1, 2. Kɛzi menli dɔɔnwo bu bɛ gyima ɛ?

MENLI ta fa gyima mɔɔ bɛyɛ la fɛlɛ bɛ nwo. Menli dɔɔnwo gyinla awie mɔ gyima anzɛɛ bɛ gyinlabelɛ zo a bu bɛ a. Wɔ ɛleka bie mɔ, saa bɛkpondɛ kɛ bɛnwu awie a, bɛta bɛbiza ye kɛ, “Duzu gyima a ɛyɛ a?”

² Ɔyɛ a Baebolo ne ka gyima mɔɔ menli bie mɔ yɛle la. Ɔka “Mateyu mɔɔ le adwuledievolɛ”; “Saemɔn mɔɔ yɛ nwoma nwo gyima”; nee “Luku, ayileyɛvolɛ kulovolɛ ne” anwo edwɛkɛ. (Mat. 10:3; Gyi. 10:6; Kɔl. 4:14) Baebolo ne ka gyimalilɛ mɔɔ awie mɔ nyianle la noko anwo edwɛkɛ. Belemgbunli Devidi, ngapezonli Yilaegya nee ɛzoanvolɛ Pɔɔlo le ɛhye anwo neazo. Mrenyia ɛhye mɔ anye zɔle gyima mɔɔ Nyamenle vale maanle bɛ la. Saa yɛlɛ nwolɛ adenle bie wɔ asafo ne anu a, ɔwɔ kɛ yɛdayɛ noko yɛ nye sɔ.

3. Duzu ati a ɔwɔ kɛ mgbanyima tete mgbavolɛ ɛ? (Nea mɔlebɛbo nvoninli ne.)

³ Yɛ nuhua dɔɔnwo anye die gyima mɔɔ yɛyɛ la anwo na yɛngulo kɛ yɛgyakyi ye ɛyɛlɛ. Noko, ɔyɛ alɔbɔlɛ kɛ ɔvi Adam mekɛ zo, awolɛndoazo ko yɛ mgbanyinli na  awolɛndoazo fofolɛ badi bɛ gyakɛ anu. (Nol. 1:4) Kenle nsa ye, nzenzaleɛ ɛhye maa nɔhalɛ Kilisienema yia ngyegyelɛ ngakyile. Gyihova menli gyima ne anu ɛdɛlɛ yɛɛ ye ɛyɛlɛ ɛyɛ se. Saa yɛnyia gyima fofolɛ bie a, yɛdua ndenle fofolɛ zo yɛyɛ—ndenle ɛhye mɔ bie a le adwuleso ninyɛne mɔɔ bɛfa bɛyɛ debie la. Ɔyɛ se ɔmaa mgbanyima bie mɔ kɛ bɛbazukoa ndenle fofolɛ mɔɔ bɛdua zo bɛyɛ debie la. (Luku 5:39) Saa ɔnle zɔ bɔbɔ a, mgbavolɛ lɛ anwosesebɛ tɛla mgbanyima. (Mrɛ. 20:29) Ɛhye ati, nrɛlɛbɛ nee ɛlɔlɛ wɔ nu kɛ mgbanyima batete mgbavolɛ bɛamaa bɛalie ɛzonlelilɛ dɔɔnwo bado nu.—Kenga Edwɛndolɛ 71:18.

4. Duzu ati a ɔyɛ se kɛ bie mɔ bava gyimalilɛ awula awie mɔ asa ɛ? (Nea ɛlɛka “ Deɛmɔti Bie Mɔ Ɛnva Gyimalilɛ Ɛnwula Awie Mɔ Asa La.”)

⁴ Bie a ɔbayɛ se yeamaa mgbanyima kɛ bɛbava gyima bɛamaa mgbavolɛ. Bie mɔ sulo kɛ nwolɛ adenle mɔɔ bɛ nye die nwo la bɛavi bɛ sa. Bie mɔ noko dwenle kɛ mgbavolɛ ɛnrɛhola ɛnrɛyɛ gyima ne kpalɛ kɛ bɛdabɛ la. Yɛɛ bie mɔ noko dwenle kɛ bɛnlɛ alagye bɛntete awie mɔ. Ɔwɔ kɛ mgbavolɛ noko nyia abotane, saa bɛtɛfale gyimalilɛ dɔɔnwo bɛtɛwulale bɛ sa a.

