“Saa menli bu adwenle mɔɔ awie mɔ lɛ la a ɔmaa anzodwolɛ tɛnla bɛ avinli.”​—UNESCO Declaration of Principles on Tolerance, 1995.

 Noko saa yɛmbu adwenle mɔɔ awie mɔ lɛ la a, ɔmaa yɛkpɔ bɛ. Nganeɛdelɛ zɛhae maa yɛtendɛ yɛtia bɛ, yɛyɛ nyeyenu na yɛyɛ bɛ basabasa.

 Noko menli lɛ adwenle ngakyile wɔ adwenle mɔɔ awie mɔ lɛ mɔɔ ɔwɔ kɛ yɛbu ye la anwo. Bie mɔ ka kɛ saa yɛbu adwenle mɔɔ awie mɔ lɛ la a, ɔwɔ kɛ yɛdie menli kɔsɔɔti nzuzulɛ nee bɛ nyɛleɛ yɛto nu. Bie mɔ noko die mɔɔ Baebolo ne ka la to nu kɛ, menli mɔɔ bu adwenle mɔɔ awie mɔ lɛ la ze kɛ awie mɔ lɛ adenle kpa mɔɔ bɛkulo nee mɔɔ bɛdie bɛdi la, saa bɔbɔ bɛdabɛ mumua ne bɛ nee bɛ ɛnyɛ adwenle a.

 Asoo Baebolo ne bahola aboa yɛ yeamaa yɛabu adwenle mɔɔ awie mɔ lɛ la ɛnɛ ɔ?

Baebolo ne tu yɛ folɛ kɛ yɛbu adwenle mɔɔ awie mɔ lɛ la

 Baebolo ne ka kɛ yɛbu adwenle mɔɔ awie mɔ lɛ la. Ɔka kɛ: “Bɛmaa menli kɔsɔɔti ɛnwu kɛ bɛlɛ ndelebɛbo.” (Felepaema 4:5) Baebolo na maa yɛ anwosesebɛ kɛ yɛde awie mɔ edwɛkɛ bo, yɛbu bɛ na yɛ nee bɛ ɛli ye kɛnlɛma. Bie a menli mɔɔ fa folɛdulɛ ɛhye yɛ gyima la ɛnlie awie mɔ nyɛleɛ ɛndo nu noko bɛmaa bɛ adenle bɛmaa bɛyɛ mɔɔ bɛkulo la.

 Noko, Baebolo ne maa yɛnwu kɛ Nyamenle lɛ ngyinlazo mɔɔ ɔwɔ kɛ alesama fa bɔ ɛbɛla la. Ɔka kɛ: “O sonla, [Nyamenle ɛha] mɔɔ le kpalɛ la yehile wɔ.” (Maeka 6:8) Ɔmaa yɛnwu adehilelɛ mɔɔ Nyamenle ɛva ɛmaa menli amaa bɛ nye alie wɔ ɛbɛlabɔlɛ nu la.​—Ayezaya 48:17, 18.

 Nyamenle ɛtɛmaanle yɛ adenle kɛ yɛbua awie mɔ ndɛne. Baebolo ne ka kɛ, “Awie ko ala a le Mɛlamaavolɛ nee Ndɛnebuavolɛ a . . . Ɛdawɔ a le nwane mɔɔ ɛbua ɛ gɔnwo ndɛne a?” (Gyemise 4:12) Nyamenle ɛmaa yɛ nuhua ko biala adenle kɛ ɔzi ɔ ti anwo kpɔkɛ yɛɛ yɛdi yɛ kpɔkɛzilɛ ne anwo ɛzonle.​—Ditilɔnomi 30:19.

Mɔɔ Baebolo ne ka ye wɔ ɛbulɛ nwo la

 Baebolo ne ka kɛ “yɛbu awie biala.” (1 Pita 2:17, New Jerusalem Bible) Ɔti menli mɔɔ fa Baebolo ngyinlazo bɔ bɛ ɛbɛla la bu menli kɔsɔɔti, ɔnva nwo bɛ diedi anzɛɛ kɛzi bɛbɔ bɛ ɛbɛla la. (Luku 6:31) Ɛhye ɛngile kɛ menli mɔɔ fa Baebolo ngyinlazo bɔ bɛ ɛbɛla la die diedi anzɛɛ adwenle nzuzulɛ biala to nu anzɛɛ bɛdie kpɔkɛ biala mɔɔ awie mɔ si la bɛto nu. Noko kɛ anrɛɛ bɛbayɛ bɛ nyɛleɛ kɛ bɛmbu bɛ la, bɛbɔ mɔdenle bɛsukoa kɛzi Gyisɛse nee awie mɔ lile la.

