Luku Edwɛkpa 3:1-38
3 Taebileɛse Siza ebialilɛ ne ɛvolɛ 15 ne azo, mekɛ mɔɔ ɛnee Pɔnteɛse Paelɛte le amɛnlado wɔ Dwudiya la, ɛnee Hɛlɔdo*+ nea Galeli maangyeba ne azo, ɔ diema Felepe nea Ayetulia nee Telakonaetɛse maangyeba ne azo, yɛɛ Laeseenease nea Abelin maangyeba ne azo,
2 wɔ ɛsɔfo mgbanyima Anase nee Keeyafase+ mekɛ zo, Nyamenle dendɛle hilele Zɛkalaya ara Dwɔn+ wɔ fienemgbole ne anu.+
3 Yemɔti ɔhɔle azua mɔɔ wɔ Dwɔdan ne anloa la amuala azo, na ɔbɔle ɛzɔnenlɛ mɔɔ gyi ɛkɛ maa anlubɛnwo mɔɔ kɔ ɛtanefakyɛ nu la anwo nolo,+
4 kɛ mɔɔ bɛhɛlɛ ye wɔ ngapezonli Ayezaya buluku ne anu la: “Ɛnelɛ bie ɛlɛtea nu wɔ fienemgbole ne anu kɛ: ‘Bɛziezie Gyihova* adenle ne! Bɛmaa ye ndenle ɛdenrɛ.+
5 Ɔwɔ kɛ bɛtua bɔnza biala, na bɛpɛ boka kpole nee boka ekyi biala azo bɛmaa ɔka aze; ɔwɔ kɛ bɛmaa ndenle mɔɔ ɛhyeɛhyea la tenrɛ, na bɛyɛ ndenle mɔɔ ɛzɛkye la boɛ;
6 na nwonane* kɔsɔɔti banwu Nyamenle ngoanelielɛ ne.’”*+
7 Ɔti ɔbɔle ɔ bo ɔzele menli mɔɔ ɛlɛba bɛamaa yeazɔne bɛ la kɛ: “Nwɔlɛ mralɛ, nwane a ɛbɔ bɛ kɔkɔ kɛ bɛnriandi ɛyavalɛ ne mɔɔ ɛlɛba la ɛ?+
8 Yemɔti, bɛbɔ ɛbɛla mɔɔ kile kɛ bɛnlu bɛ nwo la. Bɛmmaka ye bɛ ahonle nu kɛ, ‘Yɛ papa a le Ebileham.’ Na meka meahile bɛ kɛ Nyamenle kola maa Ebileham nyia mralɛ fi awolɛ ɛhye mɔ anu.
9 Nɔhalɛ nu, akuma ne la baka ne abo dɛbadɛba. Yemɔti baka biala mɔɔ ɛnzo ma kpalɛ la, bɛbapɛ na bɛavuandi bɛado senle nu.”+
10 Na menli ne bizale ye kɛ: “Ɛnee duzu a ɔwɔ kɛ yɛyɛ a?”
11 Ɔbuale bɛ kɛ: “Mɔɔ lɛ adɛladeɛ nwiɔ la ɛmaa mɔɔ ɛnlɛ bie la ko, yɛɛ mɔɔ lɛ debie mɔɔ ɔdi la noko ɛyɛ zɔ.”+
12 Adwuledievolɛma bɔbɔ rale bɛmaanle ɔzɔnenle bɛ,+ na bɛbizale ye kɛ: “Kilehilevolɛ, duzu a ɔwɔ kɛ yɛyɛ a?”
13 Ɔbuale bɛ kɛ: “Bɛmmadie adwule bɛmaa ɔtɛla mɔɔ bɛse bɛlie la.”+
14 Sogyama noko bizale ye kɛ: “Duzu a ɔwɔ kɛ yɛyɛ a?” Na ɔzele bɛ kɛ: “Bɛmmabɔ awie biala apo* bɛdie ye ezukoa anzɛɛ bɛmmato awie biala ɛzonle,+ na bɛmaa bɛ kunlu ɛdwo bɛ ahatualɛ nwo.”