5. Kpuya boni mɔ a yɛbazuzu nwo wɔ edwɛkɛ ɛhye anu a?

⁵ Bɛmaa yɛzuzu gyimalilɛ mɔɔ bɛfa bɛwula awie mɔ asa la anwo wɔ ndenle nwiɔ azo. Mɔɔ limoa, kɛ ɔkɛyɛ na mgbanyima amaa mgbavolɛ ayɛ gyima dɔɔnwo ɛ, na duzu ati a ɛhye anwo hyia ɛ? (2 Tem. 2:2) Mɔɔ tɔ zo nwiɔ, duzu ati a ɔhyia kɛ mgbavolɛ da subane kpalɛ ali wɔ mekɛ mɔɔ bɛlɛboa mediema mɔɔ lɛ anwubielɛ na bɛlɛsukoa bɛ la ɛ? Yɛva kɛzi Belemgbunli Devidi boale ɔ ra ne ɔmaanle ɔyɛle gyima mɔɔ anwo hyia la yɛbɔ ɔ bo.

6. Duzu a ɛnee Belemgbunli Devidi kpondɛ kɛ ɔyɛ a, na duzu a Gyihova hanle a?

⁶ Mɔɔ Devidi vile sua nu wɔ ɛvolɛ dɔɔnwo anu la, ɔrayɛle belemgbunli na ɔdɛnlanle sua kɛnlɛma nu. Ɔyɛle ye nyane kɛ bɛnlɛ sua anzɛɛ ‘ɛzonlenlɛ  sua’ mɔɔ bɛdu bɛmaa Gyihova a, yemɔti ɛnee ɔkpondɛ kɛ ɔsi bie. Zɔhane ati, ɔzele ngapezonli Neetan kɛ: “Nea, mame mede sua mɔɔ bɛva sida mbaka bɛzi la anu, na [Gyihova] Ngyekyeleɛ Ɛlɛka ne, yemɔ ɔgyi ndanlɛ sua nu.” Neetan buale ye kɛ: “Yɛ mɔɔ wɔ wɔ adwenle nu la na Nyamenle nee wɔ lua.” Noko Gyihova anlie ando nu. Ɔzele Neetan kɛ ɔha ɔhile Devidi kɛ: ‘Tɛ wɔmɔ yɛɛ ɛsi ɛzonlenlɛ sua wɔamaa meadɛnla nuhua a.’ Gyihova maanle Devidi nwunle kɛ Ɔbahɔ zo yeayila ye ɛdeɛ, noko Nyamenle hanle kɛ Devidi ara Sɔlɔmɔn a bazi ɛzonlenlɛ sua ne a. Duzu a Devidi yɛle a?—1 Ek. 17:1-4, 8, 11, 12; 29:1.

7. Duzu a Devidi yɛle wɔ Gyihova adehilelɛ ne anwo a?

⁷ Devidi andwe ye moalɛ ne anzia, ɔluakɛ ɔnrɛnyia ɛzonlenlɛ sua ne anwo nganvolɛ la ati. Bɛravɛlɛle sua ne Sɔlɔmɔn ɛzonlenlɛ sua, tɛ Devidi ɔ. Bie a ɔyɛle Devidi nyane kɛ yeangola yeanyɛ mɔɔ wɔ ye ahonle nu la ɛdeɛ, noko ɔboale gyima ne kpalɛ. Ɔkpondɛle gyimayɛvoma, yɛɛ ɔboɔboale mbulalɛ, kɔbele, dwɛtɛ fufule, ezukoa nvutuke nee mbaka dɔɔnwo anloa. Bieko, ɔzile Sɔlɔmɔn ahonle kɛ: ‘Zɔhane ati, me ra, Gyihova nee wɔ ɛdɛnla, amaa wɔahola wɔazi Gyihova wɔ Nyamenle ne sua ne wɔawie, kɛmɔ yeha ye wɔ ɛ nwo la.’—1 Ek. 22:11, 14-16.

8. Duzu ati a anrɛɛ Devidi bahola anyia adwenle kɛ Sɔlɔmɔn ɛnrɛhola gyima ne yɛ ɛ, na duzu a ɔyɛle a?

⁸ Kenga 1 Edwɛkɛsisilɛ 22:5. Anrɛɛ Devidi bahola anyia adwenle kɛ Sɔlɔmɔn ɛnrɛhola ɛnrɛnlea gyima ɛhye mɔɔ anwo hyia la azo. Ɛnee ɔwɔ kɛ ɛzonlenlɛ sua ne ‘yɛ kpole,’ na ɛnee “Sɔlɔmɔn le kakula, yɛɛ ɔ ti ɛtɛtinle.” Noko, ɛnee Devidi ze kɛ Gyihova baboa Sɔlɔmɔn yeamaa yeayɛ gyima ne mɔɔ yeva yewula ɔ sa la. Ɔti Devidi vale ye adwenle ziele mɔɔ ɔbayɛ yeaboa la azo, ɔboɔboale ninyɛne dɔɔnwo anloa.

