Saa yɛkenga abɔdeɛ nwo edwɛkɛ mɔɔ wɔ Mɔlebɛbo, Baebolo buluku ne anu a, yɛnwu ye kɛ Nyamenle hanle hilele Adam sonla mɔɔ limoa la kɛ: “Ɛkola ɛdi bakama biala mɔɔ wɔ tola ye anu la bie, na kpalɛ nee ɛtane ɛnwunlɛ baka ne, yemɔ mmadi ye ma ne bie, ɔluakɛ kenle ko ne mɔɔ ɛkɛli bie la, ɛbawu.” (Mɔlebɛbo 2:16, 17) Zɔhane edwɛkɛ ne kile kɛ, saa Adam lile Nyamenle mɛla zo a, anrɛɛ ɔbadɛnla ngoane nu wɔ Yidɛn tola ne anu dahuu.

Kɛ anrɛɛ Adam bayɛ tieyɛ na yeadɛnla aze dahuu la, ɔbulule Nyamenle mɛla zo na ɔlile bakama ne mɔɔ ɔ ye Yive vale maanle ye la. (Mɔlebɛbo 3:1-6) Badwu ɛnɛ yɛtɛyia mɔɔ vile bɛ anzosesebɛ ne anu rale la. Ɛzoanvolɛ Pɔɔlo hilele ɛhye anu kɛ: “Ɔlua sonla ko anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane.” (Wulomuma 5:12) “Sonla ko” zɔhane a le Adam. Ɛtane boni a ɔyɛle a na duzu ati a yɛwu a?

Adam yɛle ɛtane ɔluakɛ ɔ nye fuu ɔbulule Nyamenle mɛla zo. (1 Dwɔn 3:4) Yɛɛ kɛ mɔɔ Nyamenle hanle hilele Adam la, nwolɛ ahatualɛ a le ewule. Saa Adam nee ɔ bo zo amra lile Nyamenle mɛla zo a, anrɛɛ ɛtane biala ɛnrɛra bɛ nwo yɛɛ bɛnrɛwu ɛlɛ. Nyamenle ambɔ menli kɛ bɛwu emomu kɛ bɛdɛnla aze dahuu.

Kɛ mɔɔ Baebolo ne ɛha la, ɔnyɛ nwanwane kɛ  ‘ewule ɛdɛlɛ ɛha menli kɔsɔɔti la.’ Noko asoo debie wɔ yɛ nu mɔɔ tɛnla aze wɔ yɛ ewule nzi ɔ? Menli dɔɔnwo baha kɛ ɛhɛe, debie wɔ yɛ nu​—bɛfɛlɛ ye ɛkɛla​—ɔnwu ɛlɛ. Noko saa yɛka zɔhane a, ɛnee ɔkile kɛ Nyamenle bɔle adalɛ hilele Adam. Kɛmɔti ɛ? Ɔluakɛ saa debie bie wɔ yɛ nu mɔɔ saa yɛwu a ɔkɔtɛnla ɛleka bie a, ɛnee ɔkile kɛ ewule ɛnle ɛtane ahatualɛ kɛ mɔɔ Nyamenle hanle la. Baebolo ne ka kɛ: “Nyamenle ɛngola ɛmbɔ adalɛ.” (Hibuluma 6:18) Nɔhalɛ nu, Seetan a bɔle adalɛ wɔ mekɛ mɔɔ ɔzele Yive kɛ: “Bɛnrɛwu” la.​—Mɔlebɛbo 3:4.

Ɛhye maa yɛbiza kɛ, saa ɛkɛla mɔɔ ɛnwu ɛlɛ ngilehilelɛ ne ɛnle nɔhalɛ a, ɛnee duzu a amgba si wɔ sonla ewule nzi a?

Mɔlebɛbo buluku ne mɔɔ ka abɔdeɛ nwo edwɛkɛ la ka kɛ: ‘Gyihova Nyamenle vale ndɛtɛlɛ nwonle sonla na ɔliele ngoane ɛnwomenle ɔguale ɔ bonyi nu, na sonla nyianle ngoane.’ Bɛhilele edwɛkɛkpɔkɛ “nyianle ngoane” abo bɛvile Hibulu edwɛkɛkpɔkɛ ne’phesh, * mɔɔ ɔkile “abɔdeɛ mɔɔ die ɛnwomenle” la anu.​—Mɔlebɛbo 2:7.

Baebolo ne ka ye wienyi kɛ bɛanva ɛkɛla mɔɔ ɛnwu ɛlɛ la bɛambɔ alesama. Emomu, yɛ nuhua ko biala le sonla mɔɔ de “ngoane” nu. Yemɔti a, saa ɛyɛ neɛnleanu a ɛnrɛnwu Baebolo ngɛlɛlera ko bɔbɔ mɔɔ fa edwɛkɛkpɔkɛ “ɛkɛla mɔɔ ɛnwu ɛlɛ” di gyima la.

Kɛ mɔɔ Baebolo ne ɛnga kɛ alesama lɛ ɛkɛla mɔɔ ɛnwu ɛlɛ la, ɛnee duzu ati a ɛzonlenlɛ dɔɔnwo kilehile mɔɔ le ngakyile fi ɛhye anwo la ɛ? Mualɛ ne fa yɛ kɔ tete Yigyibiti.

