Mateyu Edwɛkpa 26:1-75
-
Ɛsɔfoma ne bɔ kpɔkɛ kɛ bɛku Gyisɛse (1-5)
-
Bɛwolale nwole evuanlɛ bɛguale Gyisɛse anwo (6-13)
-
Akpabɛnwo mɔɔ li awieleɛ yɛɛ kɛzi bɛyele ye bɛmaanle la (14-25)
-
Bɛvale Awulae Nɔsolɛ Aleɛlilɛ ne bɛziele ɛkɛ (26-30)
-
Bɛhanle Pita ɛkpolɛ ne bɛdole ɛkɛ (31-35)
-
Gyisɛse yɛ asɔne wɔ Gɛtesɛmani (36-46)
-
Bɛhye Gyisɛse (47-56)
-
Edwɛkɛlilɛ wɔ Sanhedelin ne anyunlu (57-68)
-
Pita kpo Gyisɛse (69-75)
26 Mekɛ mɔɔ Gyisɛse wiele ɛhye mɔ amuala ka la, ɔzele ye ɛdoavolɛma ne kɛ:
2 “Bɛze kɛ yeha kenle nwiɔ ɛnee Akpabɛnwo ne ɛdwu zo,+ na bɛbaye sonla Ra ne bɛamaa na bɛahu ye wɔ baka zo.”+
3 Akee ɛsɔfo mgbanyinli nee mgbanyima ne mɔ hɔyiale ɛsɔfo kpanyinli ne mɔɔ bɛfɛlɛ ye Keeyafase+ la alie ne anwo,
4 bɛbɔle kpɔkɛ+ kɛ bɛdua nrɛlɛbɛ* adenle zo bɛahye Gyisɛse bɛahu ye.
5 Noko ɛnee bɛlɛka kɛ: “Ɔnle kɛ ɔyɛ ɛvoyialilɛ ne abo, na menli ne anyɛ basabasa.”
6 Mekɛ mɔɔ Gyisɛse wɔ Saemɔn mɔɔ ɛnee le kokobɛvolɛ la sua nu wɔ Bɛtani la,+
7 raalɛ bie vale alabaseta toba mɔɔ nwole evuanlɛ mɔɔ ye bolɛ yɛ se wɔ nu la rale ɔ nwo ɛkɛ, na mɔɔ ɔlɛdi debie* la, ɔbɔle ɔ bo ɔwolale ɔguale ɔ ti zo.
8 Mɔɔ ɛdoavolɛma ne nwunle ɛhye la, bɛvale ɛya na bɛhanle kɛ: “Duzu debie ɛzɛkyelɛ a le ɛhye?
9 Ɔluakɛ anrɛɛ bɛbahola bɛadɔne ye bɛanyia ezukoa dɔɔnwo na bɛava bɛamaa ehyiavolɛma.”
10 Gyisɛse nwunle ɛhye la, ɔzele bɛ kɛ: “Duzu ati a bɛkpondɛ kɛ bɛgyegye raalɛ ne a? Yeyɛ debie kpalɛ yemaa me.
11 Ɔluakɛ bɛ nee ehyiavolɛma de dahuu,+ noko mame bɛ nee me ɛnrɛdɛnla dahuu.+
12 Mekɛ mɔɔ ɔvale nwole evuanlɛ ɛhye ɔguale me nwo la, ɛnee ɔlɛfa yeaziezie me wɔ me ɛzielɛ nu.+
13 Nɔhalɛ nu meka meahile bɛ kɛ, ɛleka biala mɔɔ bɛbabɔ edwɛkpa ɛhye nolo wɔ ewiade amuala la, bɛbaha mɔɔ raalɛ ɛhye ɛyɛ la noko bɛava bɛahakye ye.”+
14 Akee Bulu Nee Nwiɔ ne anu ko mɔɔ bɛfɛlɛ ye Dwudase Yesekaleɔto+ la hɔle ɛsɔfo mgbanyinli ne mɔ ɛkɛ+
15 na ɔhanle kɛ: “Meye ye memaa bɛ a, duzu a bɛbava bɛamaa me a?”+ Bɛyɛle kɛ bɛbamaa ye dwɛtɛ fufule 30.+
