Maa Baebolo Ne Ɛhilehile Wɔ
Duzu A Bazi Wɔ Ndɛnebualɛ Kenle Ne A?
Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.
1. Ndɛnebualɛ Kenle ne a le duzu?
Kɛmɔ ɛnwu ye wɔ nvoninli ne mɔɔ wɔ ɛ sa fema zo anu la, menli dɔɔnwo suzu kɛ Ndɛnebualɛ Kenle ne bɛbaboɔboa ɛkɛla dɔɔnwo anloa wɔ Nyamenle ebia ne anyunlu na bɛabua bɛ ndɛne wɔ mɔɔ bɛyɛle la anwo—bie mɔ bahɔ anwuma, yɛɛ bɛbahile bie mɔ noko nyane wɔ abɔnsam sua zo. Noko, Baebolo ne ka kɛ bodane mɔɔ Ndɛnebualɛ Kenle ne gyi zo la a le kɛ bɛfa bɛalie menli bɛavi nzisi bo. (Edwɛndolɛ 96:13) Nyamenle ɛkpa Gyisɛse kɛ Ndɛnebuavolɛ mɔɔ ɔbazia yeava pɛlepɛlelilɛ yearɛlɛ alesama.—Kenga Ayezaya 11:1-5; Gyima ne 17:31.
2. Kɛzi Ndɛnebualɛ Kenle ne bamaa pɛlepɛlelilɛ azia ara ɛ?
Mekɛ mɔɔ Adam, nrenya mɔɔ lumua la anye fuu dele Nyamenle anwo atua la, ɔvale ɔ bo zo amra amuala ɔwulale ɛtane, amaneɛnwunlɛ, nee ewule tumi bo. (Wulomuma 5:12) Amaa bɛaziezie ɛhye la, Gyisɛse badwazo mɔwuamra mgbe mgbe dɔɔnwo yeara ngoane nu. Yekile buluku ne ka kɛ ɛhye bara wɔ Kelaese Gyisɛse ɛvolɛ apenle ko tumililɛ ne anu.—Kenga Yekile 20:4, 11, 12.
Bɛnrɛgyinla mɔɔ menli mɔɔ bɛbadwazo bɛ yɛle kolaa na bɛawu la azo a bɛabua bɛ ndɛne a, emomu, bɛbagyinla mɔɔ bɛbayɛ ye wɔ ninyɛne mɔɔ wɔ “mbuluku” ne mɔɔ bɛha nwolɛ edwɛkɛ wɔ Yekile ati 20 ne anu la azo. (Wulomuma 6:7) Pɔɔlo hanle kɛ bɛbadwazo “ɛtanevolɛma nee kpalɛyɛlɛma” bɛara ngoane nu bɛamaa bɛazukoa Nyamenle anwo debie.—Kenga Gyima ne 24:15.
3. Duzu a Ndɛnebualɛ Kenle ne bali nwolɛ gyima a?
Bɛdabɛ mɔɔ bɛwule mɔɔ ɛnee bɛnze Gyihova Nyamenle anwo ɛhwee na bɛazonle ye la bɛanyia adenle ahakyi na bɛayɛ mɔɔ le kpalɛ la. Saa bɛdwazo bɛ na bɛdi boɛ a bɛbanyia “ngoane mɔɔ ɛnlɛ awieleɛ.” Noko bɛdabɛ mɔɔ bɛbadwazo bɛ la bie mɔ ɛnrɛhulo kɛ bɛbazukoa Gyihova ndenle ne mɔ. Yemɔti, bɛbabua “bɛ ewule fɔlɛ.”—Kenga Dwɔn 5:28, 29; Ayezaya 26:10; 65:20.
Ɛvolɛ apenle ko Ndɛnebualɛ Kenle ne kahɔ ye awieleɛ la, ɛnee Gyihova ɛmaa alesama mɔɔ yɛ tieyɛ la ɛli munli. (1 Kɔlentema 15:24-28) Nea anyelazo kɛnlɛma mɔɔ wɔ ɛkɛ maa menli mɔɔ yɛ tieyɛ a! Nyamenle bamaa Seetan Abɔnsam mɔɔ ɛnee bɛdo ye efiade ɛvolɛ apenle ko wɔ kuma ne mɔɔ ɛnlɛ ɔ bo anu la avinde na yeava sɔnea mɔɔ li awieleɛ la yeara. Seetan babɔ mɔdenle bieko kɛ ɔtwe menli yeavi Gyihova anwo, noko bɛdabɛ mɔɔ bɛbakpo Seetan la bɛanyia dahuu ngoane wɔ azɛlɛ ye azo.—Kenga Ayezaya 25:8; Yekile 20:7-9.
4. Ndɛnebualɛ kenle gyɛne boni a nwolɛ bara alesama nvasoɛ a?
Baebolo ne ka ewiade ɛhye awieleɛ ne noko anwo edwɛkɛ kɛ “ndɛnebualɛ kenle.” Ndɛnebualɛ kenle ɛhye bara arɛlevile nu kɛmɔ Nowa mekɛ zo Azuyilɛ ne mɔɔ zɛkyele ɛtanevolɛma kɔsɔɔti yɛle la. Ɔyɛ anyelielɛ kɛ “menli mɔɔ ɛnze Nyamenle la” ɛzɛkyelɛ ne babuke adenle yeamaa azɛlɛ fofolɛ mɔɔ “pɛlepɛlelilɛ wɔ nu la” ara a.—Kenga 2 Pita 3:6, 7, 13.
Bie A Eza Ɛ Nye Balie
BAEBOLO KPUYA MƆƆ BƐBUA
Kɛ Ɔkɛyɛ Na Wɔadɛnla Aze Dahuu Ɛ?
Baebolo ne bɔ ɛwɔkɛ kɛ: Awie mɔɔ yɛ mɔɔ Nyamenle kpondɛ la badɛnla aze dahuu. Suzu ninyɛne nsa mɔɔ ɔkulo kɛ yɛyɛ la anwo.
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.
