Nɔmbɛse 11:1-35
-
Bɛ nzo abo ɛdendɛlɛ maanle senle vile Nyamenle ɛkɛ rale (1-3)
-
Menli ne zunle kpondɛle nane (4-9)
-
Mosisi dele nganeɛ kɛ ɔnrɛhola gyima ne yɛ (10-15)
-
Gyihova maanle mgbanyima 70 sunsum ne bie (16-25)
-
Ɛledade nee Midade; Dwɔhyua twe Mosisi ati nungule (26-30)
-
Nloma rale; bɛhwenle menli ne anzo wɔ anyebolo nwo (31-35)
11 Akee menli ne bɔle ɔ bo dendɛle bɛ nzo abo ɛya zo tiale Gyihova. Mɔɔ Gyihova dele la, ɔvale ɛya, na senle vi Gyihova ɛkɛ ne radɔle bɛ avinli na ɔyelale menli bie wɔ azokoɛleɛ ne anzi lɔ.
2 Mɔɔ menli ne zunle vɛlɛle Mosisi la, ɔzɛlɛle Gyihova+ na senle ne nlunle.
3 Yemɔti bɛvɛlɛle ɛkɛ ne Tabɛla,* ɔluakɛ senle mɔɔ vi Gyihova ɛkɛ ne la dɔle bɛ avinli wɔ ɛkɛ.+
4 Menli gyɛne dɔɔnwo*+ mɔɔ wɔ bɛ avinli la lale angomedi atiakunluwɔzo ali,+ na Yizilayɛma noko bɔle ɔ bo zunle bieko na bɛhanle kɛ: “Nwane a bamaa yɛ nane yɛali a?+
5 Nea kɛzi yɛkakye fɛlɛ mɔɔ ɛnee yɛdi wɔ Yigyibiti mɔɔ yɛndua ɛhwee, nee kɔkumba, wɔtamelɔn, liiki, anweɛ yɛɛ galeke* la!+
6 Noko kɛkala yɛ* anwosesebɛ ɛlɛwie. Yɛnnwu ɛhwee kɛ mana ɛhye ala.”+
7 Ɛnee mana ne+ le kɛ ma fufule ekyi bie,+ yɛɛ ɔzɔho bedɛleɔn.*
8 Menli ne finde kɔsesa na bɛti ye wɔ ɛdibolɛ zo anzɛɛ bɛsi ye duba nu. Akee bɛto ye wɔ danesɛne nu anzɛɛ bɛfa bɛyɛ paano ngunguma,+ na ɛnee ye fɛlɛko le kɛ keeki menlemenle mɔɔ bɛva nwole bɛyɛ la.
9 Saa ɛbɔlɛ tɔ azokoɛleɛ ɛkɛ ne nɔɔzo a, mana ne noko tɔ gua zolɛ.+
10 Mosisi dele kɛ abusua biala anu menli ɛlɛsu, ko biala gyi ye ɛdanlɛsua ne anuhɔlɛ. Na Gyihova vale ɛya kpole,+ yɛɛ Mosisi noko anye anlie nwolɛ fee.
11 Akee Mosisi zele Gyihova kɛ: “Duzu ati a wɔhile wɔ sonvolɛ nyane a? Duzu a meyɛ mɔɔ ɛ nye ɛnlie nwolɛ mɔɔ ɔti wɔva menli ɛhye mɔ kɔsɔɔti adesoa ne wɔzoa me a?+
12 Asoo medame a menrenzɛle menli ɛhye mɔ amuala ɔ? Asoo medame a menwole bɛ mɔɔ ɔti ɛka ɛkile me kɛ, ‘Fia bɛ wɔ ɛ kɛnra azo kɛ mɔɔ awie* mɔɔ nea kakula la fia ye wɔ ɔ kɛnra azo la,’ na menva bɛ mengɔ azɛlɛ ne mɔɔ ɛvale ɛbɔle bɛ nenyia mɔ ɛwɔkɛ la azo a?+
