Ngapezonli Mosisi hanle kɛ saa yɛdi Nyamenle mɛla ne mɔ azo a, ɔbayila yɛ. (Ditilɔnomi 10:13; 11:27) Tɛ anzohwenlɛ ti a yɛtie Nyamenle a. Ye subane ngɛnlɛma ne mɔ a ka yɛ maa yɛtie ye a. Yɛkulo ye ɔti yɛngulo kɛ yɛyɛ debie yɛmaa ɔdi nyane. “Ɛhye a Nyamenle anwo ɛlɔlɛ kile a, kɛ yɛkɛli ye mɛla ne mɔ azo.”​—1 Dwɔn 5:3.

Noko kɛzi Nyamenle mɔɔ yɛbadie ye la bamaa yɛanyia nyilalɛ ɛ? Suzu ndenle nwiɔ anwo.

“Medame Gyihova a mele wɔ Nyamenle a, ahenle mɔɔ kilehile wɔ ɔmaa ɔwie wɔ boɛ, ahenle mɔɔ kile wɔ adenle mɔɔ ɔwɔ kɛ ɛdua nu la.”​—AYEZAYA 48:17.

Yɛ Bɔvolɛ ne ze yɛ na ɔmaa yɛ adehilelɛ mɔɔ yɛhyia nwo la. Saa yɛkulo kɛ Nyamenle ngilehilelɛ ne boa yɛ maa yɛsi kpɔkɛ kpalɛ a, ɔwɔ kɛ yɛsukoa ye Ngɛlɛlera Nwuanzanwuanza ne na yɛfa yɛdi gyima.

“Anyelielɛ a le bɛdabɛ mɔɔ bɛtie Nyamenle edwɛkɛ ne na bɛdi zo la!”​—LUKU 11:28.

Ɛnɛ, menli dɔɔnwo mɔɔ fa Nyamenle Edwɛkɛ ne bɔ bɛ ɛbɛla la anye die. Yɛva nrenyia bie mɔɔ wɔ Spain mɔɔ lɛ ahonle kpole na ɔnlɛ menli mɔɔ ɔ ye bɔbɔ boka nwo anwo abotane la kɛ neazo. Kenle ko, ɔgengale ngapezonli Mosisi mɔɔ hanle Gyekɔbo ara nrenyia Dwosefi bɛtɛɛyɛlɛ subane nwo edwɛkɛ la anwo debie. Bɛdɔnenle Dwosefi kɛ akɛlɛ na bɛdole ye efiade; noko ɔziele ɔ nwo dii, ɔkpondɛle anzodwolɛ na ɔvale ɛtane ɔhyɛle. (Gyɛnɛsese tile 37-45) Nrenyia ne mɔɔ vi Spain la hanle kɛ: “Dwosefi neazo ne mɔɔ mendwenlenle nwo la maanle menzukoale bɛtɛɛyɛlɛ, ahunlunyele yɛɛ bɛnwozohomonlɛ subane. Ɛhye ɛmaa me nye ɛlie ɛbɛlabɔlɛ nu.”

Kɛzi yɛ nee menli bali la anwo edwɛkɛ dɔɔnwo wɔ Ngɛlɛlera Nwuanzanwuanza ne anu. Edwɛkɛ mɔɔ doa zo la baha ɛhye anwo edwɛkɛ dɔɔnwo.