Edwɛkɛsisilɛ Mɔɔ Tɔ Zo Nwiɔ 34:1-33
34 Dwosaya+ lile ɛvolɛ mɔtwɛ la yɛɛ ɔrayɛle belemgbunli a, na ɔlile tumi ɛvolɛ 31 wɔ Gyɛlusalɛm.+
2 Ɔyɛle mɔɔ le kpalɛ wɔ Gyihova anye zo la na ɔluale ye nenyia Devidi ndenle ne mɔ anu, na yeanvi zolɛ yeangɔ fema zo anzɛɛ bɛne zo.
3 Wɔ ye tumililɛ ɛvolɛ ne mɔɔ tɔ zolɛ 8 la anu, mekɛ mɔɔ ɛnee ɔtɛde kakula la, ɔbɔle ɔ bo kɛ ɔkpondɛ ye nenyia Devidi Nyamenle ne abo zo;+ na wɔ ɛvolɛ mɔɔ tɔ zolɛ 12 la anu, ɔbɔle ɔ bo ɔyeyele ɛzonlenlɛ ɛleka ne mɔ* nee ɛzonlenlɛ mbaka* ne mɔ, ananze mɔɔ bɛgua la nee mbulalɛ ananze ne mɔ ɔvile Dwuda nee Gyɛlusalɛm.+
4 Eza bɛbubule Beeyale afɔlemokyea ne mɔ wɔ ɔ nyunlu ɛkɛ, na ɔpepɛle ayilevuanlɛ afɔlemokyea ne mɔ mɔɔ wɔ anwuma la ɔguale aze. Eza ɔbubule ɛzonlenlɛ mbaka* ne mɔ, ananze mɔɔ bɛgua yɛɛ mbulalɛ ananze ne mɔ anu azinli azinli na ɔdinle bɛ motomoto ɔkpondenle ye wɔ menli mɔɔ ɛnee bɔ afɔle maa bɛ la nla ne mɔ azo.+
5 Na ɔyelale ɛsɔfo ne mɔ mbowule wɔ bɛ afɔlemokyea ne mɔ azo.+ Ɔti ɔdele Dwuda nee Gyɛlusalɛm anwo.
6 Na wɔ Manasɛ, Yifelaem,+ Semɛyɔn too mɔɔ kɔdwu Nafetalae azuamgbole ne mɔ nee bɛ azua mɔɔ ɛbɛnga bɛ ɛyia mɔɔ bɛzɛkye bɛ la azo,
7 ɔbubule afɔlemokyea ne mɔ ɔguale aze na ɔbubule ɛzonlenlɛ mbaka* ne mɔ nee ananze mɔɔ bɛgua+ la anu, na ɔdinle bɛ motomoto; na ɔpepɛle ayilevuanlɛ afɔlemokyea kɔsɔɔti mɔɔ wɔ Yizilayɛ azɛlɛ ne azo amuala la ɔguale aze,+ na ɛhye anzi ɔziale ɔhɔle Gyɛlusalɛm.
8 Wɔ ye tumililɛ ɛvolɛ mɔɔ tɔ zolɛ 18 la azo, mɔɔ ɛnee yede azɛlɛ ne nee ɛzonlenlɛsua* ne anwo yewie la, ɔzoanle Azalaeya ara Hyeefan,+ Meeyasaya mɔɔ le kpanyinli wɔ suakpole ne azo yɛɛ Dwowahaze ara Dwowaa mɔɔ le kɛlɛvolɛ la kɛ bɛhɔyɛ Gyihova ye Nyamenle ne sua ne boɛ.+
9 Bɛrale ɛsɔfo kpanyinli Helekaya anwo ɛkɛ na bɛvale ezukoa ne mɔɔ bɛva bɛra Nyamenle sua nu ɛkɛ ne, mɔɔ Livaema mɔɔ sinza nlenkɛ ne mɔ la lieliele vile Manasɛ, Yifelaem yɛɛ Yizilayɛma mɔɔ ɛha la amuala ɛkɛ+ nee mɔɔ bɛlieliele bɛvile Dwuda, Bɛngyaman yɛɛ menli mɔɔ de Gyɛlusalɛm la ɛkɛ la bɛmaanle ye.
10 Akee bɛvale bɛmaanle bɛdabɛ mɔɔ bɛye bɛ kɛ bɛnlea Gyihova sua nu ɛkɛ ne gyima ne azo la. Gyimayɛvoma mɔɔ wɔ Gyihova sua nu ɛkɛ ne la noko vale zieziele sua ne na bɛyɛle ye boɛ.
