BIE mɔ ka kɛ ɔle nvonleɛ kɛ yɛbabiza Nyamenle edwɛkɛ. Bɛte nganeɛ kɛ ɔngile ɛbulɛ kɛ yɛbabiza deɛmɔti Nyamenle yɛ ninyɛne bie anzɛɛ ɔmaa adenle ɔmaa ninyɛne bie mɔ kɔ zo la anwo edwɛkɛ. Asoo kɛ ɛte ɔ bo la ɛne?

Saa ɔle zɔ a, ɛnee bie a ɔbayɛ wɔ nwanwane kɛ ɛbanwu kɛ tenlenema dɔɔnwo bizale Nyamenle kpuyia la. Yɛ kpuyia mɔɔ bɛbizale la bie mɔ nzonlɛ:

Nrenya nɔhavo Dwobu: “Duzu ati a ɛtanevolɛ tɛnla aze, yɛ mrelera na bɛnyia tumi mgbole ɛ?”—Dwobu 21:7.

Ngapezonli nɔhavo Habakɛke: “Duzu ati a ɛ nye gyi menli ne mɔɔ ɛnlɛ diedi la anwo na wɔyɛ koonwu ɛlɛmaa amumuyɛma ye azɛkye tenlenema ɛ?”—Habakɛke 1:13.

Gyisɛse Kelaese: “Me Nyamenle, me Nyamenle, duzu ati a wɔkpo me ɛ?”—Mateyu 27:46.

Saa ɛkenga edwɛkɛ mɔɔ wɔ ngɛlɛlera ɛhye mɔ anwo la amuala a, ɛnrɛnwu debie biala mɔɔ kile kɛ Gyihova * Nyamenle vale ɛya kɛ bɛbizale ye kpuyia ɛhye mɔ a. Nɔhalɛ nu, ye abotane ne ɛnyɛ azibɛnwo. Kɛ neazo la, saa yɛbiza Nyamenle kɛ ɔmaa yɛ sa ɛha yɛ nwonane afoa nu ninyɛne mɔɔ yɛhyia nwo amaa yɛanyia kpɔkɛdelɛ kpalɛ a, ɔnva ye kɛ yɛbɔ ye aholoba. Ɔfi ɛlɔlɛ nu ɔmaa yɛ sa ka mɔɔ yɛhyia nwo la. (Mateyu 6:11, 33) Zɔhane ala a ɔfi ye ɛhulolɛ nu ɔbua edwɛkɛ mɔɔ bamaa yɛ adwenle nu ade na yɛ nwo adɔ yɛ la a. (Felepaema 4:6, 7) Gyisɛse zele ye ɛdoavolɛ ne mɔ kɛ: ‘Bɛhɔ zo bɛbiza na bɛ sa kɛha ye.’ (Mateyu 7:7) Edwɛkɛ mɔɔ fane Gyisɛse ɛwɔkɛ ne anwo la kile kɛ ɛnee ɔnga nwonane afoa nu ninyɛne mɔɔ yɛbanyia ye la angomekye anwo edwɛkɛ, na emomu, mualɛ mɔɔ fane kpuyia mɔɔ anwo hyia la noko boka nwo.

Saa bɛmaa wɔ adenle a, anrɛɛ kpuyia ɛhye mɔ anu boni a ɛbabiza Nyamenle a?

• Asoo me ɛbɛlabɔlɛ gyi bodane zo?

• Saa mewu a mebahɔ ni?

• Duzu ati a ɛmaa menwu amaneɛ a?

Ɔluakɛ ‘bɛvale Nyamenle Sunsum a bɛhɛlɛle Nyamenle Edwɛkɛ ne’ la ati, yɛbanwu mualɛ mɔɔ Nyamenle fa maa la wɔ ye Edwɛkɛ Baebolo ne anu. (2 Temɔte 3:16) Maa yɛzuzu mɔɔ ɛmaa menli bie mɔ ɛbiza kpuyia mɔɔ wɔ anwuma ɛkɛ la nee mualɛ mɔɔ bɛnyia ye wɔ Baebolo ne anu la anwo.