Nolobɔvo 5:1-20
5 Saa ɛkɔ nɔhalɛ Nyamenle ne sua nu a, nea ɛ gyakɛ ɛdudulɛ boɛ;+ ɔle kpalɛ kɛ ɛbahɔ na wɔahɔdie+ tɛla kɛ ɛbabɔ afɔle kɛ mɔɔ ahoasea yɛ la,+ ɔluakɛ bɛnze kɛ mɔɔ bɛlɛyɛ la le ɛtane.
2 Mmamaa ɛ nloa yɛ ndɛ, yɛɛ mmamaa wɔ ahonle tendɛ ndɛndɛ wɔ nɔhalɛ Nyamenle ne anyunlu,+ ɔluakɛ nɔhalɛ Nyamenle ne wɔ anwuma yɛɛ wɔmɔ ɛwɔ azɛlɛ ye azo. Ɛhye ati a ɔnle kɛ wɔ edwɛkɛ so la.+
3 Ɔluakɛ adwenleadwenle dɔɔnwo maa bɛka ɛlalɛ,+ yɛɛ ɛdendɛlɛ dɔɔnwo maa bɛte koasea ne.+
4 Saa ɛbɔ Nyamenle ɛwɔkɛ a mmakyɛ na wɔadua,+ ɔluakɛ ɔ nye ɛnlie ahoasea nwo.+ Mɔɔ wɔbɔ nwolɛ ɛwɔkɛ la, tua.+
5 Ɔle kpalɛ kɛ ɛnrɛbɔ ɛwɔkɛ tɛla kɛ ɛbabɔ ɛwɔkɛ na ɛnrɛdua.+
6 Mmamaa ɛ nloa fa wɔ* kɔ ɛtane nu,+ yɛɛ mmaka ye wɔ anwumabɔvolɛ* ne anyunlu kɛ nvonleɛ ɔ.+ Duzu ati a ɛmaa nɔhalɛ Nyamenle ne ava ɛya wɔ mɔɔ wɔha la anwo na yeazɛkye ɛ sa anloa gyima ɛ?+
7 Ɔluakɛ kɛ mɔɔ ninyɛne dɔɔnwo nwo ɛdwenlenlɛ maa bɛka ɛlalɛ la,+ zɔhane ala a ɛdendɛlɛ dɔɔnwo maa bɛka edwɛkɛ mgbane a. Noko sulo nɔhalɛ Nyamenle ne.+
8 Saa ɛnwu kɛ bɛlɛsisi ehyiavolɛma, na bɛlɛkyea pɛlepɛlelilɛ nee tenleneyɛlɛ wɔ wɔ maangyeba ne anu a, mmamaa edwɛkɛ ne si ɛ nwo.+ Ɔluakɛ awie mɔɔ kpogya tɛla kpanyinli zɔhane la ɛlɛnea ye, yɛɛ awie mɔ noko tɛbɔ ɛkɛ mɔɔ bɛkpogya kpalɛ bɛtɛla bɛdabɛ a.
9 Eza menli mɔɔ wɔ azɛlɛ ne azo la amuala a kyɛ zolɛ nvasoɛ ne a; belemgbunli ne bɔbɔ di azɛlɛ ne azo aleɛ ne bie.+
10 Mɔɔ kulo dwɛtɛ fufule la akunlu ɛnrɛdwo dwɛtɛ fufule nwo ɛlɛ, yɛɛ mɔɔ kulo anwonyia la akunlu ɛnrɛdwo ezukoa nwo ɛlɛ.+ Ɛhye noko le mgbane.+
11 Saa ninyɛne mgbalɛ so a, menli mɔɔ di la anwo so.+ Na duzu nvasoɛ a ɔ menle nyia a? Tɛ ɔ nye ala a ɔbava yeanlea ɔ?+
12 Saa sonvolɛ nyia aleɛ ekyi anzɛɛ dɔɔnwo di bɔbɔ a, ye nafelɛ yɛ ye fɛ, noko sukoavolɛ anwonyia dɔɔnwo ne ɛmmaa ɔngola da.
13 Menwu munzule* kpole bie wɔ ewiade ye anu: sonla boɔboa ye anwonyia nloa sie too ɔyɛ ngyegyelɛ ɔmaa ye.
14 Gyima bie mɔɔ angɔ ye boɛ la maa zɔhane anwonyia ne mɔ minli, na ɔkawo ɔ ra nrenyia la, ɛnee ɔnlɛ ɛhwee.+
15 Kɛ mɔɔ awie dɛ ɔ nwo zɔ fi ye mame akunlu ba la, zɔhane ala a ɔbahɔ a.+ Na ɔnrɛhola ɔnrɛva ɔ sa anloa gyima ɛsesebɛ kɔsɔɔti anu debie ɔnrɛhɔ.+
16 Ɛhye noko le munzule* kpole: Kɛzi ɔrale la zɔhane ala a ɔbahɔ a; na duzu nvasoɛ a awie mɔɔ yɛ gyima ɛsesebɛ gua anwoma nu la nyia a?+
17 Eza dahuu ɔdi ye aleɛ wɔ awozinli nu, na ye nyanelilɛ, ye anwodolɛ nee ye ɛya yɛ kpole.+
18 Debie mɔɔ menwu kɛ ɔle kpalɛ na ɔfɛta la ɛne: ɔwɔ kɛ sonla didi na ɔnono na ɔ nye die gyima ɛsesebɛ kɔsɔɔti mɔɔ ɔfɛ ɔyɛ wɔ ewiade ye,+ wɔ ye ngoane mekɛ ezinra ne mɔɔ nɔhalɛ Nyamenle ne ɛva ɛmaa ye la anwo, ɔluakɛ ɛhye a le ye ahatualɛ* a.+
19 Eza saa nɔhalɛ Nyamenle ne maa awie anwonyia nee agyapadeɛ+ nee tumi kɛ ɔva ɔlie ɔ nye a, ɔwɔ kɛ ɔdie ye ahatualɛ* ne na ɔdie ɔ nye wɔ ye gyima ɛsesebɛ nwo. Ɛhye le Nyamenle ahyɛlɛdeɛ.+
20 Na ɔnrɛnwu* kɛ ye ngoane mekɛ ɛlɛse ahɔ, ɔluakɛ nɔhalɛ Nyamenle ne maa ɔ nye die ye ahonle nu.+
Ɔbodwɛkɛ
^ Anzɛɛ “soanvolɛ.”
^ Hibulu aneɛ nu, “wɔ nwonane ne.”
^ Anzɛɛ “alɔbɔlɛ edwɛkɛ.”
^ Anzɛɛ “alɔbɔlɛ edwɛkɛ.”
^ Anzɛɛ “kyɛfoa.”
^ Anzɛɛ “kyɛfoa.”
^ Anzɛɛ “ɔnrɛhakye.”
