ la. Devidi hɔveale na Dwɔnatan luale ɛda mbaka zo maanle ɔnwunle mɔɔ ɔwɔ kɛ ɔyɛ la. Dwɔnatan zele Devidi kɛ ɔha ndane ɔgua ɛwɔkɛ ɛhye azo: ‘Di nɔhalɛ maa me abusua ne dahuu. Saa Gyihova ye wɔ kpɔvolɛma fi aleɛabo a.’ Devidi liele dole nu kɛ ɔbanlea Dwɔnatan sua nu amra dahuu.​—1 Samoɛle 20:​3, 13-​27.

Dwɔnatan bɔle mɔdenle kɛ ɔka Devidi anwo edwɛkɛ kpalɛ yeahile Sɔɔlo, noko belemgbunli ne vale ɛya! Ɔvɛlɛle Dwɔnatan kɛ ɔle “raalɛ kpamgbanvolɛ ra,” na ɔbule nɔhalɛ mɔɔ ɔdi ɔmaa Devidi la kɛ ɔle anyiemgba ɔmaa abusua ne. Ɛnee ɔkulo kɛ Dwɔnatan da ye angomedi subane ne bie ali, ɔti ɔzele ye kɛ: “Nwu ye wienyi kɛ, sumunli kenle ala mɔɔ Devidi de ngoane nu la, ɛnrɛnyia belemgbunli ɛnrɛli ye ɛlɛ wɔ maanle ɛhye anu.” Ɛhye anga Dwɔnatan ɛzulolɛ, ɔti ɔkpale ye papa kyɛlɛ bieko kɛ: “Duzu ati bɔbɔ yɛɛ ɔwɔ kɛ ɛku Devidi a? Duzu bɔbɔ yɛɛ yeyɛ a?” Sɔɔlo ahonle futule! Ɔnva nwo kɛ ɛnee Sɔɔlo ɛyɛ kpanyinli la, ɛnee ɔtɛde sogyanli mɔɔ ɔ nwo yɛ se. Ɔdole atwɛ kɛ ɔfa yeawɔ ɔ ra ne! Ɛnee yezukoa ye ɛdolɛ dedee, noko ɔ sa anga ye. Dwɔnatan vile sua nu, ɔluakɛ ɔgyegyele ye kpole yɛɛ ɛnee yeva ɛya.​—1 Samoɛle 20:24-​34.

Aleɛ hyenle la, Dwɔnatan hɔle ɛya ne mɔɔ bikye ɛleka mɔɔ Devidi vea la anu. Ɔdole ɛda ko ɔmaanle Devidi nwunle kɛ Sɔɔlo kulo kɛ ɔku ye kɛ mɔɔ bɛha bɛzie la. Akee Dwɔnatan maanle ye sonvolɛ ne ziale hɔle suakpole ne azo. Akee ɔ nee Devidi nyianle mekɛ ekyi lile adwelie. Bɛ mu nwiɔ bɛzunle, na Dwɔnatan yɛle ɔ gɔnwo kakula ne baye baye na Devidi bɔle ɛbɛlabɔlɛ fofolɛ bo kɛ tutanenli.​—1 Samoɛle 20:35-​42.

Dwɔnatan hilele kɛ amgba ɔdi nɔhalɛ na ɔnle angomedi. Saa Dwɔnatan lile Sɔɔlo anzi na ɔkpondɛle tumi nee anyunlunyia a, anrɛɛ ɔbayɛ Seetan mɔɔ kpɔ nɔhavoma la fɛ kpole. Kakye kɛ, Seetan kulo kɛ alesama di angomedi subane mɔɔ bɛlɛ la anzi. Ɔ sa hanle yɛ awovolɛ mɔɔ limoa, Adam nee Yive. (Mɔlebɛbo 3:​1-6) Noko, ɔ sa anga Dwɔnatan. Nea kɛzi ɔbayɛ Seetan nyane a! Ɛbakpo sɔnea zɛhae bie ɔ? Yɛde mekɛ mɔɔ angomedi subane ɛbu zo la anu. (2 Timote 3:​1-5) Asoo yɛbazukoa Dwɔnatan mɔɔ ɔnle angomedi na ɔdi nɔhalɛ la subane ne bie ɔ?

