Dwɔn Mɔɔ Tɔ Zo Nsa 1:1-14
1 Nrenyia kpanyinli ne,* melɛkɛlɛ meahɔmaa kulovolɛ Geeyɛse mɔɔ mekulo ye nɔhalɛ nu la.
2 Kulovolɛ, meyɛ asɔne kɛ ɔwie wɔ boɛ wɔ debie biala anu na ɛde kpɔkɛ kpalɛ, kɛ mɔɔ ɔlɛwie wɔ* boɛ kɛkala la.
3 Na me nye liele kpole wɔ mekɛ mɔɔ mediema ne mɔ rale na bɛlile nɔhalɛ ne mɔɔ ɛlɛ nu la anwo daselɛ la, kɛ mɔɔ ɛlɛkɔ zo wɔalua nɔhalɛ ne anu la.+
4 Debie biala ɛnyɛ me anyelielɛ* ɛndɛla ɛhye: kɛ mekɛde kɛ me mra ne mɔ kɔ zo dua nɔhalɛ ne anu.+
5 Kulovolɛ, ɛda wɔ nɔhalɛlilɛ ali wɔ mɔɔ ɛyɛ ɛmaa mediema ne mɔ la anu, wɔ mekɛ bɔbɔ mɔɔ bɛle nyɛvolɛ la.+
6 Bɛli wɔ ɛlɔlɛ ne anwo daselɛ wɔ asafo ne anu. Mesɛlɛ wɔ, gyakyi bɛ adenle kɛ mɔɔ ɔkɛzɔ Nyamenle anye la.+
7 Ɔluakɛ ye duma nu ti a bɛhɔle a, na bɛanlie debie biala+ bɛanvi maanle maanle ne anu amra ɛkɛ.
8 Yemɔti ɔle yɛ gyima kɛ yɛkɛzonle menli zɛhae mɔ nyɛvolɛ,+ amaa yɛdayɛ noko yɛayɛ nɔhalɛ ne anwo gyimayɛvoma ne mɔ bie.+
9 Mengɛlɛle kɛlata mengɔmaanle asafo ne, noko Dayɛtelɛfizi mɔɔ kulo kɛ ɔdi bɛ nyunlu la,+ ɛnva ɛbulɛ ɛnlie debie biala mɔɔ vi yɛ ɛkɛ la ɛndo nu.+
10 Ɛhye ati a saa meba a, mebamaa gyima mɔɔ ɔlɛyɛ yeava yeaheha yɛ nwo edwɛkɛ ɛtane ɛtane la ala ali la.+ Yeanga ye zɔ, ɔkpo kɛ ɔkɛvi ɛbulɛ nu ɔkɛlie mediema ne mɔ;+ yɛɛ bɛdabɛ mɔɔ bɛkulo kɛ bɛdie bɛ la, ɔbɔ mɔdenle kɛ ɔsi bɛ adenle na yeadu bɛ yeavi asafo ne anu.
11 Kulovolɛ, mmasukoa mɔɔ le ɛtane la, emomu sukoa mɔɔ le kpalɛ la.+ Awie mɔɔ yɛ kpalɛ la vi Nyamenle.+ Awie mɔɔ yɛ ɛtane la ɛtɛnwunle Nyamenle.+
12 Bɛ muala yɛɛ nɔhalɛ mumua ne ɛli Dimiteleɛse anwo daselɛ kpalɛ. Nɔhalɛ nu, yɛdayɛ noko yɛlɛdi ɔ nwo daselɛ na ɛze kɛ yɛ daselɛlilɛ ne le nɔhalɛ.
13 Melɛ edwɛkɛ dɔɔnwo mɔɔ anrɛɛ ɔwɔ kɛ mekɛlɛ wɔ a, noko mengulo kɛ mefa pɛne nee ɛnke mekɛlɛ.
14 Noko akee, me nye la kɛ ɔnrɛhyɛ mebanwu ɛ nyunlu na me nee wɔ adendɛ.
Anzodwolɛ ɛha wɔ.
Yɛ gɔnwo mɔ biza wɔ. Bobɔ agɔnwolɛma ne mɔ aluma ngoko na biza bɛ maa me.