9. Kɛ ɔkɛyɛ na mgbanyima akunlu adwo gyima mɔɔ bɛbava bɛamaa awie mɔ la anwo ɛ? Maa neazo.

⁹ Ɔnle kɛ ɔyɛ mgbanyima nyane kɛ bɛbava bɛ gyimalilɛ bɛamaa mgbavolɛ. Emomu, amaa gyima ne ahɔ zo la ɔwɔ kɛ bɛtete mgbavolɛ bɛmaa bɛyɛ gyima ne. Ɔwɔ kɛ mgbanyima anye die saa bɛtete mgbavolɛ bɛmaa bɛfɛta na bɛlɛyɛ gyima ne a. Fa selɛ mɔɔ ɛlɛkile ɔ ra nrenyia kɛzi bɛka kale la kɛ neazo. Saa ɔ ra ne le ekyi a, ye papa ala a ɔnea ye a. Noko saa ɔyɛ kpanyinli a, ye papa kilehile mɔɔ ɔlɛyɛ la anu kile ye. Na saa ɔdwu mɔɔ ɔkola ɔka kale ne bie a, ye papa maa ye ndetelɛ dɔɔnwo. Ɔdwu mekɛ ne bie a, ɔbamaa ɔ ra ne aha bie, noko awieleɛ kolaa ne ɔ ra ne a baha kale ne a. Selɛ mɔɔ ze nrɛlɛbɛ la ɛnrɛde  nganeɛ kɛ ɔ ra ne ɛlɛdie ye gyima, emomu, ɔ nye balie. Zɔhane ala a saa mgbanyima tete mgbavolɛ bɛmaa bɛdie teokelase gyimalilɛ bɛto nu a, bɛ nye die a.

10. Kɛzi Mosisi dele nganeɛ wɔ anyunlunyia nee tumi nwo ɛ?

¹⁰ Ɔnle kɛ mgbanyima twe nungule. Nea mɔɔ Mosisi yɛle wɔ mekɛ mɔɔ Yizilayɛma bie mɔ bɔle ɔ bo yɛle bɛ nwo kɛ ngapezoma la. (Kenga Ɛdianlɛ 11:24-29.) Ɛnee Dwɔhyua mɔɔ le Mosisi boavolɛ la kpondɛ kɛ ɔsi bɛ adenle. Ɔda ali kɛ ɛnee ɔdwenle kɛ bɛlɛdie Mosisi anyunlunyia nee ye tumi ne bie. Noko Mosisi buale kɛ: “Ɛtwe me ti nungule ɔ? Me kunlu a anrɛɛ [Gyihova] ɛva ye Sunsum ne ɛwula ye menli ne nu yemaa bɛ kɔsɔɔti bɛyɛ Nyamenle kpɔmanvolɛma!” Mosisi nwunle kɛ ɛhye vi Gyihova. Kɛmɔ Mosisi amkpondɛ anyunlunyia ammaa ɔ nwo la ati, ɔmaanle ɔlale ali kɛ ɔ kunlu anu a anrɛɛ Gyihova azonvolɛ kɔsɔɔti banyia sunsum nu ahyɛlɛdeɛ ɛhye bie. Saa awie mɔ nyia nwolɛ adenle mɔɔ yɛdayɛ a anrɛɛ ɔwɔ kɛ yɛ sa ka ye la a, asoo ɔnyɛ yɛ fɛ kɛ mɔɔ Mosisi yɛle la ɔ?

11. Duzu a adiema ko hanle ye wɔ ye gyima ne mɔɔ ɔvale ɔmaanle awie la anwo a?

¹¹ Ɛnɛ, mediema dɔɔnwo wɔ ɛkɛ mɔɔ bɛva ɛvolɛ dɔɔnwo bɛyɛ gyima ɛsesebɛ na bɛtete awie mɔ bɛmaa bɛlɛyɛ gyima dɔɔnwo a. Kɛ neazo la, adiema bie mɔɔ bɛfɛlɛ ye Peter la ɛva ɛvolɛ mɔɔ bo 74 ɛyɛ dahuu ɛzonlenlɛ gyima ne, na yeva nuhua 35 yezonle wɔ Europe Bɛtɛle bie anu. Ɛnee ɔdaye a ɔnea Ɛzonlenlɛ Nwo Gyimalilɛleka ne azo a. Kɛkala adiema kpavolɛ bie mɔɔ bɛfɛlɛ ye Paul mɔɔ ɔ nee Peter ɛyɛ gyima ɛvolɛ dɔɔnwo la a nea zo a. Mɔɔ bɛbizale Peter kɛzi ɔte nganeɛ wɔ nzenzaleɛ ɛhye anwo la, ɔhanle kɛ, “Ɔyɛ me fɛ kpole kɛ mediema mrenyia mɔɔ bɛtete bɛ la wɔ ɛkɛ na bɛdie ɛzonlelilɛ dɔɔnwo bɛto nu na bɛyɛ gyima ne kpalɛ a.”

