Asoo yɛbahola yɛanyia anwodozo kɛ ɛwɔkɛ biala mɔɔ Nyamenle ɛbɔ la bara nu? Ɛnee Gyisɛse lɛ anwodozo ɛhye na ɔluale ye ngilehilelɛ zo ɔboale ye tievolɛma ɔmaanle bɛnyianle nuhua diedi. Nea ndonwo mɔɔ ɔyɛle wɔ ye boka zo ɛdendɛle ne mɔɔ bɛyɛ nwolɛ kɛlɛtokɛ wɔ Mateyu 5:18 la, ɔka kɛ: “Nɔhalɛ nu, meka meahile bɛ kɛ saa anwuma nee azɛlɛ bapɛ nu aze bɔbɔ a, ngɛlɛlerakpɔkɛ nretee ko anzɛɛ kpɔkɛ ko ɛnrɛvi Mɛla ne anu, kɔkpula kɛ ninyɛne ɛhye mɔ amuala kɛra nu la.”

Hibulu ngɛlɛlerakpɔkɛ nretee ne a le י (yod), mɔɔ limoa wɔ Tetragrammaton, Nyamenle duma nwuanzanwuanza Gyihova ne anu la. * Eza ɛzonlenlɛ nu mgbanyima nee Falasiima ne bule ‘ngɛlɛlerakpɔkɛ ko’ biala mɔɔ wɔ Nyamenle mɛla ne anu la kɛ ɔhyia kpalɛ.

Ɛnee Gyisɛse ɛlɛkile kɛ, ɔbahola yeara ye kɛ anwuma nee azɛlɛ bɛapɛ nu noko ɔnrɛra ye ɛlɛ kɛ edwɛkɛkpɔkɛ ko bɔbɔ mɔɔ wɔ Mɛla ne anu la bɛapɛ nu mɔɔ ɔnrɛra nu a. Noko Ngɛlɛlera ne si ye pi kɛ anwuma nee azɛlɛ badɛnla ɛkɛ ne dahuu. (Edwɛndolɛ 78:69) Yemɔti mɔɔ edwɛkɛ zɔhane kile la a le kɛ edwɛkɛkpɔkɛ nretee biala mɔɔ wɔ Mɛla ne anu la bara nu wɔ adenle biala azo.

Asoo ninyɛne ngyikyi ngyikyi anwo hyia Gyihova Nyamenle? Ɛhɛe. Dwenle ɛhye anwo nea: Bɛhanle bɛhilele tete Yizilayɛma kɛ bɛmmabu Akpabɛnwo boane ne bowule nu. (Adendulɛ 12:46) Ɛnee ɔle mɛla ekyi ɛdeɛ noko asoo bɛdele deɛmɔti ɔnle kɛ bɛyɛ ɛhye la abo? Bie a bɛande ɔbo. Ɛnee Gyihova ze ye kɛ adehilelɛ ekyi ɛhye le ngapezo mɔɔ fale Mɛzaya ne anwo kɛ saa ɔwu wɔ baka ne azo a bɛnrɛbu ye bowule ko bɔbɔ anu.​—Edwɛndolɛ 34:20; Dwɔn 19:31-33, 36.

Duzu a yɛsukoa yɛfi Gyisɛse edwɛkɛ ne anu a? Yɛbahola yɛnyia anwodozo kɛ Nyamenle ɛwɔkɛ ne amuala bara nu, nretee ko bɔbɔ ɛnrɛha nu. Nea kɛzi Hibulu ngɛlɛlerakpɔkɛ nretee ne maa yɛ anwodozo yɛ kpole a!