15 Ɛnee menli anye la Kelaese ne ade na bɛ muala bɛlɛsuzu Dwɔn anwo wɔ bɛ ahonle nu kɛ, “Bie a yemɔ a le Kelaese ne ɔ?”+
16 Dwɔn buale bɛ na ɔzele bɛ muala kɛ: “Mame, mesɔne bɛ wɔ nzule nu, noko mɔɔ lɛ tumi tɛla me la ɛlɛba na menfɛta kɛ mekɛzianyi ye mgbɔlaboa zo nyɛma bɔbɔ.+ Yemɔ ɔbava sunsum nwuanzanwuanza nee senle a yeazɔne bɛ a.+
17 Ɔlɛ ye ma ɛkpogyalɛ sofi ɔ sa nu mɔɔ ɔbava yeaziezie ye ma ɛwosolɛ ɛleka ne kɛnlɛma na yeaboɔboa hwiiti ne anloa wɔ ye bonwolo ne azo, noko ɔbayela abonle ne wɔ senle mɔɔ ɛnnu ɛlɛ la anu.”
18 Eza ɔdule bɛ folɛ dɔɔnwo na ɔhɔle zo ɔhanle edwɛkpa ne ɔhilele menli ne.
19 Noko kɛmɔ Dwɔn hwile Hɛlɔdo mɔɔ le maangyeba zo neavolɛ la anyunlu ɔluakɛ yegya ɔ diema aye Hɛlɔdease yɛɛ eza Hɛlɔdo ɛyɛ ninyɛne dɔɔnwo mɔɔ ɛnle kpalɛ la ati,
20 mɔɔ ɔyɛle ɔbokale ɛhye mɔ amuala anwo la a le kɛ: Ɔdole Dwɔn efiade.+
21 Mekɛ mɔɔ ɔzɔnenle menli ne amuala la, ɔzɔnenle Gyisɛse noko.+ Na mɔɔ ɔlɛyɛ asɔne la, anwuma bukele,+
22 na sunsum nwuanzanwuanza ne yɛle kɛ abubule la dwule rale ɔ nwo zo, na ɛnelɛ bie vi anwuma hanle kɛ: “Ɛle me Ra mɔɔ mekulo wɔ; melie wɔ medo nu.”+
23 Mekɛ mɔɔ Gyisɛse+ bɔle ye gyima ne abo la, ɛnee yeli ɛvolɛ kɛyɛ 30,+ na ɛnee bɛbu ye kɛ ɔleDwosefi ara,+Hilae ara,
24 Matate ara,Livae ara,Mɛlekae ara,Gyanae ara,Dwosefi ara,
25 Matatayase ara,Emɔso ara,Nahum ara,Ɛselae ara,Nagae ara,
26 Meeyate ara,Matatayase ara,Semeyɛn ara,Dwosɛke ara,Dwoda ara,
27 Dwowanan ara,Rilisa ara,Zɛlubabɛle ara,+Hyealeteɛle ara,+Nilae ara,
28 Mɛlekae ara,Adae ara,Kosam ara,Ɛlemadam ara,Ɛɛ ara,
29 Gyisɛse ara,Ɛleyizɛ ara,Dwolem ara,Matate ara,Livae ara,
30 Simɛyɔn ara,Dwudase ara,Dwosefi ara,Dwonam ara,Yilayakem ara,
31 Mɛlɛya ara,Mina ara,Matata ara,Neetan ara,+Devidi ara,+
32 Gyɛsi ara,+Obɛde ara,+Bowaze ara,+Salemɔn ara,+Nahyɔn ara,+
33 Amenadabe ara,Aanae ara,Hɛzelɔn ara,Pilɛze ara,+Dwuda ara,+
34 Gyekɔbo ara,+Ayezeke ara,+Ebileham ara,+Tilaa ara,+Neehɔ ara,+
35 Silɛge ara,+Riliyu ara,+Pilɛge ara,+Yibɛ ara,+Hyila ara,+
36 Keenan ara,Apakyehyade ara,+Hyɛm ara,+Nowa ara,+Leemɛke ara,+
37 Mɛtusɛla ara,+Yinɔko ara,Gyeelɛde ara,+Mahalɛli ara,+Keenan ara,+
38 Yinɔhye ara,+Sɛte ara,+Adam ara,+Nyamenle ara.
Ɔbodwɛkɛ
^ Ɛhye kile, Hɛlɔdo Antepase. Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “alesama.”
^ Anzɛɛ “banwu adenle mɔɔ Nyamenle balua zo alie ngoane la.”
^ Anzɛɛ “bɛmmasisi awie.”