12. Duzu a ɔwɔ kɛ yɛsukoa yɛfi Rilihɔbowam anwo edwɛkɛ ne anu a?

¹² Mɔɔ Sɔlɔmɔn wule la, ɔ ra Rilihɔbowam rayɛle belemgbunli. Mɔɔ ɛnee Rilihɔbowam hyia folɛdulɛ wɔ ye gyima ne anwo la, ɔlimoale ɔnwunle mgbanyima ne mɔ. Noko yeanva bɛ folɛdulɛ ne! Emomu, ɔdiele mgbavolɛ mɔɔ bɛle ɔ tipɛnema na kɛkala bɛle ye boavolɛma la. Mɔɔ vile nu rale la ɛnle kpalɛ fee. (2 Ek. 10:6-11, 19) Duzu a yɛsukoa yɛfi nu a? Ɔwɔ kɛ yɛmaa mgbanyima mɔɔ lɛ anwubielɛ la tu yɛ folɛ na yɛsuzu nwolɛ kpalɛ. Ɔwɔ kɛ mgbavolɛ dua ndenle fofolɛ zo di ninyɛne nwo gyima ɛdeɛ, noko ɔnle kɛ bɛkpo mgbanyima folɛdulɛ ndɛndɛ.

13. Kɛzi ɔwɔ kɛ mgbavolɛ nee mgbanyima yɛ ko ɛ?

¹³ Bie a kɛkala mgbavolɛ a nea gyima mɔɔ mediema mgbanyima boka nwo a bɛlɛyɛ la azo a. Noko nrɛlɛbɛ wɔ nu kɛ bɛbazukoa debie bɛavi mgbanyima ɛhye mɔ ɛkɛ. Paul mɔɔ yɛlimoa yɛha kɛ yeli Peter agyakɛ anu ɔlɛnea Bɛtɛle gyimalilɛleka bie azo la, hanle kɛ, “Memaanle Peter dule me folɛ, na memaanle menli mɔɔ me nee bɛ yɛ gyima la anwosesebɛ kɛ bɛdabɛ noko bɛyɛ bie.”

14. Duzu a yɛsukoa yɛfi koyɛlɛ mɔɔ ɛnee wɔ Temɔte nee ɛzoanvolɛ Pɔɔlo avinli la anu a?

¹⁴ Kpavolɛ Temɔte nee ɛzoanvolɛ Pɔɔlo yɛle gyima ɛvolɛ dɔɔnwo. (Kenga Felepaema 2:20-22.) Pɔɔlo hɛlɛle Kɔlentema ne kɛ: “Ɛhye ala ati a melɛsoa Temɔte, mɔɔ le me ra mɔɔ mekulo  ye, na Awulae ati ɔdi nɔhalɛ la wɔ bɛ nwo lɔ a. Ɔbahakyehakye bɛ . . . ndenle ne mɔ mɔɔ Kelaese ati melua nu melɛkilehile asɔne ne mɔ mɔɔ wɔ ɛleka biala la.” (1 Kɔl. 4:17) Edwɛkɛ sikalɛ ɛhye maa yɛnwu koyɛlɛ mɔɔ ɛnee wɔ Pɔɔlo nee Temɔte avinli la. Pɔɔlo nyianle mekɛ hilehilele Temɔte ‘ndenle ne mɔ mɔɔ Kelaese ati ɔlua nu la.’ Temɔte zukoale ye kpalɛ na Pɔɔlo anye liele ɔ nwo, na ɛnee Pɔɔlo lɛ anwodozo kɛ Temɔte bahola ali Kɔlentema sunsum nu ngyianlɛ nwo gyima. Ɛhye le neazo kpalɛ mɔɔ ɔwɔ kɛ mgbanyima mɔɔ wɔ ɛkɛ ɛnɛ la sukoa na bɛtete awie mɔ bɛmaa bɛdi asafo ne anyunlu.