16 Yemɔti ɔvi zɔhane mekɛ ne, ɔkpondɛle adenle kpalɛ mɔɔ ɔbalua zo yeaye ye yeamaa la.
17 Kenle mɔɔ limoa mɔɔ bɛdi Paano Mɔɔ Mgbɔvonle Ɛnle Nu la,+ ɛdoavolɛma ne rale Gyisɛse anwo ɛkɛ ne rahanle kɛ: “Nienwu a ɛkulo kɛ yɛsiezie yɛmaa wɔ na ɛdi Akpabɛnwo ne a?”+
18 Ɔhanle kɛ: “Bɛhɔ Asomasi ɛkɛ wɔ sua ne azo bɛhɔze ye kɛ, ‘Kilehilevolɛ ne se: “Me mekɛ ne ɛbikye; me nee me ɛdoavolɛma ne bali Akpabɛnwo ne wɔ wɔ sua nu.”’”
19 Yemɔti ɛdoavolɛma ne yɛle mɔɔ Gyisɛse hanle hilele bɛ la na bɛzieziele ninyɛne bɛmaanle Akpabɛnwo ne.
20 Ye nɔsolɛ nu,+ ɔ nee ɛdoavolɛma 12 ne dɛnlanle ɛkponle nwo.+
21 Mekɛ mɔɔ bɛlɛdi debie la, ɔhanle kɛ: “Nɔhalɛ nu meka meahile bɛ kɛ, bɛ nuhua ko baye me amaa.”+
22 Ɔyɛle bɛ alɔbɔlɛ kpole na bɛbɔle ɔ bo bɛbizale ye ngoko kɛ: “Awulae, asoo medame ɔ?”
23 Ɔbuale bɛ kɛ: “Mɔɔ nee me to ɛsalɛ wɔ kyɛnze nu la a baye me amaa a.+
24 Nɔhalɛ nu, sonla Ra ne bawu kɛ mɔɔ bɛhɛlɛ ye wɔ ɔ nwo la ɛdeɛ, noko sonla ne mɔɔ bɛbalua ɔ nwo zo bɛaye sonla Ra ne bɛamaa la, ye gyakɔ!+ Ɔle kpalɛ kɛ anrɛɛ bɛanwo zɔhane sonla ne.”+
25 Dwudase mɔɔ ɛnee ɔbaye ye yeamaa la buale kɛ: “Relabae, asoo medame ɔ?” Gyisɛse buale ye kɛ: “Yemɔ a ɛdawɔ mumua ne wɔha la.”
