Edwɛne 18:1-50
Kɔmaa edwɛndolɛma kpanyinli ne. Gyihova sonvolɛ Devidi a hanle edwɛne ɛhye anu edwɛkɛ ne hilele Gyihova wɔ kenle mɔɔ Gyihova liele ye vile ye kpɔvolɛma amuala nee Sɔɔlo asa anu la. Ɔhanle kɛ:+
18 O Gyihova, me anwosesebɛ, mekulo wɔ.+
2 Gyihova le me bodane nee me aranemgbole yɛɛ me Dievolɛ.+
Me Nyamenle ne le me bodane,+ ye nuhua a menriandi mekɔfea a,Me enyinlike nee me ngoanelielɛ* mɛne,* me ɛvealeka.*+
3 Mesu mefɛlɛ Gyihova mɔɔ fɛta ayɛlɛyelɛ la,Na ɔbalie me yeavi me kpɔvolɛma asa anu.+
4 Ewule nyɛma kyekyele me;+Sonlamgbanema azuyilɛ hanle me ɛzulolɛ.+
5 Nla* nyɛmanyɛma bɛkɛbɛkale me;Ewule zuale ɛhane wɔ me nyunlu.+
6 Wɔ me anwongyelelɛ nu, menzunle menvɛlɛle Gyihova,Menvɛlɛle me Nyamenle ne kɛ ɔboa me.
Ɔdele me ne wɔ ye ɛzonlenlɛsua ne anu,+Na me ɛzunlɛ dwule ɔ nzo nu.+
7 Na azɛlɛ ne bɔle ɔ bo kɛ ɔwoso na yeakpusu;+Awoka ne mɔ adiabo ne mɔ wosoleNa ɔkpusule ɔhɔle ɔ nyunlu nee ɔ nzi ɔluakɛ bɛha ye ɛya.+
8 Esike vi ɔ bonyi nu vindele,Sendɔlɔra vi ɔ nloa anu rale;+Samɛnlakɛ woonwu vi ye nu zɔle guale.
9 Mɔɔ ɔlɛdwu aze la, ɔmaanle anwuma belele,+Na ɛnee awozinli kabii wɔ ɔ gyakɛ abo.+
10 Ɔdɛnlanle kyɛlɔbe zo ɔdule ɔrale.+
Ɔdɛnlanle anwumabɔvolɛ* ndɛba zo ɔrale ndɛndɛ.+
11 Akee ɔvale awozinli ɔhedale ɔ nwo,+Bɛbɛngale ye bɛyiale kɛ ɛdanlɛsua,Ezulemungu nee amungu kisii.+
12 Ezuawolɛ nee samɛnlakɛVi wienyi ne mɔɔ wɔ ɔ nyunlu ɛkɛ ne la anu vindele amungu ne mɔ anu.
13 Na Gyihova hulule anwuma lɔ;+Anwuma Anwumanli ne maanle bɛdele ɔ ne+Na ezuawolɛ nee samɛnlakɛ dɔle.
14 Ɔtotole ye ɛda mbaka ne mɔ na ɔmaanle bɛbɔle asande;+Ɔkpakyele ye ɛsɛlɛmanye ne na ɔmaanle bɛ nye zo danle bɛ.+
15 Bɛnwunle nzule ne mɔ abo;*+O Gyihova, azɛlɛ ne adiabo ne mɔ vindele zo wɔ mekɛ mɔɔ ɛdeanle bɛ la,Ɔvi ɛ bonyi nu anwoma kpole ne anu.+
16 Ɔvi anwuma ɔdwule aze;Ɔzɔle me nu na ɔhwenle me ɔvile azule kuma ne anu.+
17 Ɔliele me ɔvile me kpɔvolɛ mɔɔ anwo yɛ se,+Bɛdabɛ mɔɔ bɛkpɔ me, mɔɔ bɛ nwo yɛ se tɛla me la asa anu.+
18 Bɛrale me nwo zo wɔ me amaneɛnwunlɛ kenle ne,+Noko Gyihova boale me.
19 Ɔvale me ɔhɔle ɛleka mɔɔ banebɔlɛ wɔ* la;Ɔliele me ɔluakɛ ɔ nye liele me nwo.+
20 Gyihova tua me kakɛ wɔ me tenleneyɛlɛ nwo;+Me sa anwo le bɔkɔbɔkɔ la ati, ɔmaa me nwolɛ ahatualɛ.+
21 Ɔluakɛ melua Gyihova ndenle ne mɔ anu,Yɛɛ metɛkpole me Nyamenle ne metɛyɛle ɛtane.
