Ayezaya 14:1-32
14 Gyihova baze Gyekɔbo anwunvɔne,+ na yeazia yeava Yizilayɛ.+ Ɔbamaa bɛadɛnla* bɛ azɛlɛ ne azo,+ na nyɛvolɛ baraboka bɛ nwo na bɛava bɛ nwo bɛabeta Gyekɔbo abozoamra.+
2 Na menli bava bɛ azia ara bɛ bo zo ne, na Yizilayɛma bava bɛ ayɛ azonvolɛ mrenyia nee mraalɛ+ wɔ Gyihova azɛlɛ ne azo; na bɛbava menli mɔɔ vale bɛ hɔle akɛlɛzonlenlɛ nu la bɛahɔ akɛlɛzonlenlɛ nu, na bɛanlea menli mɔɔ sisile bɛ maanle bɛyɛle gyima* la anwo zo.
3 Kenle mɔɔ Gyihova bamaa bɛalie bɛ menle bɛavi bɛ nyane nee bɛ abodelɛ yɛɛ gyima ɛsesebɛ mɔɔ bɛmaa bɛyɛ la anwo la,+
4 bɛbabu ɛrɛlɛ* ɛhye bɛatia Babelɔn belemgbunli ne kɛ:
“Nea kɛzi ahenle mɔɔ sisi awie mɔ ɔmaa bɛyɛ gyima la* awieleɛ ɛra ye ɛ!
Nea kɛzi nzisi ne ɛra awieleɛ ɛ!+
5 Gyihova ɛbubu amumuyɛma baka ne anu,Yebubu tumivolɛma kpɔma ne anu,+
6 Awie mɔɔ fa ɛya bobɔ menli mɔɔ ɔngyakyi bɛ ɛbobɔlɛ,+Awie mɔɔ fa ɛya di maanle maanle nwo zo tumi mɔɔ ɔngyakyi bɛ kpɔdekpɔdeyɛlɛ la.+
7 Azɛlɛ ne azo amuala ɛdwo, ngyegyelɛ biala ɛnle zo.
Menli fa fɛlɛkolilɛ teɛdea nu.+
8 Dwunipa mbaka nee Lɛbanɔn sida mbaka bɔbɔ,Di ɛ nwo fɛlɛko.
Bɛka kɛ, ‘Sumunli kɛ ɛdɔle aze la,Awie ɛtɛbale kɛ ɔbabubu yɛ yeagua.’
9 Nla* bɔbɔ mɔɔ wɔ azɛlɛ bo la hehanle ɔ nwoKɛ ɔbarayia wɔ wɔ mekɛ mɔɔ ɛlɛba la.
Ɛdawɔ ti, menli mɔɔ ewule ɛlie bɛ tumi la dwazo,Azɛlɛ ye azo tumivolɛma atisesebɛ* kɔsɔɔti.
Ɔmaa maanle maanle ne anu arelemgbunli kɔsɔɔti dwazo fi bɛ arelemgbunli mbia zo.
10 Bɛ muala bɛtendɛ na bɛse wɔ kɛ,‘Ɛdawɔ noko wɔyɛ bɛtɛɛ kɛ yɛdayɛ la ɔ?
Wɔyɛ kɛ yɛdayɛ la ɔ?
11 Wɔ anwomemaazo nee wɔ getaa* dede neƐrawie Nla* ne anu.+
Azonlɛ ɛyɛ ɛkpa mɔɔ ɛla zo,Yɛɛ azone a ɛyɛ ɛdanlɛ ɛheda ɛ nwo a.’
12 O wɔmɔ mɔɔ ɛta, aleɛbahye ralɛ,Nea kɛzi ɛvi anwuma wɔdɔ aze a!
Wɔmɔ mɔɔ ɛtudu maanle maanle bo,Nea kɛzi bɛpɛ wɔ bɛdo aze a!+
13 Ɛhanle ye wɔ wɔ ahonle nu kɛ, ‘Mebavo meahɔ anwuma lɔ.+
Mebamaa me belemgbunli ebia ne zo meazie Nyamenle nwɔlɔra ne mɔ ati zo,+Na mebadɛnla nyianu boka ne azo,Wɔ sɔlɔ moamoa lɔ.+
14 Mebavo meahɔ amungu ne ati zo;Mebayɛ me nwo kɛ Anwuma Anwumanli ne.’
15 Noko bɛbava wɔ bɛahɔ Nla* ne anu,Wɔ kuma ne abo moamoa lɔ.
16 Menli mɔɔ kɛnwu wɔ la banlea wɔ kpoonwu;Bɛbanlea wɔ kpalɛ na bɛaha kɛ,‘Asoo tɛ sonla ɛhye a ɛnee kpusu azɛlɛ ne,Na ɔmaa arelemgbunlililɛ woso la?+
17 Tɛ ɔdaye a ɔmaanle azɛlɛ ye yɛle kɛ fienemgboleNa ɔzɛkyele zolɛ azuamgbole,+Na ɔkpole kɛ ɔkɛmaa ye pilizama kɛhɔ sua nu la?’+
18 Maanle maanle ne mɔ arelemgbunli kɔsɔɔti,Ɛhɛe, bɛ muala, bɛdeda ye anyunlunyia nu,Ko biala wɔ ye nla* nu.
19 Noko wɔmɔ, bɛvuandi wɔ bɛdo wɔ lɔ mɔɔ ɛnle nla nu,Kɛ baka ngane mɔɔ bɛkpo ye,Bɛva menli mɔɔ bɛvale dadeɛ bɛhunle bɛ la bɛheda ɛ nwo,Menli mɔɔ bɛgua bɛ wɔ kuma mɔɔ awolɛ wɔ nu la anu,Kɛ avunli mɔɔ bɛtietia zolɛ la.