11 Bɛvale bɛmaanle dwinvolɛma ne nee suasivoma ne kɛ bɛva bɛdɔ awolɛ mɔɔ bɛkpukekpuke nee mbaka mɔɔ bɛbava bɛasosɔ nu la na bɛva ndaboa* bɛsisi azua mɔɔ Dwuda arelemgbunli maanle bɛzɛkyele bɛ la.+
12 Na menli ne vale nɔhalɛlilɛ yɛle gyima ne.+ Bɛyele Livaema Gyeehate nee Obadaya mɔɔ bɛle Mɛlɛlaema+ la yɛɛ Zɛkalaya nee Mɛhyɛlam mɔɔ bɛle Kohatema+ la kɛ bɛli bɛ ti na bɛnlea gyima ne azo. Na Livaema mɔɔ bɛ muala bɛze edwɛne bɔ kpalɛ la,+
13 nleanle menli mɔɔ zoale sua ne anwo ninyɛne ne la nee menli mɔɔ yɛle gyima ngakyile ne mɔ la anwo zo; na ɛnee Livaema bie mɔ le kɛlɛhɛlɛvolɛma, mgbanyima yɛɛ nlenkɛ mgbole sinzavolɛma.+
14 Mɔɔ bɛlɛye ezukoa ne mɔɔ bɛva bɛra Gyihova sua ne anu bɛavinde la,+ ɛsɔfo Helekaya nwunle buluku ne mɔɔ Gyihova Mɛla ne+ mɔɔ ɔluale Mosisi anwo zo* ɔvale ɔmaanle+ la wɔ nu la.
15 Ɔti Helekaya zele kɛlɛhɛlɛvolɛ Hyeefan kɛ: “Menwu Mɛla buluku ne wɔ Gyihova sua nu ɛkɛ.” Ɛhye ati Helekaya vale buluku ne maanle Hyeefan.
16 Akee Hyeefan vale buluku ne rɛlɛle belemgbunli ne na ɔzele ye kɛ: “Wɔ sonvolɛma ne ɛlɛyɛ debie biala mɔɔ bɛze bɛ kɛ bɛyɛ la.
17 Bɛwola ezukoa ne mɔɔ bɛnyianle ye wɔ Gyihova sua nu ɛkɛ ne la, na bɛva bɛwula menli mɔɔ bɛkpa bɛ nee bɛdabɛ mɔɔ bɛlɛyɛ gyima ne la asa anu.”
18 Eza kɛlɛhɛlɛvolɛ Hyeefan zele belemgbunli ne kɛ: “Ɛsɔfo Helekaya ɛva buluku bie ɛmaa me.”+ Akee Hyeefan bɔle ɔ bo kɛ ɔkenga ye wɔ belemgbunli ne anyunlu ɛkɛ.+
19 Mɔɔ belemgbunli ne dele Mɛla ne anu edwɛkɛ ne ala la, ɔsuosuanle ye adɛladeɛ ne mɔ anu.+
20 Akee belemgbunli ne zele Helekaya, Hyeefan ara Ahaekam,+ Maeka ara Abedɔn, kɛlɛhɛlɛvolɛ Hyeefan yɛɛ belemgbunli ne sonvolɛ Asaya kɛ:
21 “Bɛhɔbiza Gyihova bɛmaa medame nee bɛdabɛ mɔɔ bɛtɛte Yizilayɛ nee Dwuda la wɔ buluku ne mɔɔ bɛnwu ye la anu edwɛkɛ ne anwo; ɔluakɛ Gyihova ɛya ne mɔɔ ɔbawola yeagua yɛ nwo zo la le kpole ɔboalekɛ yɛ nenyia mɔ anli Gyihova edwɛkɛ zo anyɛ mɔɔ bɛhɛlɛ ye wɔ buluku ne anu la amuala.”+
22 Ɔti Helekaya nee bɛdabɛ mɔɔ belemgbunli ne zoanle bɛ la hɔle ngapezonli raalɛ Hɛleda ɛkɛ.+ Ɔle Haahase ara Tekeva ara Hyalɛm mɔɔ nea adɛladeɛ ne mɔ azo la aye, na ɛnee ɔde Gyɛlusalɛm Sua Fofolɛ zo; na bɛ nee ye dendɛle wɔ ɛkɛ.+
23 Ɔzele bɛ kɛ: “Mɔɔ Gyihova, Yizilayɛ Nyamenle ne ɛha la ɛne, ‘Bɛha bɛhile nrenyia ne mɔɔ zoanle bɛ wɔ me nwo ɛke la kɛ:
24 “Mɔɔ Gyihova ɛha la ɛne, ‘Mebava munzule meara ɛleka ɛhye nee menli mɔɔ de zolɛ la anwo zo,+ amowa ne mɔ mɔɔ bɛhɛlɛ bɛ wɔ buluku ne anu+ mɔɔ bɛgengale ye wɔ Dwuda belemgbunli ne anyunlu la amuala.
