Yɛlimoa yɛnwu sɛkɛlɛneɛ mɔɔ Gyisɛse hanle la. Sɛkɛlɛneɛ zɔhane maa yɛnwu mekɛ mɔɔ bɛvale Nyamenle Belemgbunlililɛ ne mɔɔ Gyisɛse Kelaese a le zolɛ Belemgbunli la bɛziele ɛkɛ wɔ anwuma la.

Baebolo ne ka kɛ saa bɛfa Belemgbunlililɛ tumi ne bɛmaa Gyisɛse a ɔbadu Seetan nee ye mbɔnsam ne mɔ yeavi anwuma. Kɛkala, bɛwɔ azɛlɛ ye azo, ɔti a ninyɛne ɛyɛ basaa ɔvi 1914 mɔɔ ba la a.​—Yekile 12:7, 9.

Ɔnva nwo kɛzi ninyɛne nu ɛlɛyɛ se la, Gyisɛse mɔɔ le Nyamenle Belemgbunlililɛ ne azo Belemgbunli la ɛyɛ ninyɛne mɔɔ ɔbaboa menli mɔɔ bɛwɔ azɛlɛ ye azo la. Ɔlua ewiade amuala Baebolo ngilehilelɛ gyima ne azo, menli dɔɔnwo ɛlɛsukoa Baebolo ne na bɛfa nuhua ngyinlazo ne bɛbɔ bɛ ɛbɛla. (Ayezaya 2:2-4) Menli dɔɔnwo ɛzukoa kɛ bɛnrɛyɛ ngɛkɛlɛ bɛnrɛmaa gyima, bɛbamaa bɛ abusua asetɛnla ayɛ kpalɛ yɛɛ bɛnrɛhu bɛ nwo bɛnrɛkpondɛ anwonyia. Menli ɛhye mɔ ɛlɛsukoa kɛ bɛbamaa bɛ ɛbɛlabɔlɛ ayɛ kpalɛ ɛnɛ na bɛaziezie bɛ nwo bɛamaa kɛ Nyamenle Belemgbunlililɛ ne maanlema.

Gyisɛse ɛlɛdi tumi wɔ anwuma ɛdeɛ, noko sonla arane tɛdi tumi wɔ azɛlɛ ye azo. Noko akee, Nyamenle ɛha ɛhile Gyisɛse kɛ: ‘Ɔhɔ ye kpɔvolɛma avinli ɔhɔli bɛ nwo zo konim.’ (Edwɛne 110:2) Ɔnrɛhyɛ, Gyisɛse bazɛkye kpɔvolɛma amuala na yealie menli mɔɔ bɛziezie bɛ nwo kɛ bɛbadie Nyamenle la.

Wɔ mekɛ zɔhane, Nyamenle Belemgbunlililɛ ne

• Baye adalɛ ɛzonlenlɛ avi ɛkɛ. Ɛzonlenlɛ mɔɔ kilehile Nyamenle anwo adalɛ edwɛkɛ na bɛmaa menli nwo kyele bɛ la ɛnrɛdɛnla ɛkɛ ne bieko. Baebolo ne fɛlɛ adalɛ ɛzonlenlɛ kɛ ɔle tuutuunli. Ye ɛzɛkyelɛ ne bazi menli dɔɔnwo anwo.​—Yekile 17:15, 16.

• Bamaa alesama tumililɛ ara awieleɛ. Nyamenle Belemgbunlililɛ ne bava alesama tumililɛ kɔsɔɔti ara awieleɛ.​—Yekile 19:15, 17, 18.

• Baye amumuyɛma avi ɛkɛ. Na menli mɔɔ bɛzi bɛ ahonle kɛ bɛyɛ ɛtane na bɛngulo kɛ bɛtie Nyamenle la noko ɛ? “Amumuyɛma ɛdeɛ, bɛbaye bɛ bɛavi azɛlɛ ye azo.”​—Mrɛlɛbulɛ 2:22.

• Baye Seetan nee mbɔnsam ne mɔ avi ɛkɛ. Seetan nee mbɔnsam ne mɔ ɛnrɛhola ‘ɛnrɛbɛlɛbɛla maanle maanle ne bieko.’​—Yekile 20:3, 10.

Duzu a ɛhye mɔ bahile amaa menli mɔɔ die Nyamenle Belemgbunlililɛ ne to nu la ɛ?

Gyisɛse mɔɔ badɛnla anwuma ali tumi la bayɛ ninyɛne dɔɔnwo adɛla mɔɔ alesama arane biala ɛyɛ la. Menli 144,000 mɔɔ bɛdɔle bɛ bɛvile alesama anu la nee ye bali tumi. (Yekile 5:9, 10; 14:1, 3) Ɔbanlea yeamaa bayɛ Nyamenle ɛhulolɛdeɛ wɔ azɛlɛ ye azo. Duzu a Nyamenle Belemgbunlililɛ ne bayɛ amaa menli mɔɔ badɛnla azɛlɛ ne azo la a?

• Ɔbaye anwodolɛ nee ewule yeavi ɛkɛ. “Maanlema ne anu biala ɛnrɛha kɛ: ‘Me nwo ɛdo me’” yɛɛ “ewule ɛnle ɛkɛ bieko.”​—Ayezaya 33:24; Yekile 21:4.

• Ɔbamaa nɔhalɛ anzodwolɛ nee banebɔlɛ ara. “Ɛ mra banyia anzodwolɛ kpole kpalɛ,” yɛɛ “bɛ nuhua ko biala badɛnla ye vanye nee ye feege baka bo, na awie biala ɛnrɛha bɛ ɛzulolɛ.”​—Ayezaya 54:13; Maeka 4:4.

• Ɔbamaa bɛ gyima kpalɛ. “Na menli mɔɔ mekpa bɛ la akunlu badwo bɛ sa anloa gyima nwo bɔkɔɔ. Bɛnrɛvɛ ɛvɛlɛ mgbane.”​—Ayezaya 65:22, 23.

• Ɔbayɛ azɛlɛ ne boɛ. “Fienemgbole nee azɛlɛ resee anye balie, yɛɛ ɛsɛlɛ bali fɛlɛko na zolɛ ayɛ felawɔse ngome.”​—Ayezaya 35:1.

• Ɔbahilehile menli yeamaa bɛanyia dahuu ngoane. “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne, nee mɔɔ ɛzoanle ye la, Gyisɛse Kelaese.”​—Dwɔn 17:3.

Nyamenle kulo kɛ ɛ sa ka nyilalɛ ɛhye mɔ bie. (Ayezaya 48:18) Edwɛkɛ mɔɔ doa zo la bamaa wɔanwu mɔɔ ɛbahola wɔayɛ ye ɛnɛ amaa wɔanyia kenle bie nyilalɛ ɛhye mɔ bie la.