Luku Edwɛkpa 21:1-38
21 Na mɔɔ ɔmaanle ɔ nye zo la, ɔnwunle kɛ sukoavolɛma ɛlɛfa bɛ ahyɛlɛdeɛ agua ezukoa nlɛka ne mɔ anu.+
2 Akee ɔnwunle kɛ kunlavolɛ ehyianli bie ɛva ngapɛlɛ nwiɔ mɔɔ ɛnzonle bolɛ biala la* ɛragua nu,+
3 na ɔhanle kɛ: “Nɔhalɛ nu meka meahile bɛ kɛ, kunlavolɛ ehyianli ɛhye ɛva dɔɔnwo ɛgua nu ɛdɛla bɛ muala.+
4 Ɔluakɛ bɛ kɔsɔɔti bɛva mɔɔ bɛnyia bɛmaa yebo zo la bie a bɛrayɛ ahyɛlɛdeɛ bɛgua nu a, noko yemɔ, ɔvi ye ehyia nu, yeva debie biala mɔɔ ɔlɛ la a yeragua nu a.”+
5 Nzinlii mɔɔ ɛnee bie mɔ ɛlɛka ɛzonlenlɛsua ne anwo edwɛkɛ kɛ bɛvale awolɛ kpalɛ nee ninyɛne mɔɔ bɛyila zo bɛmaa Nyamenle la bɛziezie ye kɛnlɛma la,+
6 ɔhanle kɛ: “Ninyɛne ɛhye mɔ mɔɔ bɛnwu ye kɛkala la, mekɛ bara mɔɔ bɛnrɛgyakyi bolɛ wɔ bolɛ zo mɔɔ bɛnrɛdwula ye aze a.”+
7 Na bɛbizale ye kɛ: “Kilehilevolɛ, mekɛ boni bɔbɔ a ninyɛne ɛhye mɔ bazi a, na duzu a bayɛ ninyɛne ɛhye mɔ mɔɔ basisi la anwo sɛkɛlɛneɛ a?”+
8 Ɔhanle kɛ: “Bɛnlea boɛ na awie ambɛlɛbɛla bɛ,+ ɔluakɛ menli dɔɔnwo bava me duma ara na bɛaha kɛ, ‘Mame a mele Kelaese ne a,’ na ‘Mekɛ ne ɛbikye.’ Bɛmmadi bɛ nzi.+
9 Eza saa bɛte konle nee basabasayɛlɛ nganeɛ a, bɛmmamaa bɛ ahonle tu. Ɔluakɛ ɔwɔ kɛ ninyɛne ɛhye mɔ dimoa sisi noko awieleɛ ne ɛnrɛra ɛkɛ ne ala.”+
10 Akee ɔzele bɛ kɛ: “Maanle badwazo atia maanle+ yɛɛ belemgbunlililɛ badwazo atia belemgbunlililɛ.+
11 Azɛlɛkpusulɛ mgbole bara, na ɛhɔne nee ewulenzane bara ɛleka ngakyile;+ na bɛbanwu ninyɛne ɛzulolɛ yɛɛ sɛkɛlɛneɛ mgbole wɔ anwuma.
12 “Noko kolaa na ninyɛne ɛhye mɔ kɔsɔɔti asisi la, bɛbahye bɛ na bɛayɛ bɛ kpɔdekpɔde,+ bɛbali bɛ edwɛkɛ wɔ nyianu azua nu na bɛagua bɛ efiade. Me duma ne ati, bɛbava bɛ bɛahɔ arelemgbunli nee amɛnladoma anyunlu.+
13 Ɛhye bamaa bɛali bɛ daselɛ.
14 Yemɔti bɛva bɛzie bɛ ahonle nu kɛ bɛnrɛlimoa bɛnrɛzukoa kɛzi bɛbalie bɛ nwo la,+
15 ɔluakɛ mebamaa bɛ nrɛlɛbɛ meamaa bɛanwu mɔɔ bɛbaha mɔɔ bɛ kpɔvolɛma ɛnrɛhola ɛnrɛha nwolɛ ɛhwee a.+
16 Bieko, bɛ awovolɛ nee bɛ mediema mrenyia yɛɛ bɛ mbusuafoɔ nee bɛ gɔnwo mɔ bɔbɔ baye bɛ amaa, yɛɛ bɛbahu bɛ nuhua bie mɔ,+
17 na me duma ne ati menli kɔsɔɔti bakpɔ bɛ.+
18 Noko bɛ ti zo enrinli ko bɔbɔ ɛnrɛminli.+
19 Saa bɛgyinla kpundii a, bɛbabɔ bɛ ngoane nwo bane.*+
20 “Noko saa bɛnwu kɛ sogyama ɛbɔ Gyɛlusalɛm ɛyia a,+ ɛnee bɛnwu ye kɛ ye ɛzɛkyelɛ ɛbikye.+
21 Akee bɛmaa bɛdabɛ mɔɔ bɛwɔ Dwudiya la ɛbɔ ɔ bo ɛnriandi ɛhɔ awoka ne mɔ azo,+ bɛmaa bɛdabɛ mɔɔ bɛwɔ zolɛ la ɛvi ɛkɛ, na bɛdabɛ mɔɔ bɛwɔ namule nu la mmaba ɛkɛ,
22 ɔluakɛ ɛhye le mekɛ mɔɔ Nyamenle bahwe menli nzo* amaa ninyɛne mɔɔ bɛhɛlɛ la kɔsɔɔti ara nu.