26 Mɔɔ bɛlɛdi debie la, Gyisɛse vale paano, na ɔyilale zo ɔwiele la, ɔbubule nu+ ɔvale ɔmaanle ɛdoavolɛma ne, ɔhanle kɛ: “Bɛlie, bɛli. Ɛhye gyi ɛkɛ ne maa me sonlabaka ne.”+
27 Na ɔvale kanrɛlɛ, ɔlale ase na ɔvale ɔmaanle bɛ na ɔhanle kɛ: “Bɛ muala bɛnlo nu,+
28 ɔluakɛ ɛhye gyi ɛkɛ ne maa me ‘mogya ne+ mɔɔ bɛva bɛyɛ ngyekyeleɛ,’+ mɔɔ menli dɔɔnwo ɛtanefakyɛ ti bɛbahwi bɛagua la.+
29 Noko meka meahile bɛ kɛ: Menrɛnlo nwanye ɛhye bieko kɔkpula kenle mɔɔ me nee bɛ banlo ye fofolɛ wɔ Egya Belemgbunlililɛ ne anu la.”+
30 Akee bɛdole ayɛlɛyelɛ edwɛne na bɛvindele bɛhɔle Ɔlivi Boka ne azo.+
31 Akee Gyisɛse zele bɛ kɛ: “Ɔlua medame ti, ɛnɛ nɔe bɛ muala bɛbakpo me, ɔluakɛ bɛhɛlɛ kɛ: ‘Mebabɔ mboaneneavolɛ ne na mboane ne babɔ asande.’+
32 Noko saa bɛdwazo me bɛba ngoane nu a, mebalimoa bɛ nyunlu wɔ Galeli.”+
33 Na Pita buale ye kɛ: “Saa bɛ muala bɛkpo wɔ bɔbɔ a, me ngome ɛdeɛ, menrɛkpo wɔ ɛlɛ!”+
34 Gyisɛse zele ye kɛ: “Nɔhalɛ nu meka meahile wɔ kɛ, ɛnɛ nɔe too mɔɔ akɔlɛ kabɔ la, ɛnee wɔkpo me fane nsa.”+
35 Pita zele ye kɛ: “Saa ɔwɔ kɛ me nee wɔ wu bɔbɔ a, menrɛkpo wɔ ɛlɛ.”+ Ɛdoavolɛma ne mɔɔ ɛha la noko hanle zɔhane ala.
36 Akee Gyisɛse nee bɛ rale ɛleka bie mɔɔ bɛfɛlɛ ye Gɛtesɛmani la,+ na ɔzele ɛdoavolɛma ne kɛ: “Bɛdɛnla ɛke na mekɔ nehane meahɔyɛ asɔne.”+
37 Na ɔvale Pita nee Zɛbɛdi amra mrenyia nwiɔ ne ɔbokale ɔ nwo bɛhɔle, na alɔbɔlɛ nee nyane kpole bɔle ɔ bo hanle ye.+
38 Akee ɔzele bɛ kɛ: “Nyane kpole ɛha me* kɔdwu ewule nu bɔbɔ. Bɛdɛnla ɛke na bɛ nee me ɛzinza.”+
39 Na ɔhɔle ɔ nyunlu ekyii la, ɔbutule ɔ nyunlu aze ɔyɛle asɔne kɛ:+ “Egya, saa ɔkɛyɛ boɛ a, maa kanrɛlɛ ɛhye+ ɛze me nwo ɛhɔ. Noko, tɛ me ɛhulolɛdeɛ ɔ, emomu wɔ ɛhulolɛdeɛ ɛyɛ ɛkɛ.”+
40 Ɔziale ɔrale ɛdoavolɛma ne anwo ɛkɛ na ɔnwunle kɛ bɛdeda, na ɔzele Pita kɛ: “Bɛangola bɛ nee me anzinza dɔnehwele ko bɔbɔ ɔ?+
41 Bɛhɔ zo bɛzinza+ na bɛyɛ asɔne dahuu,+ amaa bɛangɔ sɔnea nu.+ Sunsum ne kulo, noko nwonane ne le bɛtɛɛ.”+
42 Akee ɔhɔzɛlɛle fane nwiɔ ne azo kɛ: “Egya, saa ɛhye pɛ nu se a ɔnyɛ boɛ na ɔwɔ kɛ meno a, ɛnee maa wɔ ɛhulolɛdeɛ ɛyɛ ɛkɛ.”+
43 Na ɔrale bieko la, ɔnwunle kɛ bɛdeda, na bɛte bɛ nye a ɔnde fee.
44 Yemɔti ɔgyakyile bɛ ɔhɔzɛlɛle fane nsa ne azo, na ɔhanle edwɛkɛ ko ne ala.
45 Akee ɔziale ɔrale ɛdoavolɛma ne anwo ɛkɛ na ɔzele bɛ kɛ: “Mekɛ zɛhae anu bɛlɛda bɛalie bɛ menle! Nea! Mekɛ ne ɛbikye kɛ bɛye sonla Ra ne bɛwula ɛtanevolɛma asa anu.