 Kɛ neazo la, mekɛ bie Gyisɛse yiale raalɛ bie mɔɔ wɔ ɛzonlenlɛ mɔɔ ɔnlie ɔndo nu la anu. Ɛnee eza raalɛ ne nee nrenyia mɔɔ ɛnle ɔ hu la a de a​—Gyisɛse ɛnlie ɛhye noko ɛndo nu. Noko ɔ nee raalɛ ne dendɛle wɔ ɛbulɛ nu.​—Dwɔn 4:9, 17-24.

 Kɛ mɔɔ Gyisɛse yɛle la, Kilisienema noko ɛziezie bɛ nwo kɛ bɛbahilehile bɛ diedi ne anu bɛahile menli mɔɔ lɛ ɛhulolɛ kɛ bɛbadie bɛ la, noko bɛyɛ ye wɔ “ɛbulɛ kpole nu.” (1 Pita 3:15) Baebolo ne ka kɛ ɔnle kɛ Kilisienema fa bɛ diedi tinlitinli awie mɔ anwo zo. Ɔka kɛ ɔnle kɛ Kelaese ɛdoavolɛ “ko, ɔwɔ kɛ ɔyɛ bɛtɛɛ ɔmaa menli kɔsɔɔti,” mɔɔ bɛdabɛ mɔɔ asolo bɛ diedi boka nwo la.​—2 Timote 2:24.

Mɔɔ Baebolo ne ka ye wɔ ɛkpɔlɛ nwo la

 Baebolo ne ka kɛ ‘yɛmaa anzodwolɛ ɛdɛnla yɛ nee menli kɔsɔɔti avinli.’ (Hibuluma 12:14) Awie mɔɔ kpondɛ anzodwolɛ la ɛmkpɔ awie. Ɔbɔ ɛbɛla kpalɛ na eza ɔbɔ mɔdenle kɛ ɔ nee awie mɔ badɛnla anzodwolɛ nu. (Mateyu 5:9) Nɔhalɛ nu, Baebolo ne maa Kilisienema anwosesebɛ kɛ bɛla atiakunlukɛnlɛma ali bɛhile bɛ kpɔvolɛma bɛva bɛhile kɛ bɛkulo bɛdabɛ mɔɔ bɛ nee bɛ ɛnli ye boɛ la.​—Mateyu 5:44.

 Nɔhalɛ nu, Baebolo ne ka kɛ Nyamenle “kyi” nyɛleɛ mɔɔ kile kɛ yɛmbu awie mɔ anzɛɛ ɔgyegye bɛ la. (Mrɛlɛbulɛ 6:16-19) Noko, Baebolo ne fa edwɛkɛkpɔkɛ “kyi” di gyima wɔ ɛke fa kile kɛzi Nyamenle ɛngulo nyɛleɛ ɛtane bie mɔ la. Baebolo ne maa ɔda ali kɛ Nyamenle kulo kɛ ɔfa menli mɔɔ lɛ ɛhulolɛ kɛ bɛbahakyi bɛ subane la ɛtane ɔkyɛ bɛ na ɔboa bɛ ɔmaa bɛfa ye ngyinlazo ne mɔ bɛbɔ bɛ ɛbɛla.​—Ayezaya 55:7.

Baebolo tɛkese mɔɔ kile kɛ ɔwɔ kɛ yɛbu adwenle mɔɔ awie mɔ lɛ la

 Taetɛse 3:2: “Bɛde edwɛkɛ bo, na bɛla bɛtɛɛyɛlɛ ali bɛhile menli kɔsɔɔti.”

 Mateyu 7:12: “Debie biala mɔɔ bɛkulo kɛ menli yɛ maa bɛ la, bɛdabɛ noko bɛyɛ ye zɔhane ala bɛmaa bɛ.”

 Dwɔhyua 24:15: “Bɛkpa ahenle mɔɔ bɛkɛzonle ye la.”

 Gyima ne 10:34: “Nyamenle ɛnnea sonla nyunlu.”

 Habakɛke 1:12, 13: “[Nyamenle] ɛnlie amumuyɛyɛlɛ ɛndo nu.”

 Wulomuma 12:19: “Bɛgyakyi bɛmaa Nyamenle ɛya ne; ɔluakɛ bɛhɛlɛ kɛ: ‘Nzenralɛlilɛ le me ɛdeɛ; mebadua ɛtane nwo kakɛ,’ Gyihova a se a.” a

 Gyihova Nyamenle ɛtɛmaanle awie biala adenle kɛ ɔli nzenralɛ. Ɔbanlea kɛ pɛlepɛlelilɛ bayɛ gyima wɔ ye mekɛ kpalɛ nu. Amaa wɔanwu nwolɛ edwɛkɛ dɔɔnwo la, kenga edwɛkɛ “Will the Cry for Justice Be Heard?”