23 Mekɛ ne anu, nrenzɛvolɛma nee bɛdabɛ mɔɔ bɛmaa ngakula nyɛfonlɛ la, bɛ gyakɔ!+ Ɔluakɛ anwongyelelɛ kpole bara azɛlɛ ne azo na bɛbahwe menli ɛhye mɔ anzo.
24 Na bɛbadɔ dadeɛ nloa na bɛava bɛ bɛahɔ akɛlɛzonlenlɛ nu wɔ maanle maanle kɔsɔɔti anu;+ na maanle maanle ne mɔ* batietia Gyɛlusalɛm azo kɔkpula kɛ maanle maanle ne mɔ* mekɛ ne kɛdwu la.+
25 “Eza sɛkɛlɛneɛ basisi wɔ sɛnzɛne ne nee siane ne nee nwɔlɔra ne mɔ anu,+ na maanle maanle ne anu amra bali nyane wɔ azɛlɛ ye azo na bɛnrɛnwu mɔɔ bɛyɛ a ɔlua nyevile ne ɛhululɛ nee ye ɛzɛkyelɛ ne ati.
26 Ɛzulolɛ nee ninyɛne mɔɔ ɛlɛsisi wɔ azɛlɛ ye azo la bamaa menli nye zo abulu bɛ, ɔluakɛ bɛbawoso anwuma tumi ne.
27 Akee bɛbanwu kɛ sonla Ra ne+ lɛ tumi nee anyunlunyia kpole lua amungu nu ɔlɛba.+
28 Na saa ninyɛne ɛhye mɔ ɛlɛbɔ ɔ bo asisi a, bɛdwazo bɛgyinla na bɛmaa bɛ ti zo ɔluakɛ bɛ ɛlielɛ ɛlɛbikye.”
29 Akee ɔmaanle bɛ ndonwo bie kɛ: “Bɛnlea feege baka nee mbaka mɔɔ ɛha la kɔsɔɔti.+
30 Saa bɛwula nya na bɛnwu ye a, ɛnee bɛze kɛ wawaa ɛbikye.
31 Zɔhane ala a bɛdabɛ noko, saa bɛnwu kɛ ninyɛne ɛhye mɔ ɛlɛsisi a, bɛnwu ye kɛ Nyamenle Belemgbunlililɛ ne ɛbikye a.
32 Nɔhalɛ nu meka meahile bɛ kɛ, awolɛndoazo ɛhye ɛnrɛpɛ nu ɛlɛ kɔkpula kɛ ninyɛne ɛhye mɔ amuala bara nu la.+
33 Anwuma nee aze* bapɛ nu, noko me edwɛkɛ ɛnrɛpɛ nu ɛlɛ.+
34 “Bɛnlea bɛ nwo boɛ na aleɛlilɛ molozo nee nza dɔɔnwo ɛnlonlɛ yɛɛ ɛbɛlabɔlɛ nu adwenleadwenle angomo bɛ ahonle zo ɛlɛ,+ na zɔhane kenle ne ambando bɛ arɛlevilɛ nu
35 kɛ ɛhane.+ Ɔluakɛ ɔbara menli mɔɔ de azɛlɛ ye ɛleka biala la anwo zo.
36 Bɛhɔ zo bɛzinza+ na bɛzɛlɛ mekɛ biala+ amaa bɛahola bɛanriandi ninyɛne ɛhye mɔ mɔɔ ɔwɔ kɛ sisi la na bɛagyinla sonla Ra ne anyunlu.”+
37 Ɔti ɔdwu nwonlomɔ a, ɔkilehile wɔ ɛzonlenlɛsua ne anu na ye nɔsolɛ nu ɔfi ɛkɛ ne ɔkɔda Ɔlivi Boka ne azo.
38 Na menli ne amuala ba ɔ nwo ɛkɛ ne nwonlomɔ mangyee ne wɔ ɛzonlenlɛsua ne anu batie ye.
Ɔbodwɛkɛ
^ Anzɛɛ “bɛbanyia bɛ ɛkɛla.”
^ Anzɛɛ “Nyamenle badea menli.”
^ Anzɛɛ “bɛdabɛ mɔɔ bɛnle Dwuuma la.”
^ Anzɛɛ “bɛdabɛ mɔɔ bɛnle Dwuuma la.”
^ Anzɛɛ, “aze”
