Maake Edwɛkpa 3:1-35
3 Ɔziale ɔhɔle nyianusua bie anu bieko, na ɛnee nrenyia bie mɔɔ ɔ sa ɛdwe la wɔ ɛkɛ.+
2 Yemɔti ɛnee bɛlɛnea ye koonwu saa ɔkɛyɛ ye ayile wɔ Ɛnwomenlelielɛ kenle ne a, amaa bɛabɔ ye somolɛ.
3 Ɔzele nrenyia ne mɔɔ asa ɛdwe la kɛ: “Dwazo bagyinla avinli ɛke.”
4 Akee ɔbizale bɛ kɛ: “Asoo mɛla maa adenle kɛ yɛkɛyɛ kpalɛ anzɛɛ yɛkɛyɛ ɛtane wɔ Ɛnwomenlelielɛ kenle ne, yɛkɛlie ngoane* anzɛɛ yɛkɛhu awie?”+ Noko bɛyɛle koonwu.
5 Mekɛ mɔɔ ɔvale ɛya ɔnleanle bɛ ɔyiale, na ɔlile bɛ ahonle ɛsesebɛ ne anwo nyane la,+ ɔzele nrenyia ne kɛ: “Tenrɛ ɛ sa nu.” Na ɔdenrɛle nu, na ɔ sa ne yɛle kpalɛ bieko.
6 Na Falasiima ne vindele na ndɛndɛ ne ala bɛ nee Hɛlɔdo eku ne anu amra+ hɔvale ɔ nwo adwenle kɛ bɛku ye.
7 Na Gyisɛse nee ye ɛdoavolɛma ne vile ɛkɛ ne hɔle nyevile ne anloa, na menli dɔɔnwo vi Galeli nee Dwudiya doale ye.+
8 Menli dɔɔnwo noko mɔɔ bɛvi Gyɛlusalɛm nee Ayedumia yɛɛ Dwɔdan ne anzi lɔ yɛɛ ɛleka ɛleka mɔɔ bikye Taya nee Saedɛn la dele ninyɛne dɔɔnwo mɔɔ ɔlɛyɛ la, bɛrale ɔ nwo ɛkɛ.
9 Na ɔzele ye ɛdoavolɛma ne kɛ bɛkpondɛ ɛlɛne bɛzie ɛkɛ bɛmaa ye amaa menli ne angyele ɔ nwo zo.
10 Kɛmɔ ɔyɛle menli dɔɔnwo ayile la ati, bɛdabɛ mɔɔ bɛ ewule ne anu yɛ se la pelele kɛ bɛkɛbikye ye na bɛkɛva bɛ sa bɛkɛha ye.+
11 Saa sunsum ɛtane ne mɔ+ bɔbɔ nwu ye a, bɛtu bɛgua ɔ nyunlu na bɛtea nu bɛka kɛ: “Wɔmɔ a ɛle Nyamenle Ara ne a.”+
12 Noko fane dɔɔnwo ne ala ɔbɔle bɛ kɔkɔ ɛsesebɛ kɛ bɛmmaka bɛmaa menli nwu ye.+
13 Ɔvole boka bie azo na ɔvɛlɛle bɛdabɛ mɔɔ ɔkpondɛ bɛ la,+ na bɛrale ɔ nwo ɛkɛ.+
14 Na ɔkpale bɛ nuhua 12 na ɔvɛlɛle bɛ ɛzoanvolɛma mɔɔ ɔ nee bɛ balua na yeazoa bɛ yeamaa bɛahɔha edwɛkɛ ne
15 na eza bɛanyia tumi bɛava bɛadu sunsum ɛtane ne mɔ a.+
16 Bɛdabɛ 12+ ne mɔɔ ɔkpale bɛ la a le Saemɔn, mɔɔ eza ɔdonle ye duma Pita+ la,
17 Zɛbɛdi ara Gyemise nee Gyemise adiema Dwɔn (eza ɔvɛlɛle ɛhye mɔ Bowanɛgyize, mɔɔ kile “Ɛsɛlɛmanye Mralɛ”),+
18 Andelu, Felepe, Baatɔlomiyu, Mateyu, Tɔmase, Afeɛse ara Gyemise, Tadease, Saemɔn, mɔdenlebɔvolɛ ne,
19 yɛɛ Dwudase Yesekaleɔto mɔɔ nzinlii yele ye maanle la.
