BƐHƆ ZO BƐZINZA!
Ezule Mɔɔ Ɛndɔ La—Duzu A Baebolo Ne Ka A?
“China ɛbɔ amaneɛ kɛ ɛvolɛ ɛhye, maanle nu ɛyɛ wuluwulu yɛɛ azɛlɛ nwo ɛyɛ resee ‘kpalɛ’ ɛdɛla mekɛ biala.”—The Guardian, September 7, 2022.
“Amaneɛbɔlɛ kile kɛ Africa ɛleka bie mɔ bahɔ zo ayɛ resee too ɛvolɛ nnu.”—UN News, August 26, 2022.
“Bɛbɔ amaneɛ kɛ ɛkyɛ Europe anu nsa a, nuhua nwiɔ ɛde kɔkɔbɔlɛ kɛ bɛ maanle ne anu bayɛ resee kpalɛ, na bie zɛhae zile la ye ɛvolɛ 500 ɛne.”—BBC News, August 23, 2022.
Menli dɔɔnwo mɔɔ ɛzukoa nwolɛ debie la ɛha kɛ azɛlɛ nwo bahɔ zo ayɛ resee mekɛ tendenle na nuhua ayɛ ase. Asoo anyelazo bie wɔ ɛkɛ ne kɛ ninyɛne bayɛ kpalɛ kenle bie? Duzu a Baebolo ne ka a?
Mɔɔ Baebolo ne ɛha ye wɔ ezule mɔɔ ɛndɔ anwo la
Baebolo ne hanle yɛ mekɛ ye anwo edwɛkɛ kɛ:
“Ɛhɔne . . . bara ɛleka ngakyile.”—Luku 21:11.
Ezule ɛndɔ na azɛlɛ nwo yɛ resee a ɔta ɔfa ɛhɔne ɔba. Ɛhɔne zɛhae yɛɛ amaneɛnwunlɛ nee ewule mɔɔ ɔfa ɔba la le Baebolo ngapezo.—Yekile 6:6, 8.
Deɛmɔti azɛlɛ nwo ɛlɛyɛ resee kpalɛ la
Baebolo ne maa yɛnwu debie titili mɔɔ ɔti azɛlɛ nwo ɛlɛyɛ resee kpalɛ la. Ɔka kɛ:
“Ɔnle sonla mɔɔ ɛlɛtia la ɛdeɛ kɛ ɔbahile ɔ gyakɛ mɔɔ ɔtu bɔbɔ la adenle.”—Gyɛlɛmaya 10:23.
Ɛhye kile kɛ alesama ɛnrɛhola ‘ɛnrɛhile bɛ gyakɛ mɔɔ bɛtu la adenle’ kpalɛ anzɛɛ bɛnrɛhola bɛnrɛnlea bɛ nwo zo. Kpɔkɛ ɛtane mɔɔ bɛsi la ta maa azɛlɛ nwo yɛ resee yɛɛ ɔmmaa bɛnnyia nzule.
Abɔdeɛ nwo nrɛlɛbɛvolɛma dɔɔnwo die to nu kɛ alesama subane a ɛmaa ewiade ye anu ɛlɔ na azɛlɛ nwo ɛyɛ resee wɔ ewiade amuala a.
Anyebolo nee kpɔkɛ ɛtane mɔɔ bɛsi la ɛmaa bɛzɛkye ɛhoayelɛ, anwoma yɛɛ ninyɛne mɔɔ bɔ yɛ nwo mgbɔlɔka yia la na ɛhye ɛmmaa bɛnnyia nzule mɔɔ anwo hyia la wɔ ɛleka bie mɔ.
Noko Baebolo ne maa yɛnyia anyelazo.
Anyelazo wɔ ɛkɛ maa yɛ kenle bie ɔ?
Baebolo ne bɔ ɛwɔkɛ kɛ Nyamenle bali nzule nwo ngyegyelɛ mɔɔ wɔ ɛkɛ kɛkala la anwo gyima. Adenle boni azo?
1. Nyamenle bazɛkye “bɛdabɛ mɔɔ bɛlɛsɛkye azɛlɛ ne la.” (Yekile 11:18) Ɔbaye atisesebɛma mɔɔ bɛ anyebolo subane ɛmmaa menli ɛnnyia nzule na bɛsɛkye ninyɛne mɔɔ bɔ yɛ nwo mgbɔlɔka yia la yeavi ɛkɛ.—2 Timote 3:1, 2.
2. “Azɛlɛ resee bahakyi nzubula.” (Ayezaya 35:1, 6, 7) Nyamenle bayɛ debie biala mɔɔ ezule mɔɔ ɛndɔ na azɛlɛ nwo ɛyɛ resee la ati yezɛkye la boɛ na yeahakyi azɛlɛ ɛhye yeayɛ ye paladaese azɛlɛ mɔɔ nzule dɔɔnwo se zolɛ la.
3. “Ɛnea azɛlɛ ne, ɛmaa ɔso ma dɔɔnwo na ɔkye aleɛ.” (Edwɛne 65:9) Nyamenle bayila azɛlɛ ye yeamaa aleɛ nee nzule kpalɛ dɔɔnwo abu zolɛ na awie biala anyia bie.
Bie A Eza Ɛ Nye Balie
BƐHƆ ZO BƐZINZA!
Maanle Nu Mɔɔ Ɛlɛyɛ Wuluwulu Kpole Wɔ Ewiade Amuala—Duzu A Baebolo Ne Ka A?
Asoo azɛlɛ ye bayɛ mɔɔ bɛtɛnla zo a ɔnyɛ boɛ ɔ?
BAEBOLO KPUYA MƆƆ BƐBUA
Duzu A Bahile Kɛ Yɛwɔ “Awieleɛ Mekɛ” Anzɛɛ “Ewiade Awieleɛ Ne” Anu A?
Baebolo ne ka ninyɛne mɔɔ basisi kolaa na “ewiade awieleɛ” ne ara la anwo edwɛkɛ.
BƐHƆ ZO BƐZINZA!
Bɛlɛsɛkye Azɛlɛ Ne—Duzu A Baebolo Ne Ka A?
Baebolo ngyɛnu ko maa yɛnwu ninyɛne nsa mɔɔ fale ninyɛne mɔɔ ɛlɛsɛkye azɛlɛ ne anwo la.
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.