46 Bɛdwazo, bɛmaa yɛhɔ. Nea! Mɔɔ ɔbaye me yeamaa la ɛbikye.”
47 Mɔɔ ɔ nloa wɔ zo ɔlɛtendɛ la, nea! Dwudase, mɔɔ le Bulu Nee Nwiɔ ne anu ko la nee menli dɔɔnwo bie mɔɔ dedɛ konle dadeɛ nee ahoholombaka mɔɔ ɛsɔfo mgbanyinli nee mgbanyima ne mɔ a zoanle bɛ la rale.+
48 Ɛnee ahenle mɔɔ ɔye ye yeamaa la ɛmaa bɛ sɛkɛlɛneɛ kɛ: “Sonla ne mɔɔ mebavo ɔ nloa anwo la, ɔdaye ɔ; bɛhye ye.”
49 Na ɔhɔle Gyisɛse anwo ɛkɛ ne fɔɔnwo na ɔzele ye kɛ: “Anzodwolɛ ɛha wɔ, Relabae!” na ɔvole ɔ nloa anwo.
50 Noko Gyisɛse bizale ye kɛ: “Ayi, ɛbayɛ duzu wɔ ɛke?”+ Akee bɛrahyele Gyisɛse na bɛ nee ye hɔle.
51 Na nea! menli mɔɔ nee Gyisɛse lua la anu ko hwenle ye dadeɛ ne pɛle ɛsɔfo kpanyinli ne akɛlɛ ne anzo.+
52 Akee Gyisɛse zele ye kɛ: “Sia fa wɔ dadeɛ ne wula ɔbo zo ne,+ ɔluakɛ bɛdabɛ mɔɔ bɛtwe dadeɛ la kɔsɔɔti bawu dadeɛ nloa.+
53 Anzɛɛ ɛdwenle kɛ menrɛhola menrɛzɛlɛ Egya kɛ ɔmaa me anwumabɔvolɛma mɔɔ bo ɛlɔne 12 la kɛkala ɔ?+
54 Saa meyɛ zɔ a, kɛ ɔkɛyɛ na Ngɛlɛlera ne mɔɔ se ɔwɔ kɛ ɔba ye zɛhae la ara nu ɛ?”
55 Akee Gyisɛse zele menli ne kɛ: “Bɛva konle dadeɛ nee ahoholombaka bɛlɛba bɛarahye me kɛ awule ɔ? Ɛnee dahuu metɛnla ɛzonlenlɛsua ne anu mekilehile,+ noko bɛangye me.+
56 Noko ɛhye mɔ amuala ɛzi amaa mɔɔ ngapezoma ne hɛlɛle la ara nu.”+ Akee ɛdoavolɛma ne amuala nriandile gyakyile ye.+
57 Menli mɔɔ hyele Gyisɛse la vale ye hɔle ɛsɔfo kpanyinli Keeyafase+ ɛkɛ, ɛleka mɔɔ ɛnee mɛla kilehilevolɛma nee mgbanyima ne mɔ ɛyia la.+
58 Noko Pita hɔle zo lile ɔ nzi wɔ moamoa too ɔhɔdwule ɛsɔfo kpanyinli ne alie ne anwo, na mekɛ mɔɔ ɔwolole ɛkɛ ne la, ɔdɛnlanle sua nu ɛkɛ ne sonvolɛma ne anwo ɛkɛ kɛ ɔnea mɔɔ bazi la.+
59 Ɛnee ɛsɔfo mgbanyinli ne mɔ nee Sanhedelin* ne amuala ɛlɛkpondɛ daselɛ adalɛ atia Gyisɛse amaa bɛalua zo bɛahu ye.+
60 Noko bɛannyia bie, alasevolɛ adalɛ dɔɔnwo rale bɔbɔ ɛdeɛ.+ Nzinlii nwiɔ rale