Akee ɔhɔle sua bie anu,
20 na menli dɔɔnwo rayile ɛkɛ ne bieko, yemɔti bɛannyia adenle bɛanli debie bɔbɔ.
21 Na mɔɔ ye mbusuafoɔ dele la, bɛhɔle kɛ bɛkahye ye, ɔluakɛ ɛnee bɛlɛkeha kɛ: “Yezɛ.”+
22 Mɛla kilehilevolɛma mɔɔ vi Gyɛlusalɛm rale la noko hanle kɛ: “Biyɛlezibɛbe* wɔ ɔ nwo, na ɔdua sunsum ɛtane ne mɔ kpanyinli ne anwo zo a ɔtu sunsum ɛtane ne mɔ a.”+
23 Yemɔti ɔvɛlɛle bɛ wɔ ɔ nwo ɛkɛ na ɔvale ndonwo* ɔdendɛle ɔhilele bɛ kɛ: “Kɛ ɔkɛyɛ na Seetan adu Seetan ɛ?
24 Saa belemgbunlililɛ bie ko tia ɔ nwo a, zɔhane belemgbunlililɛ ne ɛnrɛhola gyinla;+
25 yɛɛ saa awuke bie anu kyɛ nwiɔ a, zɔhane awuke ne babɔ.
26 Yemɔti saa Seetan ɛdwazo ɛtia ɔ nwo na ye nuhua ɛhyɛ nwiɔ a, ɛnee ɔnrɛhola gyinla na ye awieleɛ ɛbikye.
27 Nɔhalɛ nu, awie biala ɛnrɛhola ɛnrɛhɔ katakyie sua nu na ɔnrɛwua ye ninyɛne kyesɛ ɔdimoa ɔkyekye katakyie ne na yeahola yeasesa ye sua ne anu ninyɛne ne.
28 Nɔhalɛ nu meka meahile bɛ kɛ, ɛtane biala ɛnle ɛkɛ mɔɔ sonla kɛyɛ anzɛɛ munzule edwɛkɛ biala ɛnle ɛkɛ mɔɔ sonla kɛha mɔɔ bɛnrɛva bɛnrɛhyɛ ye a.
29 Noko awie biala mɔɔ kɛha munzule edwɛkɛ kɛtia sunsum nwuanzanwuanza ne la, ɔnrɛnyia fakyɛ ɛlɛ,+ emomu ɔbali ɛtane nwo fɔlɛ dahuu.”+
30 Ɔhanle ɛhye ɔluakɛ ɛnee bɛlɛkeha kɛ: “Sunsum ɛtane wɔ ɔ nwo.”+
31 Akee ye mame nee ɔ mediema mrenyia ne mɔ+ ragyinlanle alienwo, na bɛzoanle awie kɛ ɔhɔvɛlɛ ye ɔrɛla.+
32 Ɛnee menli dɔɔnwo dede ɔ nwo ɛkɛ, na bɛzele ye kɛ: “Nea! Wɔ mame nee ɛ mediema mrenyia ne mɔ gyi alienwo lɔ ɛlɛkpondɛ wɔ.”+
33 Na ɔbuale bɛ kɛ: “Me mame nee me mediema mrenyia a le nwane mɔ?”
34 Akee ɔnleanle bɛdabɛ mɔɔ bɛdede ɔ nwo ɛkɛ ne la ɔyiale na ɔhanle kɛ: “Nea, me mame nee me mediema mrenyia ɛne!+
35 Awie biala mɔɔ yɛ mɔɔ Nyamenle kulo la, yemɔ a le me diema nrenyia nee me diema raalɛ nee me mame a.”+