22 Ye ndɛnebualɛ kɔsɔɔti gua me nyunlu;Menrɛbu me nye menrɛgua ye mɛla ne mɔ azo.
23 Menrɛmaa edwɛkɛ ɛnrɛra me nwo wɔ ɔ nyunlu,+Na mebahwe me nwo meavi nvonleɛ nwo.+
24 Gyihova ɛdua me kakɛ wɔ me tenleneyɛlɛ ti,+Kɛ mɔɔ me sa anwo bɔkɔbɔkɔ ne de wɔ ɔ nyunlu la.+
25 Mɔɔ le nɔhavo la ɛdi nɔhalɛ ɛmaa ye;+Mɔɔ edwɛkɛ ɛnle ɔ nwo la ɛmaa ɔnwu kɛ edwɛkɛ ɛnle ɔ nwo;+
26 Mɔɔ anwo te la ɛmaa ɛ nwo te maa ye,+Noko mɔɔ le mɛlɛbɛla la ɛngola ɛmbɛlɛbɛla wɔ.+
27 Ɔluakɛ ɛdie koahweabanema*+Noko ɛbɛlɛ anwomemaazoma* aze.+
28 O Gyihova, wɔmɔ a ɛmaa me kɛnlaneɛ ta a,Me Nyamenle ne mɔɔ maa me awozinli kakyi wienyi la.+
29 Wɔ moalɛ zo, mekola mefoa sogyama nwule ekpunli;+Ɔlua Nyamenle tumi zo, mekola mewulu bane.+
30 Nɔhalɛ Nyamenle ne adenle di munli;+Bɛdu Gyihova edwɛkɛ ne anu.+
Ɔle enyinlike ɔmaa bɛdabɛ mɔɔ bɛnriandi bɛkɔfea ye nu la amuala.+
31 Nwane a le Nyamenle kɛ Gyihova a?+
Yɛɛ nwane a le bodane kɛ yɛ Nyamenle ne a?+
32 Nɔhalɛ Nyamenle ne a maa me anwosesebɛ a,+Na ɔbamaa me adenle ali munli.+
33 Ɔmaa me gyakɛ yɛ kɛ weɛlɛ gyakɛ la;Ɔmaa megyinla ɛleka mɔɔ wɔ anwuma la.+
34 Ɔtete me sa ɔmaa konle;Me sa kola bele kɔbele ɛda.
35 Ɛfa wɔ ngoanelielɛ enyinlike ne ɛmaa me,+Ɛ sa fema ne boa me,*Na wɔ mɛlɛbɛnwoaze ne maa meyɛ sonlakpole.+
36 Ɛbuke me gyakɛ abo zo adenle nu;Me gyakɛ ɛnrɛtele.+
37 Mebavoa me kpɔvolɛma na meahye bɛ;Menrɛzia kɔkpula kɛ mekɛbɔ bɛ bo zo.
38 Mebabubu bɛ amaa bɛandwazo bieko;+Bɛbadu bagua me gyakɛ abo.
39 Ɛbamaa meanyia anwosesebɛ meava meaho konle ne;Ɛbamaa me kpɔvolɛma agolo agua me gyakɛ abo.+
40 Ɛbamaa me kpɔvolɛma avi me nyunlu,*Na meazɛkye bɛdabɛ mɔɔ bɛkpɔ me la.+
41 Bɛsu bɛkpondɛ moalɛ, noko bɛnnyia awie ɛnlie bɛ;Bɛsu bɛfɛlɛ Gyihova bɔbɔ, noko ɔndie bɛ.
42 Mebadi bɛ motoo kɛ munlutu wɔ anwoma nu;Mebavuandi bɛ meagua kɛ gua zo ndɛtɛlɛ.
43 Ɛbalie me wɔavi tendɛtiama asa anu.+
Ɛbamaa meanlea maanle maanle nwo zo.+
Menli mɔɔ menze bɛ la bazonle me.+
44 Bɛte amaneɛbɔlɛ bɔbɔ ala a, bɛbadie me;Nyɛvolɛ barabɔ bɛ ti aze amaa me.+
45 Nyɛvolɛ ɛnrɛnyia akɛnrasesebɛ;Bɛbava anwowosolɛ bɛavi bɛ aranemgbole ne mɔ anu bɛara.
46 Gyihova de aze! Ayɛlɛyelɛ ɛha me Bodane ne!+
Maa bɛkpogya me ngoanedievolɛ Nyamenle ne zo.+
47 Nɔhalɛ Nyamenle ne di nzenralɛ maa me;+Ɔmaa menli ne fea me bo.
48 Ɔdie me ɔfi me kpɔvolɛma mɔɔ ɛva ɛya la asa anu;Ɛkpogya me zo ɛmaa mɛtɛla menli mɔɔ ba me nwo zo la;+Ɛdie me ɛfi sonla mɔɔ yɛ amumuyɛ la asa anu.
49 O Gyihova, ɛhye ati mebawula wɔ anyunlunyia wɔ maanle maanle ne mɔ anu,+Na meado ayɛlɛyelɛ edwɛne meamaa wɔ duma ne.+
50 Ɔyɛ ngoanelielɛ gyima mgbole* ɔmaa ye belemgbunli ne;+Ɔda ɛlɔlɛ kpundii ali ɔkile ahenle mɔɔ yekpokpa ye la,+Devidi nee ɔ bo zo amra dahuu.+
Ɔbodwɛkɛ
^ Anzɛɛ “me dievolɛ mɔɔ lɛ tumi.”
^ Nea Edwɛkɛbohilelɛ.
^ Anzɛɛ “aranemgbole.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Hibulu aneɛ nu, “sunsum.”
^ Anzɛɛ “ndenle mɔɔ nzule dua nu la.”
^ Anzɛɛ “tɛlɛ.”
^ Anzɛɛ “menli mɔɔ bɛkile bɛ nyane la.”
^ Hibulu aneɛ nu, “anwomemaazo ɛnyelɛ.”
^ Anzɛɛ “sɔ me nu.”
^ Anzɛɛ “Ɛbava me kpɔvolɛma anzi wɔamaa me.”
^ Anzɛɛ “ɔdi konim mgbole.”