Kɛzi ɛnee Sɔɔlo kpɔ Devidi la nyianle ye adwenle nee ye nganeɛdelɛ zo tumi. Ɛnee Dwɔnatan ɛnnwu kɛzi ɔyɛ ɔ nwo a, mekɛ mɔɔ ɔnwunle kɛ ye papa ɛlɛyɛ ye ninyɛne kɛ ɛzɛlɛ bie la; ɔ nee ye sogyama luolua nu wɔ maanle ne anu bɛlɛkpondɛ sonla ko mɔɔ ɔ nwo ɛnlɛ edwɛkɛ bɛahu ye la. (1 Samoɛle 24:​1, 2, 12-​15; 26:20) Dwɔnatan vale ɔ nwo wulale nu ɔ? Ɔyɛ anyelielɛ kɛ, Ngɛlɛlera ne anga ye ɛlɛ kɛ ɔvale ɔ nwo ɔwulale nyɛleɛ zɛhae anu. Nɔhalɛ mɔɔ Dwɔnatan di yeamaa Gyihova, Devidi nee ndane mɔɔ bɛhanle kɛ agɔnwolɛma la ammaa yeanyɛ debie zɛhae.

Nganeɛdelɛ mɔɔ ɔlɛ ɔmaa ɔ gɔnwo kakula ne la angakyi ɛlɛ. Nzinlii, ɔkpondɛle adenle ɔluale zo ɔyiale Devidi bieko. Bɛyiale Hɔlɛhye mɔɔ kile “Ndaboa Ɛleka” la. Ɛnee Hɔlɛhye wɔ ɛleka mɔɔ le awoka na ɛkɛ ne yɛ ɛzulolɛ la wɔ Hibulɔn aduduleɛ-nyiakɛ afoa nu. Duzu ati a Dwɔnatan vale ye ngoane dole esiane nu hɔkpondɛle sonla ɛhye mɔɔ ɛlɛnriandi la ɛ? Baebolo ne bɔ yɛ amaneɛ kɛ, ɛnee ye bodane a le kɛ ɔboa Devidi yeamaa yeanyia ‘anwosesebɛ wɔ Gyihova anu.’ (1 Samoɛle 23:16) Kɛzi Dwɔnatan yɛle ɛhye ɛ?

Dwɔnatan zele ɔ gɔnwo kakula ne kɛ: “Mmasulo.” Ɔvale anwodozo edwɛkɛ ɛhye ɔdoale zo kɛ: “Ɔluakɛ egya Sɔɔlo asa ɛnrɛha wɔ ɛnrɛhu wɔ ɛlɛ.” Duzu a Dwɔnatan gyinlanle zo hanle anwodozo edwɛkɛ zɔhane a? Ɛnee Dwɔnatan lɛ diedi kɛ Gyihova bodane bara nu wɔ adenle biala azo. Ɔdoale zo kɛ: “Ɛbali Yizilayɛ belemgbunli.” Bɛmaanle ngapezonli Samoɛle hɔhanle edwɛkɛ zɔhane wɔ ɛvolɛ dɔɔnwo mɔɔ ɛpɛ nu la anu; na Dwɔnatan hakyele Devidi kɛ ɔva ɔ nwo ɔdo Gyihova edwɛkɛ zɔhane azo dahuu. Na kɛzi Dwɔnatan nwunle ye kenle bie ɛ? Ɔhanle kɛ: “Na medame noko meadɛnla ɛ sa fema zo.” Mɛlɛbɛnwoaze subane kɛnlɛma boni ɛne! Ɛnee ɔ nye die nwo kɛ ɔbadɛnla awie mɔɔ ɔtɛla ye ɛvolɛ 30 la tumililɛ bo na yeaboa ye! Dwɔnatan dwulale ye edwɛkɛ ne kɛ: ‘Me papa Sɔɔlo noko ze ye zɔ.’ (1 Samoɛle 23:17, 18) Ɛnee Sɔɔlo ze ye wienyi kɛ, ye biala anu, belemgbunlililɛ ne bavi ɔ sa, na bɛava bɛamaa ahenle mɔɔ ɛnee Gyihova ɛkpa ye kɛ ɔbali belemgbunli kenle bie la.