Herodotus, Giliki tetedwɛkɛ kɛlɛvo mɔɔ dɛnlanle aze wɔ ɛvoya nnu K.Y.M. la hanle kɛ “Yigyibitima a limoale hilehilele kɛ ɛkɛla ne ɛnwu ɛlɛ a.” Nzinlii Babelɔnma noko liele edwɛkɛ ɛhye dole nu. Mɔɔ Alɛzanda kpole ne lile Avinli aduduleɛ amra anwo zo konim wɔ ɛvolɛ 332 K.Y.M. la, ɛnee Giliki nrɛlɛbɛvolɛma ɛmaa zɔhane ngilehilelɛ ne ɛdɛlɛ wɔ maanle mɔɔ wɔ Giliki tumililɛ bo la amuala azo.

Wɔ ɛvoya mɔɔ limoa la anu, Dwuu ɛzonlenlɛ eku titili nwiɔ, Essenema nee Falasiima hilehilele kɛ saa nwonane ne wu a ɛkɛla ne fi ye nu. The Jewish Encyclopedia ne ka kɛ: “Dwuuma nyianle ɛkɛla mɔɔ ɛnwu ɛlɛ la anwo diedi ne vile Giliki nwomazukoalɛ nu, titili wɔ abɔlɔba Plato ngilehilelɛ nu.” Zɔhane ala a, tetedwɛkɛ kɛlɛvo Josephus maanle ɔlale ali kɛ ngilehilelɛ ɛhye ɛngyi Baebolo ne azo, emomu ɔgyi “Gilikima diedi” mɔɔ ɛnee ɔbu ye kɛ ɔle nwɔra dɔɔnwo mɔɔ bɛ kɛlɛvolɛma ne ɛha ɛbɔ nu la azo.

Mɔɔ Gilikima amaamuo ne ɛlɛtɛlɛ la, menli mɔɔ fɛlɛ bɛ nwo Kilisienema la vale awozonle ɛzonlenlɛ ngilehilelɛ ɛhye rale bɛ ɛzonlenlɛ nu. Tetedwɛkɛ kɛlɛvolɛ Jona Lendering hanle kɛ, “Plato hilele kɛ ɛnee yɛ ɛkɛla ne wɔ ɛleka kpalɛ bie na kɛkala ɔwɔ ɛtane ewiade nu. Ɛhye ammaa yeanyɛ se kɛ bɛbalie Plato ngilehilelɛ ne bado nu wɔ Kilisiene ɛzonlenlɛ nu.” Ɛhye ati, awozonle ɛzonlenlɛ ngilehilelɛ mɔɔ fale ɛkɛla mɔɔ  ɛnwu ɛlɛ anwo la rabokale Kilisiene asɔne ne mɔlebɛbo diedi ne anwo.

Wɔ ɛvoya mɔɔ limoa la anu, ɛzoanvolɛ Pɔɔlo bɔle kɔkɔ ɛhye: “Edwɛkɛ ne mɔɔ vi sunsum nu la ka ye wienyi kɛ mekɛ mɔɔ li awieleɛ la anu bie mɔ bahwe bɛ nwo avi diedi ne anwo na bɛahɔdie sunsum adalɛma edwɛkɛ nee sunsum ɛtane ngilehilelɛ.” (1 Timote 4:1) Nea kɛzi edwɛkɛ ɛhye mɔ yɛle nɔhalɛ a! Ɛkɛla mɔɔ ɛnwu ɛlɛ la ngilehilelɛ ne boka “sunsum ɛtane ngilehilelɛ” nwo. Ɔngyi Baebolo ne azo, ɔvi tete awozonle ɛzonlenlɛ nee sonla adwenle nu.

Ɔyɛ anyelielɛ kɛ, Gyisɛse hanle kɛ: “Bɛbanwu nɔhalɛ ne, na nɔhalɛ ne bamaa bɛanyia fanwodi.” (Dwɔn 8:32) Saa yɛnyia Baebolo ne anu nɔhalɛ ndelebɛbo a, ɔbamaa yɛanyia fanwodi na yɛahwe yɛ nwo yɛavi ngilehilelɛ mɔɔ ɛnwula Nyamenle anyunlunyia nee nyɛleɛ mɔɔ ɛzonlenlɛ dɔɔnwo si ye adua la anwo. Eza ɔmaa yɛtwe yɛ nwo yɛfi amaamuo nee diedi funli mɔɔ menli lɛ ye wɔ ewule nwo la anwo.​—Nea ɛlɛka “ Mowuamra wɔ ni?”

Tɛ yɛ bɔvolɛ ne bodane a le kɛ ɔmaa alesama adɛnla aze ɛvolɛ 70 anzɛɛ 80 pɛ na bɛahɔdɛnla ɛleka fofolɛ bie dahuu. Ye bodane a le kɛ ɔmaa sonla adɛnla aze dahuu wɔ azɛlɛ ye azo kɛ ɔ mra mɔɔ yɛ tieyɛ. Ɛhye le Nyamenle ɛlɔlɛ mɔɔ ɔlɛda ye ali yeahile alesama la na ɔnrɛhakyi ye ɛlɛ. (Malakae 3:6) Edwɛndolɛnli ne maanle yɛ anwosesebɛ kɛ: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”​—Edwɛndolɛ 37:29.