20 Ɛnrɛhɔboka bɛ nwo wɔ nla nu,Ɔluakɛ ɛzɛkyele wɔ azɛlɛ ne,Ɛhunle wɔ menli ne.
Bɛnrɛbɔ ɛtanevolɛma abozoamra aluma bieko ɛlɛ.
21 Bɛziezie bɛ nwo bɛhu ɔ mra ne mɔƆlua bɛ nenyia mɔ ɛtane ne ati,Amaa bɛandwazo bɛanva azɛlɛ neNa bɛankyekye bɛ azua bɛanyi azɛlɛ ne azo.”
22 “Mebadwazo bɛ nwo zo,”+ kɛ ɛlɔne Gyihova se la ɛne.
“Na mebazɛkye duma nee menli mɔɔ ɛha nee bɛ bo zo amra yɛɛ menli mɔɔ bara kenle bie la meavi Babelɔn,”+ kɛ Gyihova se la ɛne.
23 “Na mebamaa fuke adɛnla zolɛ na yeayɛ ɛleka mɔɔ nzule gyinlegyinla a, na mebava ɛzɛkyelɛ sane meakpoa ye meagua ye lɔ,”+ kɛ ɛlɔne Gyihova se la ɛne.
24 Ɛlɔne Gyihova ɛha ndane kɛ:
“Kɛ mɔɔ mezuzu la, yɛɛ ɔbazi a,Yɛɛ kɛ mɔɔ mebɔ kpɔkɛ la, yɛɛ ɔbara nu a.
25 Mebabɛtɛ Aseleanli ne wɔ me azɛlɛ zo,Yɛɛ mebatietia ɔ nwo zo wɔ me awoka ne mɔ azo.+
Mebaye ye gyɛnvayile ne meavi bɛ nwo zo,Na meaye ye adesoa ne meavi bɛ kɔme zo.”+
26 Ɛhye a le kpɔkɛ mɔɔ bɛbɔ* bɛtia azɛlɛ ye kɔsɔɔti a,Yɛɛ ɛhye a le ɛsalɛ mɔɔ bɛdende wɔ* maanle maanle kɔsɔɔti anwo zo a.
27 Ɔluakɛ ɛlɔne Gyihova ɛbɔ kpɔkɛ,Na nwane a bahola azɛkye ye a?+
Yedende ɔ sa,Na nwane a bahola abele ye a?+
28 Ɛvolɛ ne mɔɔ Belemgbunli Ehaze wule la anu,+ bɛvale nrɛlaleɛ ɛhye bɛmaanle:
29 “Filisitia, bɛ nuhua ko biala mmadi fɛlɛko,Kɛmɔ ahenle mɔɔ ɛlɛbobɔ bɛ la kpɔma ne ɛbubu la ati.
Ɔboalekɛ ɛwɔlɛ mɔɔ anwo yɛ ɛzulolɛ+ la bavi ɛwɔlɛ ne ndinli+ ne anu avinde,Na ɔ ra ne bayɛ ɛwɔlɛ mɔɔ ɔ nloa anu sɔ senle na ɔtu la.*
30 Awie mɔɔ ɛnlɛ bie la belamunli ralɛ bali aleɛNa ehyiavolɛma ala anzodwolɛ nu,Noko mebava ɛhɔne meahu wɔ ndinli ne,Na meahu wɔ debie biala mɔɔ ɛha la.+
31 O anlenkɛ kpole, su ye awolɛ! O suakpole, tea nu!
O Filisitia, bɛ muala bɛ ahonle badu!
Ɔluakɛ esike vi sɔlɔ nehane ɛlɛba,Na ye ɛlɔne ne anu biala ɛtɛtele ɔ nwo.”
32 Kɛzi ɔwɔ kɛ bɛbua maanle ne soanvolɛma ɛ?
Bɛbabua bɛ kɛ, Gyihova ɛdo Zayɔn adiabo,+Na koahweabanema mɔɔ wɔ ye menli ne anu la banyia feabelɛ wɔ ɛkɛ.
Ɔbodwɛkɛ
^ Anzɛɛ “bɛalie bɛ menle wɔ.”
^ Anzɛɛ “mɔɔ le bɛ gyimamenle.”
^ Anzɛɛ “bɛbaha agolobɛnwo edwɛkɛ.”
^ Anzɛɛ “kɛzi gyimamenle ne.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Hibulu aneɛ nu, “mbɔnkye nyinli.”
^ Tete ɛdeɛ ne le ngakyile fi ɛnɛ mekɛ ye getaa nwo.
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Hibulu aneɛ nu, “ye sua.”
^ Hibulu aneɛ nu, “a le folɛ mɔɔ bɛdu.”
^ Anzɛɛ “ɛsalɛ mɔɔ ɛziezie ɔ nwo kɛ ɔba.”
^ Anzɛɛ “ɛwɔlɛ anwo ɛzulolɛ mɔɔ ɔ nwo yɛ ndɛ.”