Ɔkɛyɛ kɛ wɔ ɛvolɛ dɔɔnwo anzi, Devidi hakyele ayia zɔhane mɔɔ bɛyɛle la. Ɛnee ɛhye le bɛ ayia mɔɔ li awieleɛ. Ɔyɛ alɔbɔlɛ kɛ, adwenle mɔɔ ɛnee Dwɔnatan lɛ kɛ ɔbadɛnla Devidi asa fema zo la amba nu.

Dwɔnatan nee ye papa vale konle doale Filisitiama mɔɔ ɛnee kpɔ Yizilayɛma la. Dwɔnatan vale adwenle mɔɔ anu te la yɛle zɔ ɔluakɛ, ɛnee ɔngulo kɛ ye papa ɛtane ne bazɛkye ɛzonlenlɛ mɔɔ ɔlɛfa yeamaa Gyihova la. Ɔvale akɛnrasesebɛ nee nɔhalɛlilɛ ɔhonle kɛ mɔɔ ɔyɛ ye dɛba la. Noko ninyɛne angɔ boɛ ammaa Yizilayɛma. Sɔɔlo amumuyɛyɛlɛ ne yɛle kpole na ɔvale ɔ nwo ɔwulale sunsum ɛtane nyɛleɛ mɔɔ Nyamenle Mɛla ne tendɛ tia mɔɔ awie yɛ a bɛku ye la anu. Yemɔti ɛnee Sɔɔlo ɛnlɛ Gyihova ɛkɛ ne banebɔlɛ nee nyilalɛ bieko. Bɛhunle ɔ mra nsa mɔɔ Dwɔnatan boka nwo la wɔ konle ne anu. Sɔɔlo bodale kpole, na ɔhunle ɔ nwo.​—1 Samoɛle 28:​6-​14; 31:​2-6.

Alɔbɔlɛ hunle Devidi kpole! Nrenyia zɔhane mɔɔ le atiakunlukɛnlɛma na ɔfa ɛtane ɔkyɛ la zunle Sɔɔlo mɔɔ hilele ye nyane na ɔmaanle ɔ nwo hyelele ye kpole la! Devidi hɛlɛle awolɛyelɛ edwɛne maanle Sɔɔlo nee Dwɔnatan. Nuhua ne mɔɔ ka ahonle kpalɛ la fale Devidi agɔnwo kpalɛ ne mɔɔ ɔkulo ye la anwo. Ɔhɛlɛle kɛ: “Mesu wɔ, me diema Dwɔnatan; ɛsonle bolɛ ɛmaa me somaa! Ɛhulole me ɛmanle ɔyɛle nwanwane, ɔdɛlale mraalɛ ɛhulolɛ bɔbɔ.”​—2 Samoɛle 1:​26.

Devidi arɛle anvi ndane mɔɔ ɔ nee Dwɔnatan hanle la. Ɛvolɛ dɔɔnwo anzi, ɔkpondɛle Dwɔnatan ara nrenyia Mɛfebɔhyɛte mɔɔ ɛnee le wuliravolɛ la na ɔnleanle ye. (2 Samoɛle 9:​1-​13) Ɔda ali kɛ Devidi zukoale dɔɔnwo vile Dwɔnatan nɔhalɛlilɛ yɛɛ ɛhulolɛ mɔɔ ɛnee ɔlɛ kɛ ɔbabeta ɔ gɔnwo ne anwo wɔ mekɛ mɔɔ anu yɛ se anu la anu. Yɛbazukoa debie yɛavi nu ɔ? Asoo yɛbahola yɛakpondɛ agɔnwolɛma le kɛ Dwɔnatan ɔ? Yɛbahola yɛayɛ agɔnwolɛ kpalɛ le kɛ Dwɔnatan ɔ? Ɛhɛe, saa yɛboa yɛ gɔnwo mɔ yɛmaa bɛnyia diedi nee anwodozo wɔ Gyihova anu, yɛfa nɔhalɛ mɔɔ yɛdi yɛamaa Nyamenle la yɛdimoa na yɛkpo angomedi na yɛkɔ zo yɛdi nɔhalɛ a, yɛbahola yɛayɛ agɔnwolɛma kpalɛ le kɛ Dwɔnatan. Na yɛbazukoa ye diedi ne.