Edwɛkɛsisilɛ Mɔɔ Tɔ Zo Nwiɔ 26:1-23
26 Akee Dwudama amuala vale Yuzaya+ mɔɔ ɛnee yeli ɛvolɛ 16 la, na bɛyɛle ye belemgbunli bɛziele ye papa Amazaya agyakɛ anu.+
2 Ɔkyekyele Yilɔto+ bieko na ɔvale ɔmaanle Dwudama wɔ mekɛ mɔɔ bɛmaanle belemgbunli ne* nee ye nenyia mɔ hɔlale na ɔliele ɔ menle la.+
3 Yuzaya+ lile ɛvolɛ 16 la yɛɛ ɔrayɛle belemgbunli a, na ɔlile tumi ɛvolɛ 52 wɔ Gyɛlusalɛm. Ye mame duma a le Gyɛkɔlaya mɔɔ vi Gyɛlusalɛm la.+
4 Ɔhɔle zo ɔyɛle mɔɔ le kpalɛ wɔ Gyihova anye zo, kɛ mɔɔ ye papa Amazaya yɛle ala la.+
5 Na ɔhɔle zo ɔkpondɛle Nyamenle abo zo wɔ Zɛkalaya mɔɔ hilehilele ye maanle ɔzulole nɔhalɛ Nyamenle ne la mekɛ zo. Mekɛ mɔɔ ɛnee ɔlɛkpondɛ Gyihova abo zo la, nɔhalɛ Nyamenle ne maanle ɔkpazile.+
6 Ɔvindele ɔ nee Filisitiama+ hɔhonle na ɔbubule Gate+ bane ne, Gyabenɛ+ bane ne yɛɛ Ahyedɔdo+ bane ne. Akee ɔkyekyele azuamgbole wɔ Ahyedɔdo azɛlɛ zo nee Filisitiama avinli.
7 Nɔhalɛ Nyamenle ne hɔle zo boale ye maanle ɔlile Filisitiama, Areleebeama+ mɔɔ de Gɛbeeyale yɛɛ Mɛyunɛmma anwo zo konim.
8 Amɔnoma+ bɔle ɔ bo duale adwule maanle Yuzaya. Awieleɛ bɔkɔɔ ne, bɛdele ye nganeɛ wɔ Yigyibiti nehane, ɔluakɛ ɔnyianle tumi kpole kpalɛ.
9 Eza Yuzaya sisile tawa+ wɔ Gyɛlusalɛm wɔ Muleɛ Anlenkɛ Kpole ne,+ Bɔnza Anlenkɛ Kpole ne+ yɛɛ Mpila mɔɔ zuozua bane ne mɔ anzi la anwo ɛkɛ na ɔmaanle bɛ nwo gyinlanle bɛ kpalɛ.
10 Eza ɔsisile tawa+ wɔ fienemgbole ne anu na ɔdudule* bula dɔɔnwo (ɔluakɛ ɛnee ɔlɛ nyɛmoa dɔɔnwo kpalɛ); na ɔyɛle bie noko wɔ Hyifɛla nee azɛlɛ sɛsɛ* ne azo. Ɛnee ɔlɛ ɛyazonlɛma nee vanye tola zo neavolɛma wɔ awoka ne mɔ azo nee Kamɛle, ɔluakɛ ɛnee ɔ nye die egyinliyɛlɛ nwo.
11 Eza Yuzaya nyianle ɛlɔne mɔɔ bɛkɔ konle la. Bɛhyehyɛle bɛ ekpunli ekpunli mɔɔ bɛkɔ konle. Kɛlɛhɛlɛvolɛ Gyiyayɛle+ nee kpanyinli Meeyasaya mɔɔ vea Hananaya mɔɔ le belemgbunli ne mgbanyima ne mɔ ko abo la dianle bɛ na bɛhɛlɛle bɛ aluma.+
12 Mbusua mgbanyima mɔɔ nea konle nu katakyiema ɛhye mɔ anwo zo la amuala dodo le 2,600.
13 Sogyama mɔɔ vea bɛ bo la dodo le 307,500 mɔɔ bɛziezie bɛ nwo bɛmaa konle, sogyama mɔɔ bɛ nwo yɛ se kpalɛ mɔɔ bɛbaboa belemgbunli ne bɛamaa yeaho yeatia ye kpɔvolɛma la.+
14 Yuzaya vale enyinlike, atwɛ,+ bulalɛ kyɛlɛ, konle tɛladeɛ,+ ɛda yɛɛ totoabɔ awolɛ+ maanle ɛlɔnema ne amuala.
15 Eza ɔmaanle menli mɔɔ hyehyɛ milahyinli la hyehyɛle milahyinli mɔɔ bɛfa bɛtoto akodeɛ la wɔ Gyɛlusalɛm; bɛvale bɛzieziele tawa ne mɔ+ azo nee bane ne mɔ mgbɛnezo mɔɔ bɛkola bɛto ɛda mbaka nee awolɛ mgbole a. Yemɔti bɛdele ye nganeɛ wɔ ɛleka biala, ɔluakɛ ɔnyianle moalɛ kpole kpalɛ na ɔ nwo yɛle se.