15. Saa nzenzaleɛ bie ka yɛ a, kɛzi folɛ mɔɔ Pɔɔlo dule Wulomu Kilisienema ne la baboa yɛ ɛ?

¹⁵ Nzenzaleɛ dɔɔnwo ɛlɛkɔ zo ɛnɛ. Gyihova ahyehyɛdeɛ ne foa mɔɔ wɔ azɛlɛ ye azo la ɛlɛnyi wɔ ndenle dɔɔnwo azo, na ɛhye fa nzenzaleɛ ba. Saa nzenzaleɛ ne bie ka yɛ a, bɛmaa yɛbɛlɛ yɛ nwo aze yɛva Gyihova ɛhulolɛdeɛ yɛlimoa yɛ ɛdeɛ ne anyunlu. Zɔhane ɛyɛlɛ maa koyɛlɛ ba. Pɔɔlo hɛlɛle Wulomu Kilisienema ne kɛ: “Mese bɛ muala kɛ bɛmmamemaa bɛ nwo zo. Bɛdwenle kpalɛ na bɛbua bɛ nwo ndɛne ngoko wɔ diedi dodo mɔɔ Nyamenle ɛva ɛmaa bɛ la anu. Kɛmɔ sonlabaka lɛ ye nvɛyeba dɔɔnwo na nvɛyeba ko biala lɛ ye gyima mɔɔ ɔdi la, zɔhane ala yɛɛ saa yɛzonle bɔbɔ a yɛ muala yɛbɔ nu a yɛle sonlabaka ko wɔ Kelaese anu.”—Wlo. 12:3-5.

16. Duzu a mgbanyima nee mgbavolɛ yɛɛ bɛ ye mɔ bahola ayɛ amaa anzodwolɛ nee koyɛlɛ adɛnla Gyihova ahyehyɛdeɛ ne anu a?

¹⁶ Kɛzi yɛ tɛnlabelɛ ne de ye biala la, bɛmaa yɛ muala yɛboa yɛmaa Gyihova Belemgbunlililɛ ne ɛnyia anyuhɔlɛ. Mgbanyima, bɛtete mgbavolɛ bɛmaa bɛyɛ bɛ gyima ne bie. Mediema mgbavolɛ, bɛlie ɛzonlelilɛ bɛdo nu, bɛbɛlɛ bɛ nwo aze, na bɛbu mgbanyima. Yelɛma, bɛzukoa Akoyela aye Pelesela, mɔɔ vale nɔhalɛlilɛ boale Akoyela wɔ mekɛ mɔɔ bɛ tɛnlabelɛ ne hakyile la.—Gyi. 18:2.

17. Anwodozo boni a Gyisɛse nyianle ye wɔ ye ɛdoavolɛma ne anu a, na duzu a ɔtetele bɛ kɛ bɛyɛ a?

¹⁷ Gyisɛse yɛle neazo kɛnlɛma wɔ kɛzi ɔwɔ kɛ bɛtete awie mɔ la anu. Ɛnee ɔze kɛ ye azɛlɛ ye azo ɛzonlenlɛ gyima ne bara awieleɛ, na awie mɔ badoa ye gyima ne azo. Ɛnee ye ɛdoavolɛma ne ɛnli munli, noko ɔnyianle bɛ nuhua anwodozo na ɔzele bɛ kɛ bɛbayɛ gyima mgbole bɛadɛla ye. (Dwɔn 14:12) Ɔtetele bɛ kpalɛ, na bɛbɔle edwɛkpa ne nolo wɔ aleɛabo ɛleka biala.—Kɔl. 1:23.

18. Anyelazo boni a wɔ ɛkɛ a, na duzu a yɛbahola yɛayɛ ye kɛkala a?

¹⁸ Wɔ Gyisɛse afɔlebɔlɛ ewule ne anzi, bɛdwazole ye bɛhɔle anwuma, ɛleka mɔɔ bɛmaa ye gyima dɔɔnwo kɛ ɔyɛ la, ye tumi tɛla “arelemgbunli, tumivolɛma, mgbolema nee awulae mɔ.” (Ɛfɛ. 1:19-21) Saa yɛdi nɔhalɛ yɛkɔ ewule nu kolaa na Amagɛdɔn ara a, bɛbadwazo yɛ bɛara tenlene ewiade fofolɛ ne anu, ɛleka mɔɔ yɛbanyia gyima mɔɔ yɛ ahunlundwolɛ dɔɔnwo yɛayɛ la. Noko kɛkala, gyima mɔɔ anwo hyia kpalɛ mɔɔ ɔwɔ ɛkɛ yɛ muala yɛyɛ bie la a le edwɛkpa ne nolobɔlɛ nee ɛdoavolɛyɛlɛ gyima ne. Bɛmaa yɛ kɔsɔɔti, ngakula nee mgbanyinli, yɛ “nye ɛbolo Awulae gyima ne ɛyɛlɛ nwo.”—1 Kɔl. 15:58.