13 Nienwu a mebanyia nane meamaa menli ɛhye mɔ amuala a? Ɔluakɛ dahuu bɛsu bɛkile me kɛ, ‘Maa yɛ nane yɛli!’
14 Me ngomekye menrɛhola menrɛzoa menli ɛhye mɔ amuala adesoa ne; ɔbo me nwo zo.+
15 Saa kɛ ɛbayɛ me la ɛdeɛ a, ɛnee mesɛlɛ wɔ, ku me kɛkala.+ Saa menyia ɛ nyunlu ɛlolɛ a, ɛnee mmamaa menwu munzule bieko.”
16 Gyihova buale Mosisi kɛ: “Boɔboa Yizilayɛ mgbanyima 70, mrenyia mɔɔ ɛnea a* bɛle mgbanyima nee menli titili wɔ menli ne anu la anloa maa me,+ na fa bɛ kɔ nyianu ɛdanlɛsua ne anwo, na maa bɛ nee wɔ ɛgyinla ɛkɛ.
17 Mebadwu+ na me nee wɔ adendɛ wɔ ɛkɛ,+ na mebaye sunsum ne mɔɔ wɔ ɛ nwo zo la bie+ meamaa bɛ, na bɛbaboa wɔ bɛamaa wɔazoa menli ne adesoa ne, amaa ɛ ngomekye wɔanzoa.+
18 Ka kile menli ne kɛ, ‘Bɛde bɛ nwo bɛmaa ɛhyema,+ ɔluakɛ bɛbali nane, ɔboalekɛ bɛzu bɛmaa Gyihova ɛde+ na bɛha kɛ: “Nwane a bamaa yɛ nane yɛali a? Ɛnee yɛ nwo tɔ yɛ wɔ Yigyibiti.”+ Kɛ ɔde ye biala la, Gyihova bamaa bɛ nane na bɛali.+
19 Bɛnrɛli ye kenle ko anzɛɛ kenle 2 anzɛɛ kenle 5 anzɛɛ kenle 10 anzɛɛ kenle 20,
20 emomu bɛbali ye siane mumua ko, kɔkpula kɛ ɔbavindevinde bɛ bonyi nu na yeayɛ bɛ ɛtane la,+ ɔluakɛ bɛkpo Gyihova mɔɔ wɔ bɛ avinli la na bɛzu bɛhile ye kɛ: “Duzu ati a yɛvile Yigyibiti a?”’”+
21 Akee Mosisi hanle kɛ: “Menli mɔɔ me nee bɛ lua la le mrenyia 600,000+ mɔɔ dua aze noko ɛse, ‘Mebamaa bɛ nane bɛali, na bɛbali ye siane mumua ko’!
22 Saa bɛku mboane nee nlankɛ dɔɔnwo bɔbɔ a, asoo ɔbaza bɛ? Anzɛɛ saa bɛkye nyevile nu fɛlɛ kɔsɔɔti a, asoo ɔbaza bɛ?”
23 Akee Gyihova zele Mosisi kɛ: “Asoo Gyihova asa le ezinra somaa ɔ?+ Akee ɛbanwu ye saa mɔɔ meha la bayɛ zɔ anzɛɛ ɔnrɛyɛ zɔ a.”
24 Ɔti Mosisi hɔhanle Gyihova edwɛkɛ ne hilele menli ne. Na ɔboɔboale menli ne anu mgbanyima 70 anloa na ɔmaanle bɛgyinlanle ɛdanlɛsua ne anwo.+
25 Akee Gyihova luale amungu nu dwule+ na ɔdendɛle ɔhilele ye+ na ɔyele sunsum ne mɔɔ wɔ ɔ nwo zo la bie+ ɔmaanle mgbanyima 70 ne anu ko biala. Na mɔɔ sunsum ne dwule bɛ nwo zo ala la, bɛbɔle ɔ bo bɛyɛle bɛ nyɛleɛ kɛ ngapezoma,*+ noko bɛanyɛ zɔhane bieko.