16 Noko mɔɔ ɔ nwo yɛle se ala la, ye ahonle memaanle ɔ nwo zo na ɔzɛkyele ɔ nwo, na yeanli nɔhalɛ yeammaa Gyihova ye Nyamenle ne, ɔhɔwolole Gyihova ɛzonlenlɛsua ne anu kɛ ɔyela ayilevuanlɛ wɔ ayilevuanlɛ afɔlemokyea ne azo.+
17 Ɛkɛ ne ala ɛsɔfo Azalaya nee Gyihova ɛsɔfoma gyɛne 80 mɔɔ bɛlɛ akɛnrasesebɛ la doale ye.
18 Bɛhɔgyinlanle Belemgbunli Yuzaya anyunlu ɛkɛ na bɛzele ye kɛ: “Yuzaya, ɔnle kpalɛ kɛ ɛbayela ayilevuanlɛ wɔamaa Gyihova!+ Ɛsɔfo ne mɔ ala a ɔwɔ kɛ bɛyela ayilevuanlɛ a, ɔluakɛ bɛle Aalɔn abozoamra,+ menli mɔɔ bɛde bɛ nwo a. Ɛvi ɛzonlenlɛsua ye anu finde, ɔluakɛ wɔanli nɔhalɛ na ɛnrɛnyia ɛhye anwo anyunlunyia biala ɛnrɛvi Gyihova Nyamenle ne ɛkɛ.”
19 Yuzaya mɔɔ ɛnee lɛ debie mɔɔ bɛkpu ayilevuanlɛ wɔ nu ɔ sa nu, kɛ ɔkayela ayilevuanlɛ la vale ɛya kpole;+ na mekɛ mɔɔ ɔvale ɛsɔfo ne mɔ anwo ɛya la, kokobɛ+ guale ɔ nwoma azo wɔ ɛsɔfo ne mɔ anyunlu wɔ Gyihova sua ne anu, wɔ ayilevuanlɛ afɔlemokyea ne anwo ɛkɛ.
20 Mɔɔ ɛsɔfo kpanyinli Azalaya nee ɛsɔfo ne mɔ amuala dole bɛ nye nleanle ye la, bɛnwunle kɛ kokobɛ ɛgua ɔ nwoma azo! Ɔti bɛvale ye bɛvile ɛkɛ ne bɛvindele ndɛndɛ, na ɔdaye mumua ne ɔyɛle ye ndɛ ɔvindele, ɔluakɛ ɛnee Gyihova ɛhwe ɔ nzo.
21 Belemgbunli Yuzaya yɛle kokobɛvolɛ too ɔhɔdwule kenle mɔɔ ɔwule la, na ɔhɔle zo ɔdɛnlanle sua gyɛne nu kɛ kokobɛvolɛ,+ ɔluakɛ bɛyele ye bɛvile Gyihova sua nu ɛkɛ. Ɛnee ɔ ra Dwotam a nea belemgbunli sua nu ɛkɛ, na ɔbua menli mɔɔ wɔ azɛlɛ ne azo la ndɛne a.+
22 Na Yuzaya anwo tetedwɛkɛ mɔɔ ɛha la, ɔvi mɔlebɛbo kɔdwu awieleɛ, Emɔzo ara ngapezonli Ayezaya+ hɛlɛle dole ɛkɛ.
23 Akee bɛmaanle Yuzaya nee ye nenyia mɔ hɔlale na ɔliele ɔ menle, na bɛziele ye wɔ ye nenyia mɔ anwo ɛkɛ, noko wɔ azie ne mɔɔ le arelemgbunli ne mɔ ɛdeɛ la azo,* ɔluakɛ bɛhanle kɛ: “Ɔle kokobɛvolɛ.” Na ɔ ra Dwotam+ ralile ye agya lile belemgbunli.
Ɔbodwɛkɛ
^ Ɛhye kile, ye papa Amazaya.
^ Anzɛɛ “boka azo sɛsɛ.”
^ Anzɛɛ “ɔbɔle,” ɔbayɛ kɛ ɔbɔle bɛ wɔ bodane nu.
^ Ɔbayɛ kɛ azɛlɛ ɛhye bikye alehelɛ ne mɔ azie ne.
