Edwɛkɛsisilɛ Mɔɔ Tɔ Zo Nwiɔ 15:1-19
-
Esa vale nzenzaleɛ rale (1-19)
15 Akee Nyamenle sunsum ne rale Odɛde ara Azalaya anwo zo.
2 Ɔti ɔvindele ɔhɔyiale Esa na ɔzele ye kɛ: “O Esa nee Dwuda yɛɛ Bɛngyaman amuala, bɛdie me! Saa bɛkɔ zo bɛ nee Gyihova dua a, ɔ nee bɛ balua;+ yɛɛ saa bɛkpondɛ ye a, ɔbamaa bɛanwu ye,+ noko saa bɛkpo ye a, ɔbakpo bɛ.+
3 Ɔluakɛ mekɛ tendenle* mɔɔ ɛze ɛhɔ la, ɛnee nɔhalɛ Nyamenle ne ɛmboka Yizilayɛma anwo, bɛnlɛ ɛsɔfo mɔɔ kilehile bɛ yɛɛ bɛnlɛ mɛla.+
4 Noko saa bɛwɔ anwongyelelɛ nu na bɛsia bɛba Gyihova, Yizilayɛ Nyamenle ne ɛkɛ na bɛkpondɛ ye a, ɔmaa bɛnwu ye.+
5 Mekɛ zɔhane, awie biala angola andu adenle anzodwolɛ nu,* ɔluakɛ ɛnee menli mɔɔ de azɛlɛ ne azo la amuala ɛnlɛ anzodwolɛ.
6 Maanle zɛkyele maanle yɛɛ suakpole zɛkyele suakpole, ɔluakɛ Nyamenle luale ngyegyelɛ ngakyile kɔsɔɔti azo ɔmaanle basabasayɛlɛ zile bɛ avinli.+
7 Noko bɛmɛ, bɛmaa bɛ nwo ɛyɛ se yɛɛ bɛmmamaa bɛ sa nu to,*+ ɔluakɛ bɛbanyia bɛ gyima ne anwo ahatualɛ.”
8 Mɔɔ Esa dele edwɛkɛ ɛhye mɔ nee ngapezonli Odɛde ngapezo ne ala la, ɔnyianle akɛnrasesebɛ na ɔyeyele kyibadeɛ ananze ne mɔ ɔvile Dwuda+ nee Bɛngyaman azɛlɛ ne amuala nee azuamgbole mɔɔ ɔhonle ɔvale mɔɔ wɔ Yifelaem awoka ne mɔ azo la azo, na ɔyɛle Gyihova afɔlemokyea ne mɔɔ wɔ Gyihova sua ne abenlana ne anyunlu la boɛ.+
9 Na ɔboɔboale Dwudama nee Bɛngyamanema amuala, yɛɛ nyɛvolɛ mɔɔ bɛvi Yifelaem nee Manasɛ yɛɛ Semɛyɔn mɔɔ bɛ nee bɛ de la anloa,+ ɔluakɛ mekɛ mɔɔ bɛnwunle kɛ Gyihova ye Nyamenle ne nee ye lua la menli dɔɔnwo kpalɛ dule vile Yizilayɛ rale ye afoa.
10 Ɔti bɛyiale nu wɔ Gyɛlusalɛm wɔ siane mɔɔ tɔ zolɛ nsa wɔ Esa tumililɛ ne ɛvolɛ mɔɔ tɔ zolɛ 15 la anu.
11 Kenle ko zɔhane bɛvale ninyɛne mɔɔ bɛvenle bɛrale la bie bɛbɔle afɔle bɛmaanle Gyihova, nlankɛ 700 yɛɛ mboane 7,000.
12 Yeanga ye zɔ, bɛyɛle ngyekyeleɛ kɛ bɛfa bɛ ahonle muala nee bɛ ɛkɛla* muala bɛakpondɛ Gyihova, bɛ nenyia mɔ Nyamenle ne.+
13 Awie biala mɔɔ amkpondɛ Gyihova, Yizilayɛ Nyamenle ne la, saa ɔle kakula o, kpanyinli o, raalɛ o, nrenyia o, ɔwɔ kɛ bɛku ye.+
14 Ɔti bɛvale ɛnelɛ kpole, anyelielɛ ɛdeɛdeanlɛ nee aweɛne ndendenle yɛɛ mɛne bɛhanle ndane bɛhilele Gyihova.
15 Na Dwudama amuala lile fɛlɛko wɔ ndane ne anwo, ɔluakɛ bɛvile bɛ ahonle muala anu a bɛhanle ndane ne a, na bɛkpondɛle ye ɛsesebɛ yɛɛ ɔmaanle bɛnwunle ye,+ na Gyihova hɔle zo maanle bɛliele bɛ menle wɔ ɛleka biala.+
16 Belemgbunli Esa liele ye nana Meeyaka+ ɔbahyema* dibilɛ ne bɔbɔ vile ɔ sa nu, ɔluakɛ ɛnee yeyɛ bɛkyi ananze bie mɔɔ bɛfa bɛsonle ɛzonlenlɛ baka* ne la.+ Esa bubule ye bɛkyi ananze ne na ɔdinle ye motomoto na ɔhɔyelale ye wɔ Kedelɔn Bɔnza ne anu.+
17 Noko bɛanye+ ɛzonlenlɛ ɛleka ne mɔ* bɛanvi Yizilayɛ.+ Noko ɛnee Esa ahonle di munli* wɔ ye ngoane mekɛ* kɔsɔɔti anu.+
18 Na ɔvale ninyɛne mɔɔ ɔ nee ye papa ɛyɛ bɛ nwuanzanwuanza la ɔrale nɔhalɛ Nyamenle ne sua ne anu—dwɛtɛ fufule, nvutuke yɛɛ ninyɛne ngakyile.+
19 Konle biala anzi too Esa tumililɛ ne ɛvolɛ mɔɔ tɔ zolɛ 35 la azo.+
Ɔbodwɛkɛ
^ Hibulu aneɛ nu, “Na kenle dɔɔnwo.”
^ Hibulu aneɛ nu, “awie biala angola anva azondwolɛ avinde angɔ anzɛɛ anzia amba.”
^ Hibulu aneɛ nu, “bɛmmato bɛ sa aze.”
^ Nea Edwɛkɛbohilelɛ.
^ Anzɛɛ “raalɛ kpanyinli.”
^ Nea Edwɛkɛbohilelɛ.
^ Hibulu aneɛ nu, “ɛleka mɔɔ wɔ anwuma.”
^ Anzɛɛ “ɔdule ɔ nwo ɔmaanle bɔkɔɔ.”
^ Hibulu aneɛ nu, “ye kenle ne mɔ.”