26 Ɛnee mrenyia ne mɔ anu nwiɔ tɛbɔ azokoɛleɛ ɛkɛ ne. Bɛfɛlɛ bɛ Ɛledade nee Midade. Na sunsum ne rale bɛ nwo zo, ɔluakɛ ɛnee bɛboka menli mɔɔ bɛhɛlɛle bɛ aluma la anwo noko bɛangɔ ɛdanlɛsua ne anwo bie. Yemɔti bɛbɔle ɔ bo bɛyɛle bɛ nyɛleɛ kɛ ngapezoma wɔ azokoɛleɛ ɛkɛ.
27 Na kpavolɛ bie nriandile rabɔle Mosisi amaneɛ kɛ: “Ɛledade nee Midade ɛlɛyɛ bɛ nyɛleɛ kɛ ngapezoma wɔ azokoɛleɛ ne!”
28 Yemɔti Nɛn ara Dwɔhyua+ mɔɔ le Mosisi sonvolɛ ɔvi ye mgbavolɛ nu la hanle kɛ: “Me menle Mosisi, tua bɛ!”+
29 Na Mosisi zele ye kɛ: “Ɛtwe me ti nungule ɔ? Kyɛkyɛ, me kunlu a anrɛɛ Gyihova menli ne amuala le ngapezoma na Gyihova ava ye sunsum ne amaa bɛ!”
30 Nzinlii Mosisi nee Yizilayɛ mgbanyima ne mɔ ziale hɔle azokoɛleɛ ɛkɛ ne.
31 Akee anwoma bie vi Gyihova ɛkɛ ne dule na ɔpianle nloma* ɔvile nyevile nu ɔraguale azokoɛleɛ ɛkɛ ne amuala,+ ye foa ko le kenle ko adenle yɛɛ ye foa ko noko le kenle ko adenle wɔ azokoɛleɛ ɛkɛ ne amuala, ɔvi ye aze kɔdwu anwuma la le kɛyɛ kubit* nwiɔ.
32 Yemɔti kenle zɔhane amuala nee ye nɔe ne yɛɛ alehyenlɛ ne anu kɔsɔɔti, menli ne dwazole hɔsesale nloma. Mɔɔ annyia bie fee la ɛdeɛ le homa* bulu na bɛrɛlɛle bɛ wɔ azokoɛleɛ ɛkɛ ne amuala.
33 Noko mɔɔ nane ne veɛvea bɛ gye nu mɔɔ bɛtɛkposale bɛtɛwiele la, Gyihova vale menli ne anwo ɛya na Gyihova maanle ewulenzane hunle menli dɔɔnwo.+
34 Yemɔti bɛvɛlɛle ɛkɛ ne Kibolɔto-hateeyava*+ ɔluakɛ ɛkɛ ne a bɛziele menli mɔɔ lale angomedi atiakunluwɔzo ali la a.+
35 Menli ne vile Kibolɔto-hateeyava na bɛhɔle Hazilɔto, na bɛdɛnlanle Hazilɔto.+
Ɔbodwɛkɛ
^ Ɔ bo kile “Ɛlɛyela,” ɛhye kile, sendɔlɔra; senle.
^ Ɛhye mɔ le menli mɔɔ ɛnle Yizilayɛma mɔɔ wɔ bɛ avinli la.
^ Anzɛɛ “alɛta anweɛ.”
^ Anzɛɛ “yɛ ɛkɛla ne mɔ.”
^ Anzɛɛ “nrenyia.”
^ Anzɛɛ “ɛze bɛ kɛ.”
^ Anzɛɛ “bɛbɔle ɔ bo bɛhanle ngapezo.”
^ Aloma doboo bie mɔɔ le kɛ kandalɛ la.
^ Ɔ bo kile “Atiakunluwɔzo Azie.”