25 Kɛmɔ bɛkpo me+ na bɛlɛbɔ afɔle bɛamaa esike ne ahɔ nyamenle gyɛne ne mɔ ɛkɛ+ ne kɛ bɛfa bɛ sa anloa gyima ne mɔ kɔsɔɔti bɛaha me ɛya la ati, me ɛya ne bawola agua ɛke na bɛnrɛhola ye nua.’”+
26 Noko Dwuda belemgbunli ne mɔɔ zoanle bɛ kɛ bɛrabiza Gyihova ɛkɛ ne edwɛkɛ la, bɛha bɛhile ye kɛ, “Mɔɔ Gyihova, Yizilayɛ Nyamenle ne ɛha la ɛne: ‘Mɔɔ fale edwɛkɛ ne mɔɔ wɔde la anwo la,+
27 kɛmɔ wɔ ahonle diele edwɛkɛ* ne na ɛbɛlɛle ɛ nwo aze wɔ Nyamenle anyunlu wɔ mekɛ mɔɔ ɛdele ye edwɛkɛ ne mɔɔ fale ɛleka ɛhye nee menli mɔɔ de zolɛ la anwo na ɛbɛlɛle ɛ nwo aze wɔ me nyunlu na ɛsuosuanle wɔ adɛladeɛ ne mɔ anu na ɛzunle wɔ me nyunlu la ati, medame noko mede wɔ edwɛkɛ ne,+ Gyihova a se a.
28 Ɛhye ati mebaboɔboa ɛ nloa meahɔboka wɔ nenyia mɔ anwo,* na bɛbado wɔ wɔ wɔ nla ne anu anzodwolɛ nu, na ɛ nye ɛnrɛnwu munzule ne mɔɔ mebava meara ɛleka ɛhye nee menli mɔɔ de zolɛ la anwo zo la amuala.’”’”+
Akee bɛvale mualɛ ne bɛhɔmaanle belemgbunli ne.
29 Ɔti belemgbunli ne zoanle maanle bɛhɔvɛlɛle Dwuda nee Gyɛlusalɛm mgbanyima kɔsɔɔti bɛrale.+
30 Ɛhye anzi belemgbunli ne nee Dwudama amuala, menli mɔɔ de Gyɛlusalɛm la, ɛsɔfoma ne, Livaema—menli ne amuala, mgbole nee ngyikyi vole hɔle Gyihova sua ne anu. Ɔgengale ngyekyeleɛ buluku ne mɔɔ bɛnwunle ye wɔ Gyihova sua ne anu la anu edwɛkɛ ne amuala ɔmaanle bɛdiele.+
31 Belemgbunli ne dwazole gyinlanle ye ɛleka ne na ɔyɛle ngyekyeleɛ*+ wɔ Gyihova anyunlu kɛ ɔbadoa Gyihova na yeava ye ahonle muala nee ye ɛkɛla* muala+ yeali ye mɛla, ye ngakyelɛ yɛɛ ye ngyehyɛleɛ ne mɔ azo na yeali ngyekyeleɛ ne anu edwɛkɛ ne mɔɔ bɛhɛlɛ ye wɔ buluku ɛhye anu la azo.+
32 Eza ɔmaanle menli mɔɔ wɔ Gyɛlusalɛm nee Bɛngyaman la amuala liele dole nu. Na menli mɔɔ de Gyɛlusalɛm la yɛle mɔɔ Nyamenle, bɛ nenyia mɔ Nyamenle ne ngyekyeleɛ ne kile la.+
33 Akee Dwosaya yeyele bɛkyi ninyɛne* ne mɔ amuala vile azɛlɛ ne mɔ mɔɔ le Yizilayɛma ɛdeɛ la amuala azo,+ na ɔmaanle awie biala mɔɔ wɔ Yizilayɛ la zonlenle Gyihova bɛ Nyamenle ne. Wɔ ye ngoane mekɛ nu amuala,* bɛandwe bɛ nwo bɛanvi Gyihova, bɛ nenyia mɔ Nyamenle ne anwo.
Ɔbodwɛkɛ
^ Hibulu aneɛ nu, “ɛleka mɔɔ wɔ anwuma la.”
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Hibulu aneɛ nu, “sua.”
^ Anzɛɛ “mbaka.”
^ Hibulu aneɛ nu, “ɔluale Mosisi asa zo.”
^ Hibulu aneɛ nu, “yɛle bɛtɛɛ.”
^ Ɛhye le ewule nwo edwɛkɛdwɛndolɛ.
^ Anzɛɛ “ɔyɛle ngyekyeleɛ ne fofolɛ.”
^ Nea Edwɛkɛbohilelɛ.
^ Anzɛɛ “ananze.”
^ Hibulu aneɛ nu, “Wɔ ye kenle ne mɔ anu amuala.”