61 na bɛhanle kɛ: “Nrenyia ɛhye hanle kɛ, ‘Mekola mebubu Nyamenle ɛzonlenlɛsua ne na mefa kenle nsa mesi.’”+
62 Na ɛsɔfo kpanyinli ne dwazole gyinlanle na ɔzele ye kɛ: “Ɛnlɛ mualɛ biala ɔ? Asoo ɛnde mɔɔ menli ɛhye mɔ ɛlɛkeha atia wɔ la?”+
63 Noko Gyisɛse yɛle koonwu.+ Yemɔti ɛsɔfo kpanyinli ne zele ye kɛ: “Ka nɔhalɛ wɔ tease Nyamenle ne anyunlu, saa wɔmɔ a ɛle Kelaese ne, mɔɔ le Nyamenle Ara ne a, ka kile yɛ!”+
64 Gyisɛse zele ye kɛ: “Yemɔ a ɛdawɔ mumua ne wɔha la. Noko meka meahile bɛ kɛ: Ɔvi mekɛ ɛhye mɔɔ kɔ la, bɛbanwu sonla Ra+ ne kɛ ɔde Tumivolɛ ne asa fema zo+ na ɔlua anwuma amungu nu ɔlɛba.”+
65 Akee ɛsɔfo kpanyinli ne suosuanle ye tɛladeɛ aguzo ne anu hanle kɛ: “Yeha munzule edwɛkɛ! Asoo yɛhyia alasevolɛ bieko? Bɛnlea! Kɛkala bɛde munzule edwɛkɛ ne.
66 Kɛzi bɛdwenle nwo ɛ?” Bɛbuale kɛ: “Ɔfɛta ewule.”+
67 Akee bɛtotole nyɛlɛ ɔ nyunlu+ na bɛbobɔle ye.+ Bie mɔ pepɛle ɔ nye zo,+
68 na bɛhanle kɛ: “Kelaese, ka ngapezo kile yɛ. Nwane a bɔle wɔ la?”
69 Mɔɔ Pita de alienwo ɛkɛ ne la, sonvolɛ bɛlɛra bie rale ɔ nwo ɛkɛ na ɔhanle kɛ: “Ɛnee ɛdawɔ noko ɛ nee Gyisɛse mɔɔ vi Galeli la a lua a!”+
70 Noko yeanlie yeando nu na ɔhanle ye wɔ bɛ muala bɛ nyunlu ɛkɛ ne kɛ: “Menze mɔɔ ɛlɛka la anwo ɛhwee.”
71 Mekɛ mɔɔ ɔvindele ɔragyinlanle anlenkɛ ne anloa la, bɛlɛra fofolɛ nwunle ye na ɔzele menli mɔɔ wɔ ɛkɛ ne la kɛ: “Ɛnee nrenyia ɛhye nee Gyisɛse mɔɔ vi Nazalɛte la a lua a.”+
72 Bieko, yeanlie yeando nu na ɔhanle ndane kɛ: “Menze nrenyia ne!”
73 Ɔyɛle ekyii la, menli mɔɔ gyigyi ɛkɛ ne la razele Pita kɛ: “Amgba ɛboka bɛ, ɔluakɛ nɔhalɛ nu, wɔ ɛdendɛlɛ bɔbɔ kile.”
74 Akee ɔbɔle ɔ bo ɔhanle ndane ɔlile amonle kɛ: “Menze nrenyia ne!” Na ɛkɛ ne ala akɔlɛ bɔle.
75 Na Pita hakyele mɔɔ Gyisɛse hanle la kɛ: “Too mɔɔ akɔlɛ kabɔ la, ɛnee wɔkpo me fane nsa.”+ Na ɔvindele ɔhɔzunle alɔbɔlɛ ɛzunlɛ.
